Tinder, isoko y’ibyishimo ku bakundana bahuriye kuri internet mu Rwanda

Yanditswe na Uwiduhaye Theos
Kuya 2 Ukuboza 2020 saa 08:02
Yasuwe :
0 0

Hashize imyaka isaga 14 imbuga nkoranyambaga nka Facebook n’izindi zitandukanye zishinzwe ndetse zigafasha benshi, kumenyana no kuganira batiriwe bahura.

Mu myaka ya 2010 kuzamura nibwo abantu benshi batangiye gushamadukira gukoresha cyane imbuga nk’izi ndetse hari hamaze kuvuka izindi nyinshi nka WhatsApp.

Izi mbuga zose zafashaga abantu kuvugana no kohererezanya amashusho, amafoto n’amajwi mu buryo bworoshye ku buryo nta wari ukigira ikibazo cyo gukumbura uwe uri ibwotamasimbi.

Mu 2012 hatangijwe urubuga rutandukanye n’izindi zari zisanzwe, ubu ruzwi nka ‘Tinder’. Uru rubuga rwo muri Leta Zunze Ubumwe za Amerika, rwatangijwe hagamijwe guhuza abantu bagamije gukundana.

Sean Rad uri mu barutangije yashakaga ko bakora urubuga aho umuntu azajya arujyaho azi ko nta kindi kimuzanye ari ugushaka umuntu bahamenyanira, bagakundana.

Icyo gihe yavugaga ko ‘uko waba uri kose, byakorohera kuvugisha umuntu mu gihe uzi ko aho umusanze icyo ushaka aricyo kihamugenza’.

Rad yavuze kandi ko Tinder igamije kuziba icyuho cyabonekaga ku mbuga nkoranyambaga cy’uko n’ubundi abahahuriraga babaga basanzwe baziranye aho guhura n’abandi bashya batazi.

Uru rubuga rutangira byasabaga ko ugiye kurwiyandikishaho ari mushya, yifashisha urukuta rwe rwa Facebook, kugira ngo byizerwe ko nibura yaba umuntu nyawe atahinduranyije imyirondoro ye cyangwa se abo bita mu Cyongereza ‘catfish’.

Nyuma biza gukurwaho umuntu akajya yiyandikishaho akoresheje nimero za telefoni cyangwa e-mail.

Umuntu wiyandikisha agaragaza amazina ye, imyaka, aho aherereye, aho yize n’amafoto ye. Ndetse akavuga igitsina yifuza nacyo urugwiro, niba ari gore cyangwa gabo, cyangwa se akavuga byose.

Hari ugaragaraza ko yaje akeneye umukunzi, undi akaba yavuga ko atari cyo cyamuzanye ahubwo ashaka kwishimisha gusa.

Mu 2016 Tinder yatangije urundi rubuga ruyishamikiyeho, rwitwa Hey! Vina rugamije guhuza igitsinagore gusa.

Tinder yagiye itangiza ubundi buryo nk’uwo yamuritse ku wa 21 Kanama 2018, bwa Tinder University, bugamije guhuza abanyeshuri kuri kaminuza zabo cyangwa izindi zituranye naho biga.

Uru rubuga rufite abantu barukoresha bishyura n’abandi barwifashisha ku buntu. Mu mpera za 2019, rwinjije miliyoni 1.5 y’amadorali ruba urubuga rwa mbere rutajyanye n’iby’imikino rwinjije agatubutse.

Mu rwego rwo gukomeza guhangana n’abantu bajya kuri uru rubuga bakiyoberanya, Tinder muri Mutarama uyu mwaka yashyizeho uburyo bwo kurwanya abiyoberanya bagakoresha imyirondoro mihimbano. Ubu buryo bwise panic button ntabwo bukoreshwa mu bihugu byose ariko barateganya kuhabugeza.

Ikindi buzaba bugamije gufasha abantu bagiye guhura ku buryo nta wagirira nabi mugenzi we. Mbere yo kujya guhura kandi abantu bazajya basabwa gufata amafoto ya ‘selfie’ mu buryo bwo kwerekana ko ayo basanzwe barashyize kuri uru rubuga asa nk’ayabo asanzwe.

-  Tinder mu Rwanda ikoreshwa na benshi

N’ubwo uru rubuga rwatangijwe hagamijwe guhuza cyane cyane abantu bakeneye gukundana, byaje kurenga igaruriro ku buryo ahubwo rwahindutse ahantu ho kugurira ‘indaya’.

Uru rubuga rumaze igihe kinini ruzwi mu Rwanda ndetse rwarayobotswe ku buryo indaya z’insirimu, zitakibangamirwa no kujya ‘gutega’ nk’uko bakunze kubivuga.

Ahubwo zijya kuri uru rubuga zikareba abagabo bari mu gace zirimo ubundi bakavugana ku buryo, bemeranya aho bahurira n’igiciro, ubundi bakabonana bagakora ibyabo bakikomereza.

Hari abajya batebya bati ‘menye ko umukunzi aba kuri Tinder, nahita menya ko nta mukunzi mfite!’

Abagabo benshi baje mu biruhuko bifashisha uru rubuga mu gushakisha abakobwa bo mu Rwanda, bazafatanya kurya ifaranga bavanye iwabo. No ku bagore bamwe bakuze bo hanze y’u Rwanda iyo bahaje ni uko babigenza.

Kugeza ubu, abantu miliyoni esheshatu ni bo bakoresha urubuga nkoranyambaga rwa Tinder ku Isi yose.

Abasore b'ibigango bakurura abakobwa ubasanga kuri uru rubuga nkoranyambaga
Benshi usanga barashyizeho imyirondoro yabo ku buryo umuntu wamukunze ahita atangira kumuvugisha bakaba inshuti gutyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .