Abanyarwanda barekuwe muri Uganda, Col wo muri FARDC, ikiganiro cya Gen Kabarebe…Ibyaranze icyumweru mu mafoto

Yanditswe na IGIHE
Kuya 12 Mutarama 2020 saa 07:17
Yasuwe :
0 0

Icyumweru dusoje cyihariwe n’inkuru nyinshi zirimo izitanga agahenge mu mubano w’u Rwanda na Uganda bikurikiye irekurwa ry’abanyarwanda icyenda bari bamaze imyaka igera kuri itatu bafungiwe muri Uganda aho bakorewe iyicarubozo rikomeye.

Abo banyarwanda barekuwe ku wa Kabiri n’Urukiko rwa Gisirikare ruri i Makindye nyuma y’aho Ubushinjacyaha bushyinguriye dosiye zabo.

Bagejejwe mu Rwanda mu rukerera rwo ku wa Kane bahita bajyanwa mu bitaro bya Gisirikare i Kanombe kugira ngo bitabweho.

Mu bindi byagarutsweho ni ikiganiro cya Minisitiri w’Ububanyi n’Amahanga, Dr Vincent Biruta, waganiriye n’itangazamakuru ku nshuro ya mbere kuva mu Ugushyingo yashyirwa muri uyu mwanya.

Umujyanama wa Perezida Kagame mu by’umutekano, Gen James Kabarebe nawe yagaragaye mu itangazamakuru avuga ku rugamba rwo kubohora igihugu, ku ruhare rw’Ingabo za RPA mu kubaka igihugu n’ibindi biganisha ku gukunda igihugu. Yabivugiye mu Karere ka Nyanza ahari kubera itorero ry’abarimu bigisha amateka.

Mu bindi byavuzwe cyane mu itangazamakuru ni Colonel Michel Rukunda uzwi nka Makanika mu ngabo za RDC, watorotse igisirikare akajya kuyobora umutwe wa Gumino ukorera mu bice bya Uvira na Fizi, mu Ntara ya Kivu y’Amajyepfo.

Umutwe wa Gumino wagarutsweho cyane muri Raporo y’Impuguke z’Umuryango w’Abibumbye mu mpera za 2018 no mu buhamya bw’abari abarwanyi ba P5 iyoborwa na Kayumba Nyamwasa, ubu bafungiwe mu Rwanda bashinjwa ibyaha birimo kwinjira mu mutwe w’ingabo utemewe no kugirana umubano na Leta y’amahanga bigamije gushoza intambara.

Colonel Michel Rukunda yatorotse igisirikare cya RDC ajya mu mutwe witwaje intwaro ukorana na Kayumba Nyamwasa
Abanyarwanda icyenda barekuwe na Uganda, ubwo bari kuri Minisiteri y'Ububanyi n'Amahanga ngo bashyikirizwe u Rwanda ku wa 08 Mutarama 2020
Mu rukerera rwo ku wa Kane abanyarwanda icyenda barekuwe n’Urukiko rwa Gisirikare muri Uganda bagejejwe mu gihugu n'abayobozi ba Uganda bayobowe na Komiseri w'Agateganyo ukuriye urwego rushinzwe igenzura n'iyubahirizwa ry'amategeko
Minisitiri w’Ububanyi n’Amahanga, Dr Vincent Biruta na Minisitiri w’Ubuzima, Dr Diane Gashumba ubwo basuraga abanyarwanda icyenda barekuwe na Uganda aho bari kwitabwaho mu Bitaro bya Gisirikare i Kanombe nyuma y’imyaka bari mu buzima bushaririye
Minisitiri w’Ububanyi n’Amahanga, Dr Vincent Biruta, yagiranye ikiganiro cya mbere n’itangazamakuru kuva mu Ugushyingo 2019 ubwo yashyirwaga kuri uyu mwanya
RITCO yamuritse imodoka 50 nshya igiye kuzajya yifashisha mu ngendo mu bice bitandukanye by’igihugu aho yatangaje ko izatwara nibura abagenzi miliyoni 3,5 mu mwaka
Umujyanama wa Perezida Kagame mu by’umutekano, Gen Kabarebe James, yahaye impanuro abarimu bari mu itorero mu Ntara y’Amajyepfo
Etincelles FC yahanishijwe gukina umukino umwe nta mufana uri ku kibuga bitewe n’imyitwarire y’abafana bayo batutse abasifuzi ku mukino wayihuje na Marines FC.
Minisitiri w’Intebe, Dr Edouard Ngirente, yasuye ibikorwa bitandukanye mu Ntara y’Uburasirazuba
Rayon Sports yananiwe gutsinda AS Kigali kugira ngo igume mu rugamba rwo gushaka igikombe cya shampiyona
Abayobozi batandukanye bitabiriye amasengesho yo gusengera igihugu yabaye kuri iki Cyumweru
Ibyishimo byari byose ku bakobwa 15 bakomeje mu cyiciro gikurikiraho muri Miss Rwanda i Kayonza
APR FC yatsinze Bugesera FC ikomeza kujya ku mwanya wa mbere irusha Rayon Sports amanota atandatu
Ibikorwa byo gukangurira abantu kwirinda impanuka zo mu muhanda byakomereje mu Kiliziya no mu nsengero aho abapolisi batangiye ubutumwa kuri iki Cyumweru tariki ya 12 Mutarama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .