Ifoto y’Umunsi: Guverineri Kayitesi yahawe umwambaro wo mu kibuga ufite igisobanuro

Yanditswe na Prudence Kwizera
Kuya 15 Nyakanga 2020 saa 03:58
Yasuwe :
0 0

Ubwo yashyikirizwaga inshingano zo kuyobora Intara y’Amajyepfo nka Guverineri wayo mushya, Kayitesi Alice yahawe umwambaro uriho nimero gatandatu (6), umubare usobanura ko abaye uwa gatandatu uyiyoboye.

Umuhango wo gushyikiriza Kayitesi Alice inshingano zo kuyobora Intara y’Amajyepfo wabereye ku cyicaro cyayo kuri uyu wa Kabiri, uyoborwa na Minisitiri w’Ubutegetsi bw’Igihugu, Prof Shyaka Anastase.

Muri uwo muhango Kayitesi Alice yashyikirijwe igitabo cy’ihererekanyabubasha kirimo imishinga, urutonde rw’abakozi b’Intara, ibibazo binini bigomba gukurikiranwa, igitabo cya gahunda y’ibikorwa, inkoni y’ubuyobozi, n’ibindi birimo kasha n’urufunguzo rw’ibiro.

Kayitesi Alice abaye Guverineri wa gatandatu uyoboye Intara y’Amajyepfo nyuma y’abandi batanu bamubanjirije barimo Kabera Eraste, Ndayisaba Fidèle, Munyantwari Alphonse, Mureshyankwano Marie Rose na Gasana Emmanuel.

Amaze gushyikirizwa inshingano, Guverineri mushya w’Intara y’Amajyepfo, Kayitesi Alice, yavuze ko ashingiye ku bunararibonye afite azuzuza neza inshingano ahawe afatanyije n’abo bagiye gukorana.

Ati “Nshingiye ku bunararibonye nari maze kugira mu nzego z’ibanze ndabizeza ko tuzagera kuri byinshi dufatanyije byiyongera ku byo mwagezeho. Niteguye kuzakira inama zanyu n’ibitekerezo kugira ngo turusheho gukomeza guteza imbere igihugu cyacu.”

Yabasabye ubufatanye, umurava, kwihutisha akazi no gukora kinyamwuga kugira ngo bagere ku nshingano zo guhindura imibereho y’abaturage ngo irusheho kuba myiza

Minisitiri w’Ubutegetsi bw’Igihugu, Prof Shyaka Anastase, yamusabye kurangwa n’ubufatanye hamwe n’abandi bakozi kugira ngo bazagere ku nshingano zabo.

Ati “Haba mu ntara ubwayo haba hagati y’intara n’uturere, haba mu zindi nzego cyane cyane inzego z’umutekano ariko no mu bandi bafatanyabikorwa, imikorere myiza, ubufatanye, ubwumvikane, ubwuzuzanye nta kibisumba muri uru rugendo turimo rwo kubaka igihugu no guteza imbere abaturage.”

Mbere yo kugirwa Guverineri w’Intara y’Amajyepfo, Kayitesi Alice yari umuyobozi w’Akarere ka Kamony kuva mu Ugushingo 2017.

Guverineri Kayitesi yahawe umwambaro uriho umubare gatandatu (6) usobanura ko abaye uwa gatandatu uyoboye Intara y'Amajyepfo
Kayitesi Alice abaye uwa gatandatu uyoboye Intara y'Amajyepfo
Guverineri mushya w'Intara y'Amajyepfo, Kayitesi Alice

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .