00:00:00 IGIHE NETWORK KN KINYARWANDA EN ENGLISH FR FRANCAIS

Mauro Icardi n’umugore we bizihirije isabukuru y’imyaka 8 y’urushako mu Rwanda (Amafoto)

Yanditswe na Israel Ishimwe
Kuya 30 May 2022 saa 02:32
Yasuwe :

Umunya-Argentine Mauro Icardi ukinira Paris Saint Germain yo mu Bufaransa n’umugore we Wanda Nara bizihirije mu Rwanda isabukuru y’imyaka umunani bamaze mu rushako.

Amafoto yashyizwe ku rukuta rwa Instagram rwa Wanda Nara agaragaza ko we n’umugabo we basuye ibice bitandukanye by’igihugu.

Ikinyamakuru Clarín cyo muri Argentine cyatangaje ko Umukinnyi wa Sinema Wanda Nara w’imyaka 35 yasabye umugabo we Mauro Icardi kumutembereza mu Rwanda mu gihe bizihiza isabukuru y’ugushyingiranwa kwabo.

Mauro Icardi na Wanda Nara basohokeye mu Rwanda nyuma y’urugendo rwp kwiyunga kuko mu 2021 havugwaga urunturuntu mu mubano wabo.

Amakuru yavugaga ko Icardi aca inyuma umugore we, ndetse byatumye afata icyemezo cyo kuva i Paris ajya iwabo mu Mujyi wa Milan.

Isabukuru yo gushyingiranwa kwa Icardi na Wanda bayizihije ku wa 27 Gicurasi cyane ko ari wo munsi barushinzeho mu 2014.

Muri icyo gihe, Wanda yari atwite Francesca Icardi Nara waje kuvuka ku wa 19 Mutarama 2021. Mu Ugushyingo k’umwaka wakurikiyeho, yibarutse Isabella Icardi. Ni bo bana bombi bafitanye.

Mu butumwa yanyujije ku mbuga nkoranyambaga, Icardi yagaragaje amarangamutima yatewe no kwizihiza umunsi wo gushyingirwa kwe.

Ati “Isabukuru nziza kuri twe. Uyu munsi ni umunsi wacu, ku wa 27 Gicurasi. Imyaka umunani irashize ndi kumwe na @wanda_nara. Ndagukunda.’’

Wanda na Mauro bageze mu Rwanda mu rugendo rwanyuze no mu bindi bihugu bitandukanye; bakoresheje kajugujugu yabo.

Wanda na we abinyujije kuri Instagram ye yabwiye abasaga miliyoni 12,6 bamukurikira ko ku masabukuru ye akunda gutembera cyane.

Ati “Impano nkunda cyane ni ugutembera.’’

Yakomeje avuga ko urugendo rwe i Roma-Qatar; Qatar-Kigali; Kigali-Rwanda rwari rugoye ariko ‘rushimishije.’

Mu gihe bamaze mu Rwanda, Wanda na Mauro basuye ibice bitandukanye bitatse ibyiza nyaburanga mu gihugu. Ntabwo hatangajwe igihe bahagereye n’umunsi bahaviriye.

Banasuye Urwibutso rwa Jenoside rwa Kigali ruri ku Gisozi, bunamira inzirakarengane za Jenoside yakorewe Abatutsi, banashyira indabo ku mva baruhukiyemo.

Mauro Icardi w’imyaka 29 yasezeranye kubana na Wanda Nara ufite imyaka 35 mu 2014. Uyu mugore yari amaze gutandukana na Maxi López babanye mu 2008-2013, bakabyarana abana batatu barimo Valentino Gastón López Nara, Constantino López na Benedicto López.

Wanda yatangaje ko u Rwanda ari cyo gihugu cya mbere azasura mu gihe azamara mu biruhuko. Ibitangazamakuru byo muri Argentine byanditse ko ashobora kuba yararukomereje i Nairobi muri Kenya.

Rutahizamu Mauro Icardi yasuye u Rwanda nyuma y’uko bagenzi be Sergio Ramos, Keylor Navas, Julian Draxler na Thilo Kehrer bakinana muri Paris Saint Germain [PSG] na bo baheruka kurugiriramo ibihe byiza.

Aba bakinnyi bageze i Kigali ku wa 30 Mata 2022; mu minsi bahamaze basuye ibice birimo Pariki y’Igihugu y’Akagera; iy’Igihugu y’Ibirunga n’Urwibutso rwa Jenoside rwa Kigali.

PSG ni imwe mu makipe afitanye amasezerano n’Urwego rw’Igihugu rw’Iterambere (RDB) yo kwamamaza u Rwanda binyuze muri gahunda ya ‘Visit Rwanda’.

Mauro Icardi n’umugore we bizihirije isabukuru y’imyaka umunani y’urushako mu Rwanda
Mauro Icardi n'umugore we Wanda Nara bari mu bihe byiza by'urukundo nyuma y'imyaka umunani barushinze
Mauro Emanuel Icardi ni Umunya-Argentine ukina ataha izamu muri Paris Saint Germain ikina muri Shampiyona y'u Bufaransa, Ligue 1
Mauro Icardi ubwo yakandagiraga ku butaka bwo mu Rwanda, yahageze ari muri kajugujugu
Mu rugendo rwabo banyuze mu mijyi yo mu bihugu bitandukanye
Mauro Icardi yasuye u Rwanda mu rugendo yizihirijemo isabukuru y'imyaka umunani amaze arushinze
Mauro Icardi yasuye Urwibutso rwa Jenoside rwa Kigali ruri ku Gisozi, asobanurirwa amateka yagejeje kuri Jenoside yahitanye ubuzima bw'inzirakarengane zirenga miliyoni mu mezi atatu
Wanda Nara yasuye Urwibutso rwa Kigali ku Gisozi aho yunamiye inzirakarengane zirenga ibihumbi 250 zirushyinguyemo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .