Inkuru y’urukundo: Namucaga iryera ancika

Yanditswe na Mukarugira Yuliyana
Kuya 13 Gashyantare 2020 saa 02:11
Yasuwe :
0 0

Maze kuba akangavu nagiye mu misa ya Noheli. Ni uko nyura iwabo wa Yudita twiganaga ngo dufatanye urugendo kuko Paruwase yacu yari kure. Nasanze yiteguye kujyana na basaza be babiri bigaga mu mashuri makuru.

Mu nzira, Kayitare wari mukuru agenda biguruntege. Yageze aho aratubwira ati “hagize umbwira kwisubirira mu rugo nagenda”. Sinamenya niba atebya cyangwa avuga ukuri. Ariko turakomeza, ndetse turihuta ngo tudasanga misa irangiye, kuyikererwa byo byari byashyitse. Agenda adusetsa inzira yose, maze ibitwenge no kwihuta bituma tugera ku kiliziya twahumagiye. Ni nk’aho ntayumvise. Nibukaga bya biparu ngasekera mu bipfunsi nkifuza ko dusohoka maze inkwenene nkayivaho.

Misa ihumuje turataha, byongera kugenda kwa kundi. Uwo musore yarashyengaga! Kandi ariko nari nanamubengutswe. Umubiri unoze utemba itoto, amenyo yera yegeranye n’umusatsi w’irende rikomeye yogosheshaga agasiga mwinshi mu gitwariro. Nari nishimiye ko turi kumwe, ndetse nari nibagiwe abavandimwe be. Nifuzaga kuzandikirana na we ariko nkabyirukana vuba. Yarandutaga, yiga mu mashuri makuru njye nsibira mu wa gatandatu. Ya maboko atareshya se?

Tugera mu by’iwacu; dutandukanye ndababara. Yemwe ngerageza no kwibuka imyiteguro tumaranye iminsi mu rugo ariko biranga numva ntakiri bundyohere kindi.

Barumuna banjye ntibatinda kubona ko nahindutse, barankera bati “umenya hari uwamukubitiye mu nzira”.

Umunsi mukuru urarangira, iminsi isanzwe irakomeza, inyibagiza ibya wa umusore. Umwaka w’amashuri ushira ntsindiye ayisumbuye. Njyanayo na Yudita. Yari amahirwe, agahinda ko gukumbura iwacu twaragasangiraga.

Kayitare wari utangiye kaminuza akajya amwandikira ngo akantashya. Gusa ibyo kuri Noheli byari byarabaye akahise. Ndetse n’abandi bahungu bari batangiye kunshakaho ubucuti ariko ntawe nemerera, kwanga kumutesha umwanya wo kwiga nanjye ntiretse.

Igihembwe cya kabiri gishira, Yudita abona ibaruwa ya Kayitare. Yarimo igika cyanjye nagombaga gusoma. Nta gihambaye cyari cyanditsemo. Kwari ukunsuhuza, kuntashya no kunshimira uburyo mfasha mushiki we narushaga umwaka umwe gusa. Ni koko nafataga Yudita nka murumuna wanjye, nkamukangurira kwiga, ngashaka icyadufasha gutsinda twembi. Maze gusoma numva biranejeje.

Mara iminsi nkirigitwa no kumusubiza ariko nkagira isoni, nkumva ntazabona icyo mubwira. Nyuma y’icyumweru nibwo nafunze umwuka mfata urupapuro. Mvuga iby’imvura n’umuyaga n’ibindi bitampaye agaciro. Ariko mubwira ko ibyo nkorera Yudita atagomba kubinshimira kuko ari umwana mfata nk’aho tuva inda imwe [...] Ibaruwa iragenda ariko ntegereza igisubizo sinakibona ndetse ngira n’ikimwaro kivanze no kwicuza.

Mu gihemwe cya gatatu Yudita ambwira ko Kayitare azaza kumusura. Ngira isoni zo kuzahuza amaso na we mubwira ko njye nzajya kureba abakobwa bo mu kigo cyacu bari mu irushanwa ry’umupira w’intoki. Ubwo nizeraga ko azasanga ntahari agataha tutabonanye.

Siko byagenze. Nagarutse saa kumi n’imwe duhurira mu gahanda kerekeza ku mashuri yacu bavuye gutembera. Turaramukanya ndeba hasi. Musaba imbabazi kuko nari nagiye kandi mushiki we yarambwiye ko azaza, mubwira ko nari naremereye undi mukobwa kuzajya kumwogeza.

Yambwiye ko yanze gutaha tutabonanye bikaba bitumye ari bugende nijoro. Yavuze ko yari yateguye kujya kutugurira ibyo kurya, ko n’uruhushya yarangije kurusaba abayobozi b’ishuri. Nkata ntageze mu kigo tujya mu mujyi gushaka aho bagabura.

Ubwo umutima wanjye ucumbika ku gicu ndara nkanuye ntekereza uburanga bw’umusore wari wambuze ntabashe gutaha. Yari akiri umunyamashyengo, ubwiza bwo bwari bwarikubye kabiri. Ndigaya kubera urubanza namuciraga kuva ubwo nategerezaga ibaruwa ye nkayibura. Umutima wambwira uti: “urarota izuba riva ntakurambirijeho” nkawamaganira kure nti uyu ni umwanzi w’ibiremwa ushaka kumvangira. Ndara ntyooo... Nibona Yudita ambera muramukazi...

Umwaka ushira dutsindiye uwa kabiri. Yudita arishima anyerurira ko iyo ataza kunyisunga aba atsinzwe. Tujya mu biruhuko. Nahimbaga impamvu yo kujya iwabo, ariko ngasanga basaza be badahari. Mubajije ambwira ko babonye akazi k’ibiruhuko i Kigali. Ngira ishavu.

Dusubira ku ishuri ntamubonye. Hashize icyumweru Yudita ambwira ko Kayitare yabonye buruse azajya kwiga i Burayi. Nitoza kumwibagirwa. Cyakora mu masomo dukomeza gufatikanya tugatsinda.

Turangije uwa gatanu wisumbuye, ababyeyi ba Yudita batumira iwacu mu kwishimira ikamba umuhungu wabo yari avanye i Burayi. Nari maze kuba inkumi nziza nanjye numva nakandagira ibuye rikameneka. Hari abantu bake ba hafi mu muryango, n’uko turadabagira.

Iwacu baza gusezera mpagurukana nabo. Kayitare yanga ko ntaha anyingingira kuba nsigaye. Ntangazwa n’uko data yunzemo ati: “upfa kumungezaho uko mugusigiye. Umenye umukobwa wanjye ntumugabize ijoro rya Bweramvura bwa Kinihira wenyine.” Barataha ndasigara. Atwereka amafoto y’i Burayi n’utwaho twinshi, dusogongera kuturyohera bagira... Ariko njye sibyo byari binshishikaje. Namurebaga ubutamuhaga. Mbega we!... Uzi ko ureba umwiza ukunda ukumva wamumira bunguri!

Nanga kwitwa umwasama, butangiye kwira ndasezera aramperekeza. Tugenda umuhora ugana iwacu ansetsa, bigeze aho arambwira ati:

- Nishimiye kongera kukubona! Nagusize uri muto none wavuyemo inkumi nziza bitavugwa.

Biranyura ariko sinasubiza, ahubwo nkubita agatwenge nk’ugize isoni. Akomeza avuga ati:

- Sinkubeshya mfitiye ishyari ryinshi umusore wahebeye umutima.

Musubiza ndeba hirya nti:

- Ndacyawukomeyeho!

Ntegereza ko hari icyo yongeraho sinakibona turinda tugera mu rugo. N’uko asubira iwabo. Amagambo meza yari yambwiye akomeza kunkomanga mu matwi no ku mutima. Mbabazwa n’uko yamenye ko nta musore twuzura njye nkaba ntamenye ko hari inkumi yatuje mu mutima ngo nkureyo amaso.

Dusubira ku ishuri ntongeye kumubona. Hashize iminsi asaba kuvugana na Yudita kuri telefoni y’ikigo, amusezeraho ko asubiye i Burayi ariko amuntumaho ngo ambwire ko akibuka amagambo twaganiriye ubwo yamperekezaga.

Icyo gihe ntiyatinze nk’ibisanzwe, kuko naje kumva ko yagarutse nyuma y’igihe gito akamara ibyumweru bibiri.

Turarangiza mbona akazi muri minisiteri. Yudita nawe yiga Kaminuza, dutandukana dutyo. Umunsi umwe mbona ibaruwa ya Kayitare. Sinumva ukuntu anyibutse.

Mbabwire iby’ingenzi:

“Kuva umunsi tujyana mu misa ya Noheli, umeze nk’akarabo nabonye kakibumbye, karakura, gafungukana ubwiza n’umubavu w’igiciro gihanitse.Nari naragennye kuzagusaba umutima wawe ndangije kwiga iyo sakindi itabyara ikindi.

Ubwo iwacu bakiraga diplôme yanjye, nari narananutse warabibonye. Narangije kwiga abaganga bamvumbuyemo uburwayi bukomeye. Ngaruka i Burayi sinari nje kwiga nari nje kwisuzumisha byimbitse. Basanze mfite kanseri y’amaraso. Ubwo nasabye kuza gusezera kuri data na mama mbere yo gutangira kuvurwa. Nanze kugusuhuza nkana. Ngo nimpfa nzagusigire ishusho nziza. Ubu mvuye kwitaba bwa nyuma muganga umvura, ambwiye ko nakize burundu.

Naragutekereje buri munsi. Nkeka ko urukundo ngukunda ari rwo rwambereye umuti ukomeye wansubije ubuzima.

Ko wa munyotwe wavumbitse muri njye buhoro buhoro wagiye umbyarira ikibatsi wantabaye ntarakongoka, ukanyemerera nkagukunda ku mugaragaro!”

Roho yanjye ntiyacumbitse ku gicu gusa ahubwo yanahaciye ikiraro! Twarashyingiranywe turabyara. Ariko yarongeye arancika yo kanyagwa! Umuremyi aramwisubiza. Nibwira ko agiye agiye. Nzabibara ubundi.

Nyamara nta munsi nasibye kumubona, mu rukundo rw’isugi rutazagira ikizinga bibaho. Arampobera, nkamuvugisha. Ndacyamwizihiriza iminsi mikuru ndetse kuwa Valentine nshyiraho akarusho.

Ubwanditsi: Umwanditsi w’iyi nkuru yigeze gutsindira igihembo mu irushanwa ryakoreshejwe na IGIHE ku bwanditsi bw’inkuru z’urukundo ku munsi w’abakundana.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza