Ifoto y’Umunsi: Abaturage b’i Kayonza bapfuka ihene iminwa kugira ngo zitona

Yanditswe na Hakizimana Jean Paul
Kuya 23 Mutarama 2020 saa 07:27
Yasuwe :
0 0

Abaturage bo mu Murenge wa Ndego uherereye mu Karere ka Kayonza bapfuka ihene zabo iminwa mu rwego rwo kuzirinda kona imyaka y’abaturanyi babo kuko uwo bibaye, nyirayo acibwa amafaranga ibihumbi bitanu.

Ku muntu ubibonye bwa mbere biramusetsa kuko hari ubwo uhura n’ihene zirenga icumi zambaye udupfukamunwa ariko ku baturage bahatuye barabimenyereye ngo kuko mu myaka yashize ihene zakundaga kona cyane nyirayo agacibwa amafaranga bituma biga ubu buryo.

Mukandanga Console utuye mu Kagari ka Karambi yabwiye IGIHE ati "Inaha iyo bagufashe woneshereje umuntu baguca 5000 Frw ubwo rero ayo mafaranga ntabwo wajya uyabona, benshi duhitamo kuzishyiraho agapfukamunwa tukagakuraho zigiye kurisha yasoza ukongera ukakomekaho.”

Umunyamabanga Nshingwabikorwa w’Umurenge wa Ndego, Karuranga Léon, we avuga ko iyi gahunda yashyizweho n’abaturage mu rwego rwo kwirinda ibihano.

Ati “Ni abaturage ubwabo babyikoreye kuko Umurenge wa Ndego ni uw’ubuhinzi n’ubworozi, tugira izuba ryinshi imyaka igapfa ariko wakurikirana ubworozi bw’amatungo magufi nk’ihene n’intama ugasanga akunda kwihanganira ibihe by’izuba. Kuko bazijyana guhinga zigaca hagati y’imirima bahitamo kuzambika biriya bintu bizipfuka iminwa kugira ngo zitangiriza abahinze.”

Uyu muyobozi yavuze ko ku muturage woneshereje mugenzi we hifashishwa imyanzuro y’Inama Njyanama y’Akarere ku bihano yashyizeho itungo rigufi ryonnye nk’ihene, intama ni 5000 Frw naho inka ni 10 000 Frw.

Ihene nyinshi uzisangana udupfukamunwa dutuma zitonera abaturage
Abaturage bo mu Karere ka Kayonza bapfuka ihene iminwa kugira ngo zitona
Umwanzuro wo gupfuka iminwa y'ihene ugamije kwirinda amande uwonesheje acibwa
Zishyirwaho ibice by'utujerekani ku buryo zitabasha kurya kugeza zigejewe ahabugenewe
Gufunga iminwa y'ihene ni bishya kuri bamwe ariko i Kayonza bimaze kuba umuco

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza