00:00:00 IGIHE NETWORK KN KINYARWANDA EN ENGLISH FR FRANCAIS

Abayisilamu bizihije Eid Al Adha mu byishimo (Amafoto)

Yanditswe na Thamimu Hakizimana
Kuya 9 July 2022 saa 11:05
Yasuwe :

Abayisilamu bo mu Rwanda bizihizanyije ibyishimo Umunsi Mukuru wa Eid Al Adha mu isengesho ryabahurije kuri Stade ya Kigali i Nyamirambo nk’uko bisanzwe.

Eidil-Ad’ha yizihizwa hazirikanwa igihe Aburahamu yari agiye gutamba umwana we Ismail, Imana ikamushumbusha intama.

Uyu munsi uzwi ku zina rya Ilaidi, ubanzirizwa n’isengesho rikurikirwa n’igikorwa cyo kubaga amatungo atangwamo ibitambo, agahabwa abatishoboye.

Gutamba ni inkingi ya gatatu mu zigize ukwemera kwa Islam ndetse ku munsi wa Eid Al Adha.

Abadepite 24 b’Abayisilamu baturuka mu bihugu bitandukanye bivuga Igifaransa bari mu nama y’Inteko Rusange y’Inteko zishinga amategeko zo mu bihugu byo muri Francophonie i Kigali bari bitabiriye aya masengesho.

Mufti w’u Rwanda, Sheikh Hitimana Salim, yavuze ko Eid Al Adha ari umunsi ukomeye cyane.

Ati "Ni umunsi w’ibyishimo, umunsi Intumwa y’Imana avuga ko yishimira ibiremwa byayo ikabihundagazaho imigisha."

Yongeyeho ko ari umunsi wo kwimakaza urukundo no kubaha amategeko nk’uko Aburaham yubashye Imana.

Asaba Abayisilamu bafite ubushobozi kubaga bagasangira n’inshuti n’abatishoboye ariko bubahiriza amabwiriza nyuma y’uko hagaragaye icyorezo cyibasiye amatungo.

Sheikh Musa Fazil Harerimana usigaye ari Visi Perezida w’Inteko Ishinga Amategeko Umutwe w’Abadepite, yari yitabiriye aya masengesho ari kumwe n’abadepite bitabiriye inama y’Inteko Rusange y’Inteko zishinga amategeko z’ibihugu byo muri Francophonie.

Ati “Baje mu nama y’Abadepite bo mu bihugu bivuga Igifaransa iri kubera inaha noneho bifuza ko iri sengesho ritabacika dutegura uko twasengana."

Umudepite wo muri Niger, Saley Sahadatou, yavuze ko yishimiye gusengana n’abanyarwanda isengesho rya Eid Al Adha.

Minisiteri y’Abakozi ba Leta n’Umurimo yatangaje ko mu rwego rwo kwifatanya n’Abayisilamu mu kwizihiza uyu munsi, ku wa Mbere tariki ya 11 Nyakanga 2022 ari umunsi w’ikiruhuko kuko wabaye mu mpera z’icyumweru.

Amasengesho y'uyu munsi mukuru asanzwe abera kuri Stade ya Kigali i Nyamirambo
Nyamirambo ni agace gatuwemo n'abayoboke benshi b'idini ya Islam muri Kigali
Uyu munsi buri wese aba yakoze ku mwambaro we mwiza, akajya gushimira Imana
Nta n'umwe uba wasigaye mu rugo guhera ku bakuze kugera ku bana, bose bazindukira mu masengesho
Ni umunsi w'ibyishimo muri Islam kuko wibutsa igitambo Aburahamu yahaye Imana
Baciye bugufi bumva ijambo ry'Imana ryatangiwemo ubutumwa bwo gufasha abatishoboye
Sheikh Musa Fazil Harerimana usigaye ari Visi Perezida w'Inteko Ishinga Amategeko umutwe w'Abadepite, yari yitabiriye aya masengesho
Abakuze baba bagiye gushimira Imana ku bw'ibyiza ikomeje kubakorera
Kuri uyu munsi inyigisho zitangwa ziba zigaruka cyane ku gufasha abakene n'abari mu kaga
Yacyuye urwibutso rw'uyu munsi...
Mufti w'u Rwanda, Sheikh Hitimana Salim, ubwo yageraga kuri Stade ya Kigali agiye kuyobora aya masengesho
Sheikh Hitimana yasabye Abayisilamu kurangwa n'urukundo mu buzima bwabo bwa buri munsi
Abakeneye ubufasha baba bagiye aho aya masengesho ari kubera basaba gufashwa
Ni umunsi wo kugaragariza impuhwe abatishoboye...
Bavuye mu masengesho bajya gutura igitambo gitagatifu
Hafi ya Stade ya Kigali i Nyamirambo hari hakubise hari Abayisilamu benshi bagiye mu masengesho
Haba hacuruzwa imitako n'ibindi bikoresho bikenerwa cyane n'Abayisilamu birimo nk'ingofero
Mbere yo gutaha, ababishoboye baguze ingofero zikunda kuranga Abayisilamu

Amafoto: Salomon Nezerwa


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .