00:00:00 IGIHE NETWORK KN KINYARWANDA EN ENGLISH FR FRANCAIS

Australia: Ab’igipimo cy’ubwenge kiri hejuru ntibakunze guhirwa mu rukundo

Yanditswe na Idukunda Kayihura Emma Sabine
Kuya 21 October 2023 saa 10:03
Yasuwe :

Umuntu wese yakifuje gukundana n’umuntu ufite ubwenge kuko byagira uruhare mu kubaka umubano wa bombi binyuze mu gufata ibyemezo bizima, ariko ubushakashatsi bwakorewe ku baturage ba Australia bugaragaza ko ab’igipimo cy’ubwenge kiri hejuru (Intelligence Quotient, IQ) badakunze guhirwa mu rukundo.

Ubusanzwe impuzandengo yo ku rwego rw’Isi igaragaza ko igipimo cy’ubwenge busanzwe iri hagati ya 90 na 110.

Ufite ubwenge buri hejuru y’ibyo bipimo, ubwonko bwe buba bufite ubushobozi bwisumbuye cyane cyangwa se afite ubwenge bwinshi.

Ubushakashatsi bwakozwe n’itsinda riyobowe n’Umujyanama mu mitekerereze akaba n’Umwarimu muri Kaminuza ya UWA [University of Western Australia] yo muri Australia, Gilles Gignac, bwagaragaje ko burya umuntu aba yifuza ko umuntu bakundana agira igipimo cy’ubwenge gifite aho kigarukira.

Ni ubushakashatsi bwakorewe ku baturage 383 bo mu Gace ka Perth mu Burengerazuba bwa Australia, binyuze mu kubabaza ibibazo bijyanye n’uko baba bumva umuntu bakundana yaba ameze yaba mu marangamutima ndetse n’igipimo cy’ubwenge yaba afite.

Mu basubije, abagera kuri 60% bagaragaje ko batashobora gukorana n’umuntu w’umunyabwenge ku kigero cyo hejuru cyihariye, mu gihe 40% bo basubije ko babona abanyabwenge cyane batabasha kumvikana n’abandi ngo bakorane mu buryo bworoshye.

Ubu bushakashatsi kandi bwagaragaje ko iyo bigeze ku rukundo, abantu baba bashaka ko umuntu bakundana agira ubwenge ariko akanagaragaza amarangamutima menshi kurusha ubwenge.

Gilles Gignac wabuyoboye ati ‘‘Twananiwe kubona ingaruka iri hagati ya IQ no kunyurwa mu rukundo, ariko bigaragara ko abantu bashaka ubwenge bw’amarangamutima kurusha igipimo cy’ubwenge buri hejuru.’’

Zimwe mu mpamvu zishobora kugira uruhare mu kuba ab’igipimo cy’ubwenge kiri hejuru bagorwa no guhirwa mu rukundo, harimo imwe mu myitwarire benshi muri bo bahuriyeho ijyanye n’amahitamo bagira nk’abanyabwenge.

Zirimo kuba ubusanzwe bakunze kwihugiraho ngo buzuze intego baba barihaye mu buzima zibageza ku ntsinzi yabo, kenshi ntibabone umwanya wo kuba bari kumwe n’abandi bantu barimo n’abakunzi babo.

Hari kandi kuba abanyabwenge ku kigero cyo hejuru bakunda kwiyizera mu mitekerereze no gufata imyanyuro, ibituma bashobora kutumvikana n’undi muntu ku bwo guhagarara ku byemezo bafashe, rimwe na rimwe bidahuye n’ibyo uwo muntu wundi yemera bigatuma badahuza.

Abanyabwenge ku kigero cyo hejuru kandi bakunze kwishimira no gutindana n’undi muntu ufite ikigero cy’ubwenge cyo hejuru nka bo, ku buryo bibagora kugirana imishinga y’igihe kirekire n’umuntu ufite igipimo cy’ubwenge busanzwe cyangwa kiri hasi, ku buryo banagiye mu rukundo bafite iryo tandukaniro bagira byinshi badahuza ntibagumane.

Ikindi kandi ku bwo kugira imitekerereze iri hejuru, bituma basesengura utuntu twose n’udushobora kuba tutari ngombwa, ku buryo babona ibitagenda neza byinshi kurusha ibyagenze neza, bigatuma batihanganira kuba bagumana n’umuntu bari bafitanye umubano udasanzwe.

Gusa abashakashatsi batandukanye bagaragaza ko ibyo bidakwiye gushingirwaho ngo abafite igipimo cy’ubwenge kiri hejuru babe bahabwa akato iyo bigeze mu mubano urimo amarangamutima kuko na bo bayagira, ndetse muri bo hakaba harimo abazi kubana neza n’abandi nk’uko n’abo mu gipimo cy’ubwenge busanzwe bisimburana bamwe bigakunda abandi bikanga.

Ni mu gihe kandi ubusanzwe kugira igipimo cy’ubwenge kiri hejuru ari kimwe mu bigira uruhare mu mibereho myiza ya muntu, kuko bimuhesha byinshi birimo gutsinda mu ishuri, kubona akazi kamuhesha umushahara uri hejuru, kugira ubushobozi bwo kuba yafata imyanzuro mu buryo bwihuse iyo bigeze nko ku gushaka icyakorwa ngo abantu bave mu kaga n’ibindi byinshi.

Ubushakashatsi bugaragaza ko ab'igipimo cy'ubwenge bwinshi badakunze guhirwa mu rukundo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .