00:00:00 IGIHE NETWORK KN KINYARWANDA EN ENGLISH FR FRANCAIS

Ifoto y’Umunsi: Kwambara ’Hijab’ ntibimubuza gukina Basketball

Yanditswe na IGIHE
Kuya 9 May 2022 saa 09:03
Yasuwe :

Jamad Fiin ni umukobwa w’imyaka 22 ukomoka muri Somalia ariko wavutse ndetse akurira mu Mujyi wa Boston muri Leta Zunze Ubumwe za Amerika. Akunze gutangaza benshi kubera ubuhanga afite mu mukino wa Basketball ariko akawukina bitamubujije kubahiriza amahame y’idini rye rya Islam.

Uyu mukobwa ukina buri gihe yambaye igitambaro cyo mu mutwe kimenyerewe ku bayisilamu b’igitsina gore nka ‘Hijab’ yatangiye kugira urukundo rwa Basketball akiri muto kugeza n’uyu munsi.

Avuga ko yagowe no gukura adafite umugira inama ku buryo agomba gufatanya uyu mukino n’amahame y’Idini rya Islam ridakunze kwemerera abagore n’abakobwa kugaragara mu bikorwa bimwe na bimwe birimo n’imikino.

Ibi byatumye ahitamo gukomeza gukina Basketball yambaye ‘Hijab’ kuko atashakaga guheba umukino akunda cyangwa guheba indangagaciro z’idini yakuriyemo.

Uyu mukobwa yagiye akinira amakipe y’ibigo yizeho birimo ‘Boston Latin School’ ndetse anaba Kapiteni w’Ikipe ya Basketball y’Abagore ya Emmanuel College aho yarangirije amasomo ye ya kaminuza.

Uyu mukobwa kandi ni na kapiteni w’Ikipe ya Basketball y’Abagore muri Somalia ndetse akaba yari umwe mu bari bayirimo ubwo yakinaga imikino ya FIBA yabereye Uganda na Dubai.

Jamad Fiin kuri ubu yatangije gahunda yise Jamad Basketball Camps kugira ngo afashe abana b’abakobwa cyane cyane abo muri Islam kubereka ko bashoboye ndetse ko ntacyo batageraho no muri siporo mu gihe bafite ubushake.

Mu ntego ze harimo kwereka abana b’abakobwa bo hirya no hino ku Isi ko idini cyangwa imico y’ibihugu byabo idakwiriye kubabera inzitizi zo kugera ku nzozi zabo cyangwa gukora ibyo bakunda.

Buri gihe iyo akina agaragara yambaye 'Hijab'
Jamad Fiin avuga ko yatangiye gukunda Basketball akiri muto
Yagiye akinira amakipe y'ibigo yizeho muri Leta Zunze Ubumwe za Amerika ndetse akanayabera kapiteni
Jamad Fiin akinira Ikipe y'Igihugu ya Basketball y'Abagore muri Somalia

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .