Ishusho y’amakuru y’ingenzi yaranze icyumweru mu mafoto

Yanditswe na IGIHE
Kuya 18 Mata 2021 saa 11:53
Yasuwe :
0 0

Icyumweru kigana ku musozo cyaranzwe n’ibikorwa bitandukanye byiganjemo ibyo gusoza icyumweru cy’icyunamo cyo kwibuka Jenoside yakorewe Abatutsi.

Ku wa Mbere, tariki ya 12 Mata 2021, Ambasaderi w’u Rwanda muri Leta Zunze Ubumwe z’Abarabu (UAE), Emmanuel Hategeka ku wa 12 Mata 2021 yagiranye ibiganiro na Minisitiri w’Uburezi muri icyo gihugu, Hussain Ibrahim Al Hammadi, byibanze ku gushyira hamwe kw’impande zombi mu gushyigikira uburezi.

Kuri uyu munsi kandi abayobozi, abakinnyi n’abakunzi ba Kiyovu Sports basuye urwibutso rwa Jenoside yakorewe Abatutsi rwa Kigali ruri ku Gisozi, bunamira inzirakarengane zihashyinguye.

Ku wa Kabiri tariki 13 Mata 2021, habaye umuhango wo gusoza icyumweru cy’icyunamo, umunsi wahuriranye no kwibuka abanyapolitiki bishwe bazira ko barwanyije umugambi wa leta y’Abicanyi wo kurimbura Abatutsi.

Wabereye ku Rwibutso rwa Jenoside rwa Rebero, ruruhukiyemo imibiri y’abarenga ibihumbi 14 barimo Abatutsi biciwe muri Kigali mu minsi ya mbere ubwo Jenoside yatangiraga ndetse na bamwe mu banyepolitiki bamaganye umugambi wo kurimbura Abatutsi.

Indi nkuru yaranze icyumweru ni iy’igezwa mu Rwanda rya Munyenyezi Béatrice ukurikiranyweho ibyaha birindwi birimo bitanu bya Jenoside yakorewe Abatutsi mu 1994 na bibiri byibasiye inyokomuntu. Uyu mugore yageze mu Rwanda ku wa 16 Mata 2021 yoherejwe na Leta Zunze Ubumwe za Amerika aho yari yarahungiye.

Munyenyezi yoherejwe mu Rwanda nyuma yo gusoza igifungo cy’imyaka 10 yakatiwe n’urukiko rwo muri Amerika ahamijwe icyaha cyo kubeshya Urwego rw’Abinjira n’Abasohoka ku ruhare yagize muri Jenoside, kugira ngo abone ubwenegihugu bwa Amerika.

Icyumweru kigana ku musozo cyaranzwe n’ibikorwa bitandukanye birimo inkuru ya Uwamahoro Rosine wongeye kubonana n’umuryango we nyuma y’imyaka 27 nta we uca undi iryera.

Uwamahoro yaburanye n’umuryango we muri Jenoside yakorewe Abatutsi. Icyo gihe yitwaga Kankindi Liliose, ariko abamureze bamwita Uwamahoro Rosine.

IGIHE yakusanyije amafoto agaragaza ibihe by’ingenzi byaranze iminsi irindwi ishize hagati ya tariki ya 12 na 18 Mata 2021.

Ambasaderi w’u Rwanda muri Leta Zunze Ubumwe z’Abarabu (UAE), Emmanuel Hategeka ku wa 12 Mata 2021 yagiranye ibiganiro na Minisitiri w’Uburezi muri icyo gihugu, Hussain Ibrahim Al Hammadi, byibanze ku gushyira hamwe kw’impande zombi mu gushyigikira uburezi
Ku wa Mbere tariki ya 12 Mata 2021, abayobozi, abakinnyi n’abakunzi ba Kiyovu Sports basuye urwibutso rwa Jenoside yakorewe Abatutsi rwa Kigali ruri ku Gisozi, bunamira inzirakarengane zihashyinguye
Abanyapolitiki u Rwanda rufite ubu basabwe gufatira urugero kuri bagenzi babo bemeye kwicwa bazira kwanga ikibi
RIB yeretse itangazamakuru abantu 12 bakurikiranyweho ibyaha bitanu birimo gutunga intwaro no kuyinjiza mu gihugu, kwiba hakoreshejwe intwaro, gushyiraho umutwe w’abagizi ba nabi no kuwujyamo, kwiha ububasha ku mirimo itari iyawe no kwambara umwambaro utagenewe ugamije kuyobya rubanda ndetse n’ubwicanyi
Munyenyezi Béatrice ukurikiranyweho ibyaha birindwi birimo bitanu bya Jenoside yakorewe Abatutsi mu 1994 na bibiri byibasiye inyokomuntu yagejejwe mu Rwanda ku wa 16 Mata 2021 yoherejwe na Leta Zunze Ubumwe za Amerika aho yari yarahungiye
Tariki ya 18 Mata 2021 yahinduye amateka y’ubuzima bwa Uwamahoro Rosine. Uyu mukobwa yongeye guhura n’umuryango we nyuma y’imyaka 27 batanyijwe na Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .