Niyomukesha ukinira ikipe y’Igihugu ya Volleyball yasezeranye na Team Manager wa UTB VC (Amafoto)

Yanditswe na Eric Tony Ukurikiyimfura
Kuya 5 Werurwe 2021 saa 09:15
Yasuwe :
0 0

Niyomukesha Euphrance ukinira Ikipe y’Igihugu ya Volleyball na RRA VC, yasezeranye imbere y’amategeko n’Umuyobozi ushinzwe ubuzima bwa buri munsi bwa UTB VC, Mucyo Philbert, bamaze imyaka ine bakundana.

Mucyo Philbert na Niyomukesha basezeranye ku wa Kane mu Murenge wa Niboyi mu Karere ka Kicukiro.

Muri Kanama 2020 ni bwo Mucyo yateye ivi asaba Niyomukesha ko azamubera umugore. Bombi bazasezerana imbere y’Imana ku wa 12 Werurwe 2021 muri EAR Remera ku Giporoso.

Mu mwaka ushize, Mucyo Philbert yabwiye IGIHE ko hashize igihe azi Niyomukesha ndetse ngo yatangiye kumukunda ubwo yakiniriraga ikipe y’Igihugu.

Ati “Namumenye kuva kera, ndamukunda ubwo yari mu ikipe y’Igihugu muri 2016. Gusa muri 2013 najyaga njya iwabo gusura abaturanyi nibwo namumenye.”

“Mu 2017 nibwo nafashe icyemezo cyo kumumenyesha ko mukunda, mbigeraho mu 2018. Namaze nk’imyaka itanu mwigaho, mureba. Nyuma narabimubwiye, arambwira ngo niba nkomeje arabyemeye.”

Mucyo yakomeje avuga ko mu byatumye arushaho gukunda Niyomukesha Euphrance harimo kuba bombi bahuriye ku gukunda siporo kandi akaba ari umukobwa ufite uburere.

Ati “Ikintu cya mbere cyatumye mukunda ni uko yari umu-sportif kandi nanjye ndi we, icya kabiri kandi ni uko ari umukobwa usenga ufite uburere. Nari naramwize neza mbibona. Twatangiye afite isoni nyinshi atabyumva, ariko ubu nta kibazo kandi twiteguye kubana.”

Niyomukesha Euphrance yatangiye urugendo rwe rwo gukina Volleyball ubwo yajyaga kwiga muri St Aloys i Rwamagana muri 2009, akaba ari nabwo yahamagawe bwa mbere mu ikipe y’Igihugu y’abato batarengeje imyaka 18, yitatabiriye imikino yabere i Cairo mu Misiri muri 2010.

Kuva icyo gihe yakomeje kwitwara neza ari nako ahamagarwa mu ikipe y’Igihugu kugeza magingo aya.

Mu 2012, ubwo yari asoje icyiciro kibanza cy’amashuri yisumbuye, Niyomukesha yahise yerekeza muri RRA VC agikinira kugeza uyu munsi.

Mucyo Philbert arahira imbere y'amategeko kuzabana na Niyomukesha
Niyomukesha ukinira ikipe y’Igihugu ya Volleyball, na we yemeye kuzabana akaramata na Mucyo Philbert
Bombi basinyiye isezerano bakoze
Mucyo Philbert na Niyomukesha Euphrance bamaze imyaka ine bakundana
Niyomukesha na Mucyo Philbert bifotoza nyuma yo gusezerana mu murenge

Amafoto: UTB


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .