00:00:00 IGIHE NETWORK KN KINYARWANDA EN ENGLISH FR FRANCAIS

Rodriguez yashinjwe kwihenura ku muryango we nyuma yo kumenyana na Cristiano Ronaldo

Yanditswe na Bukuru JC
Kuya 23 January 2022 saa 08:36
Yasuwe :

Mu gihe filime mbarankuru igaruka ku buzima bw’umukunzi wa Cristiano Ronaldo, Georgina Rodriguez, izajya hanze mu cyumweru gitaha, nyirarume yavuze ko kuva amenyanye n’uyu mukinnyi wa Manchester United yabirengagije kandi ari bo bamufashije ubwo se yari amaze gufungwa.

Ku wa 27 Mutarama ni bwo biteganyijwe ko filime mbarankuru yakozwe na Netflix kuri Georgina Rodriguez izajya hanze, ikazagaruka ku buzima bwe mbere y’uko ahura na Cristiano Ronaldo n’uburyo abayeho muri iyi minsi.

Muri iyi filime izajya hanze ku wa Kane, Georgina avuga ko atazibagirwa umuryango yavuyemo mbere y’uko ahura na Cristiano Ronaldo w’imyaka 36, kuri ubu ubarirwa umutungo wa miliyoni 790£.

Nubwo uyu mugore uzuzuza imyaka 28 ku wa Gatanu avuga gutyo, bamwe mu bo mu muryango we bavuga ko yabatereranye nyuma yo guhura na Ronaldo ndetse bakanabyarana.

Nyirarume wa Georgina, Jesus Hernandez, yavuze ko yabahamagaye inshuro zitarenze ebyiri kuva ahuye na Cristiano Ronaldo kandi ari we wamureze ubwo se yari amaze gufungirwa gucuruza ibiyobyabwenge.

Ati “Ashobora kuba yumva afite isoni urebye uburyo ameze neza kandi tukaba tutaba hamwe na we. Ntacyo nigeze musaba. Yaduhamagaye inshuro imwe cyangwa ebyiri kuva menye ko ahura na Cristiano Ronaldo.”

Patricia Rodriguez wareranywe na Georgina ndetse akaba afite imyaka 33, yavuze ko uyu mukunzi wa Cristiano Ronaldo atita ku muryango wamureze.

Ati “Ubwo umuhungu wanjye yari afite isabukuru y’amavuko, namusabye ko yambwirira Cristiano Ronaldo agasinya ku mwambaro w’umuhungu wanjye aravuga ngo ‘oya’. Yavuze ko atamubangamira kandi ari mu biruhuko.”

Abo muri uyu muryango bavuze kandi ko nyirakuru wa Georgina yapfuye mu myaka itatu ishize afite myaka 80, ariko atigeze yerekwa umwuzukuru we Alana Martina.

Georgina yabayeho mu buzima bukomeye akiri muto, aho yakuriye mu Mujyi wa Jaca uri mu Majyaruguru y’uburasirazuba bwa Espagne.

Nyina ukomoka muri Espagne, Ana Maria Hernandez, yahuye na se ukomoka muri Argentine, Jorge, ubwo uyu mugabo yari ageze i Burayi.

Jorge yafunzwe mbere y’uko Georgina yuzuza imyaka itanu nyuma yo gufatanwa ibiyobyabwenge by’ibihumbi 100£ abikuye muri Espagne.

Nyuma yaho, Georgina yabaye umubyinnyi mu itorero, yiga Icyongereza i Londres, aba umunyamideli mbere yo gusubira muri Espagne agakora mu iduka rya Gucci aho yahuriye na Cristiano Ronaldo wakiniraga Real Madrid icyo gihe.

Georgina Rodriguez yashinjwe kwirengagiza umuryango wamureze ubwo se yari amaze gufungwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .