00:00:00 IGIHE NETWORK KN KINYARWANDA EN ENGLISH FR FRANCAIS

Imvano ya Stafford Coffee Shop yazamuye igikundiro cy’ikawa ku Kamonyi: Ikiganiro na Rubagumya (Video)

Yanditswe na Mukahirwa Diane
Kuya 19 April 2022 saa 03:40
Yasuwe :

Maze imyaka 10 nkoresha umuhanda wa Kigali-Huye mu rugendo rugana i Rusizi; uru ni urugendo runini rusaba urukora kwitwaza impamba imufasha kurusoza amahoro.

Mbere umuntu wahagurukiraga i Kigali saa Moya z’igitondo yabonaga icyo gushyira mu nda nyuma y’amasaha atatu ageze i Nyanza ahazwi nko kwa Hadji, mu ntera itari nto ku muntu watangiye urugendo adakoze ku munwa.

Mu mpera za 2020 nahagurutse i Kigali nk’ibisanzwe ariko ngeze ku Kamonyi abo twari kumwe bati ‘reka dufate ikawa hano i Musambira’. Icyo gihe twahingukiye ahitwa ‘Stafford Coffee Shop’ batwakirana urugwiro.

Mu minota itarenze 15 twari twamaze kubona ibyo kurya no kunywa dukomeza urugendo rwacu. Mu nshuro zose nanyuze muri uyu muhanda iyi iri mu zanshimishije kuko nabonye ahari ikindi gisubizo ku bagenzi bawukoresha.

Nyuma y’imyaka igera kuri ibiri, Stafford Coffee Shop iherereye i Musambira imaze kubaka ubudahangarwa. Ku bakoresha uyu muhanda habaye nk’icyapa abagenzi bahagararaho bagafata ibyo kurya no kunywa.

Aha hantu hafite umwihariko ku bucuruzi bw’ikawa, ni ishoramari rya Rubagumya Stafford. Igitekerezo cyo kuritangiza gishamikiye ku ngendo yakoreraga mu ntara, agasanga ko atabasha kubona aho kuruhukira mu nzira.

Mu kiganiro cyihariye na IGIHE, Rubagumya yavuze ko yashinze ’Coffee Shop’ ku Kamonyi nyuma yo kubona ko muri iyi nzira abanyuramo badafite ahantu ho kuruhukira no gufatira amafunguro.

Yagize ati “Iki ni igitekerezo nari maranye igihe kinini cyane kuko mbere y’uko nkora ubu bucuruzi nanjye nari mu kigo cyakoraga ubucuruzi bw’ikawa cyane iyoherezwa hanze.”

“Nakoraga ingendo nyinshi cyane muri iyi mihanda ihuza Kigali n’intara ariko naje kubona ko harimo ikibazo cy’uko umuntu agenda urugendo rurerure ntabashe kubona ahantu agura ikawa cyangwa ikintu cyo kurya cyangwa ahantu yabona ubwiherero bwiza busukuye kugira ngo abashe gukomeza urugendo rwe.”

Yakomeje avuga ko ikindi cyamutije imbaraga ari uko yabonaga igihugu cyarashyize imbaraga mu bukerarugendo, na we yifuza kubwunganira no gushyigikira gahunda yo guteza imbere ibyaro.

Ati “Igice cy’ubukerarugendo kirimo kiratera imbere cyane ariko ntabwo gifite izindi serivisi zicyunganira mu nzira. Ikindi ni mu rwego rwo guteza imbere icyaro tumenyereye ko ibyiza byose bijya mu mijyi coffee shops nziza na hoteli biri mu mujyi yaba iyunganira Kigali cyangwa Kigali ubwayo.”

Yakomeje ati “Kuzana igikorwa nk’iki hano ni urwego rwo kongera guteza imbere icyaro, tukavuga ngo ntabwo ibyiza byose byaguma i Kigali kandi umuntu uvuye mu mijyi minini aba akeneye kugira ibindi bintu abona.”

Stafford Coffee Shop imaze kumenyerwa cyane mu gutanga serivisi ku bantu bakoresha imodoka bwite, z’abantu ku giti cyabo. Kuri ubu abakoresha imodoka rusange batangiye kubaza uko iyi serivisi yabagezwaho.

Rubagumya yavuze ko yifuje gukora ubucuruzi bwakira abantu bake bakabasha kubona serivisi yihuse, ariyo mpamvu batakira abagenzi bakoresha imodoka rusange.

Ati “Ubucuruzi twakoze bwarebaga abagenda mu modoka zabo n’abakerarugendo. Iyo tuza kongeraho n’abagenzi bifashisha imodoka rusange ntitwari kubasha gutanga serivisi dushaka.”

“Umuntu uje aha ntabwo aba afite iminota irenga 15, imodoka rusange iba ifite abantu 30 bose hari igihe baba bakeneye kurya no kunywa ugasanga hari aho serivisi igiye gupfira. Byabaye ko dufata igice kimwe cy’abakiliya kugira ngo dutange serivisi neza mu gihe gito cyane gishoboka n’abatugannye babone ibyo bifuza.”

  Inyungu ku baturage b’i Musambira

Iyo ishoramari rigeze ahantu, rihindura imibereho y’abantu batandukanye, by’umwihariko rigirira umumaro abaturage baturiye aho riri bitewe n’ibikorwa byabegerejwe.

Abaturage bo mu Murenge wa Musambira aho Stafford Coffee Shop iherereye, hari inyungu zitandukanye batangiye kuyisaruramo nko kubona imirimo n’ibindi bizabafasha mu iterambere.

Rubagumya yavuze ko 60% by’abakozi akoresha ari abaturuka i Musambira kandi batangiye kwiteza imbere.

Yagize ati “Ibyo dukoresha byose hano yaba ibyo kurya n’ibindi bikoresho tubigura mu baturage b’inaha. Twatanze n’akazi kuko hafi 60% y’abakozi bakora aha ni urubyiruko rukomoka hano, barimo abatunze imiryango yabo n’abitunze ubwabo.”

  Coffee boxes, igisubizo ku giciro gihanitse cy’ikawa

Iyo uzengurutse mu nyubako zicururizwamo ikawa [Coffee shops] i Kigali n’ahandi, usanga itasi imwe igura guhera ku 2500 Frw nyamara ipaki y’ikilo igura guhera ku 4000 Frw ishobora kuvamo udukombe twinshi.

Iki ni ikibazo abantu benshi bahora bibaza impamvu ikawa itetse ihenze cyane ku isoko ry’u Rwanda kurusha no hanze aho yoherezwa.

Rubagumya amaze imyaka irenga 14 akora mu bijyanye n’ikawa kuko yabanje gukora mu kigo cyayitunganyaga kikayohereza mu mahanga. Iyi myaka yose yasobanukiwe neza n’ibijyanye n’iki gihingwa.

Muri icyo gihe yakozweho n’uburyo hari Abanyarwanda batanywa ikawa kandi ari bo bayihinga, aza gusanga ahanini biterwa n’igiciro gihanitse gituma itigonderwa na buri wese.

Mu 2019 yifuje kugira umusanzu atanga watuma umubare w’abanywa ikawa mu Rwanda wiyongera, ubu uri kuri 3%. Ni bwo yagize igitekerezo cyo kubaka ‘Coffee boxes’ iri ku butaka buto ikoramo abakozi babiri icuruza ikawa ku giciro kiri hasi.

Yageragereje uyu mushinga mu isoko rya Kimironko abona ko bishoboka ahita awagurira n’ahandi nko muri Kaminuza ya Kigali na UTB ahacururizwa ikawa iri ku giciro cya 500 Frw na 1000 Frw.

Rubagumya yagize ati “Uburyo bwa Coffee Boxes nabutangiye mu 2019 ngamije gushishikariza Abanyarwanda kunywa ikawa. Dutanga ikawa ihendutse abantu bose bakisangamo, imwe umumotari, utwara taxi, ucuruza inite babasha kwigurira.”

“Ikindi kwari ugukemura uburyo abantu bayibona bakabasha kuyigeraho mu buryo bwihuse, nk’aho iminota myinshi umuntu ahamara ni itanu ariko kuri Coffee Shop ntabwo ijya munsi ya 15.”

Ikawa ni igihingwa gifite icyo gisobanuye mu bukungu bw’u Rwanda no mu buhinzi muri rusange, mu 2020/2021 NAEB yatangaje ko iyoherejwe mu mahanga ingana na toni zirenga ibihumbi 16 yinjije arenga miliyoni 61$.

Ibi ni byo kwishimirwa ariko abahinzi bayo n’abaturarwanda muri rusange bameze nka wa mubumbyi urira mu rujyo kuko baheruka bahinga inyinshi ikoherezwa mu mahanga abari mu gihugu bagakoresha 3% k’iyeze.

Rubagumya yavuze ko kimwe mu byatumye atangira gucuruza ikawa ku giciro gito ari uko yifuza kubona umubare munini w’Abanyarwanda bayinywa bakareka kuyifata nk’iyagenewe abanyamahanga kandi aribo bayihinga.

Ati “Nazanye ubu buryo mfatanyije na NAEB kugira ngo twongere umubare byibuze tuve kuri 3% tugere kuri 15% mu gihe cy’imyaka itanu cyangwa irindwi.”

Yakomeje avuga ko ikindi cyatumye abishyiramo imbaraga ari uko yumvaga hibazwa icyakorwa ngo Abanyarwanda banywe ikawa, bituma yumva yaba umwe mu batanga igisubizo.

Ati “Mu 2016 mu nama ya AGRA Perezida Kagame yigeze kubibaza ati ‘Kuki Afurika cyangwa u Rwanda dutunganya ikawa umuhinzi aruha ahinga ikawa, igatunganwa igasohoka mu gihugu igahabwa umugisha ikagaruka ikaza igiciro cyikubye inshuro nyinshi? Kuki twebwe tutabasha kwitunganyiriza umusaruro tukawujyana utunganyijwe cyangwa tukawinywera?’’

Yakomeje ati “Yarongeye abisubiramo mu 2017 ari mu Bufaransa ibyo byose ni byo nagiye mpuza, ndavuga ngo nk’umuntu umaze imyaka 14 mu ikawa ngomba kugira ikintu nkora gikemura kino kibazo.”

Yaboneyeho umwanya wo gusaba abashoramari bari mu ruhererekane rw’ubuhinzi bw’ikawa gushishikarira kwita ku kintu icyo aricyo cyose cyatuma abahinzi n’abaturage muri rusange bayinywa.

Stafford Coffee Shop kugeza ubu ifite iguriro rinini riherereye mu Karere ka Kamonyi na coffee boxes ziri mu Mujyi wa Kigali. Muri rusange iri shoramari rimaze gutanga akazi ku bakozi 45 muri bo batandatu bafite ubumuga bwo kutumva no kutavuga.

Iri guriro riherereye ku Kamonyi mu Murenge wa Musambira
Coffee box zifasha buri muntu wese kwigurira ikawa ku giciro gihendutse
Abagenda umuhanda Kigali-Huye bashyiriweho aho bashobora kunywera ikawa
Ubu ni bumwe mu buryo buzatuma abantu bakangukira kunywa ikawa
Rubagumya yifuza ko buri munyarwanda wese yabasha kwigurira ikawa
Rubagumya Stafford yashinze iguriro ry'ikawa ku Kamonyi kuko yabonaga muri uyu muhanda ntaho abawunyuramo baruhukira
Rubagumya afite gahunda yagutse izatuma n'abahinzi babasha kunywa ikawa
Kuri Stafford Coffee shop haboneka amafunguro yo mu bwoko butandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .