Uruhare rw’inyigisho ku buzima bw’imyororokere mu gukumira inda z’imburagihe

Yanditswe na Dufitumukiza Salathiel
Kuya 11 Mutarama 2021 saa 12:42
Yasuwe :
0 0

Kimwe mu bibazo bihangayikishije u Rwanda muri ibi bihe, ni ubwiyongere bw’inda z’imburagihe ziterwa abangavu, aho usanga hari na bamwe mu baziterwa bakiri mu mashuri abanza.

Uhereye mu 2016, abangavu 17 849 batewe inda z’imburagihe, mu 2017 haboneka abandi 17 337, mu 2018 bagera ku 19 832, mu gihe kuva muri Mutarama kugeza muri Kanama 2019 habaruwe 15 696 batewe inda batarageza byibuze ku myaka 18.

Ni ikibazo cyafashe indi ntera by’umwihariko muri ibi bihe Isi yugarijwe n’icyorezo cya COVID-19, ubwo amashuri yafungaga imiryango, abana bakaguma mu ngo igihe kigeze ku mezi umunani.

Ubwo amashuri yongeraga gufungura imiryango mu Ugushyingo 2020, humvikanye amajwi y’abangavu hirya no hino mu gihugu bababajwe no kutazasubira ku ishuri kubera ko babyaye. Nubwo abenshi muri bo wasangaga ari abo mu mashuri yisumbuye, hari na bamwe byagiye bigaragara ko bigaga mu mashuri abanza.

Hari ibitekerezo bya bamwe bavuga ko ubwo bwiyongere bw’abangavu baterwa inda bushobora kuba bwaratewe no kuba abana bari mu ngo ahanini basa n’abadafite ibihora bibahugije cyane ko n’ibikorwa bimwe byari byarafunzwe; bityo bakajya mu bitagira umumaro byanabashora mu ngeso mbi z’ubusambanyi.

Hari abandi bo basanga irari riri mu bangavu muri ibi bihe rituma bashukishwa ibintu yewe bitanagira shinge na rugero, bagasambanywa bikabaviramo gutwita. Ibyo bijyana no kuba hari n’abitwaza ibyo bagashuka abana bakabasambanya bikarangira banabateye inda.

Ni mu gihe bamwe mu bangavu bihamiriza ko haba ubwo ubukene bwo mu miryango baturukamo butuma basambanywa bagira ngo babone ibyo bakeneye.

Iyo ariko ababyeyi bo bavuga ko itakabaye impamvu kuko nubwo iwabo w’umwana baba bakennye bitakamubujije kwitwararika, ahubwo ngo yagakwiye gukorana ubwitange n’umurava kugira ngo abashe kugera ku byo akeneye, cyangwa akabisaba ababyeyi.

Gusa hari n’abemeza ko ababyeyi bamwe batita ku bana uko bikwiye ngo babagenzure aho bajya n’ibibahugije buri gihe, ndetse byaba ngombwa bakabashakira imikoro kugira ngo babone ibyo bahugiramo aho kujya mu byashyira ubuzima bwabo mu kaga.

Ibyo byose bigaragazwa ntawahakana ko bigira uruhare rutaziguye mu kongera umubare w’inda z’imburagihe, ariko hari ikindi kititabwaho ndetse bamwe batanatekereza ku ruhande rw’ababyeyi n’abarezi, gikomeje gutiza umurindi ubwiyongere bw’inda z’imburagihe ari kutabaha inyigisho ku buzima bw’imyororokere.

Inyigisho ku buzima bw’imyororokere zikomeje kuba nkeya mu miryango ibyiruye ingimbi n’abangavu, kandi ari cyo bakeneye ngo bisobanukirwe bityo babe bamenya n’uko babyitwaramo igihe batezwe ibishuko cyangwa bagize ibyiyumvo bidasanzwe bari kumwe n’abandi, cyane ko imyaka yabo irangwamo impinduka zikomeye mu mikorere y’umubiri.

Inyigisho ku buzima bw’imyororokere zikubiyemo ibijyanye n’amakuru ku mibonano mpuzabitsina, imyororokere, indwara zandurira mu mibonano mpuzabitsina, ingingo z’umubiri n’imimaro yazo, ndetse n’uburenganzira n’inshingano byo kororoka.

Mu itangwa ry’izo nyigisho, ni ho abangavu n’ingimbi bamenyera impamvu batangiye kwiyumva bitandukanye n’uko biyumvaga bakiri abana bato, imikorere n’imihindagurikire y’ibice by’umubiri wabo, akamaro k’ingingo z’umubiri, ndetse n’uko bakwiye kwitwara mu kuyobora ibyiyumvo byabo[Kwifata].

Ni naho kandi bamenyera ingaruka mbi bashobora gukura mu kuyobywa n’ikigare cy’urungano n’irari ry’umubiri, zirimo inda z’imburagihe n’indwara zandurira mu mibonano mpuzabitsina, bakamenya aho bahera babyirinda kuko bituma babihirwa n’ubuzima.

Imbogamizi zakunze kugaragazwa ko zitambamira itangwa ry’izo nyigisho, ni umuco gakondo w’Abanyarwanda, imyemerere ya bamwe mu bayoboke b’amadini, kutabigiraho ubumenyi kwa bamwe mu babyeyi, ndetse hamwe na hamwe ugasanga ababyeyi batabona umwanya uhagije wo kuganira n’abana babo.

Ku rundi ruhande ariko abarezi nabo batungwa agatoki ku kuba batigisha abana ku buzima bw’imyororokere uko bikwiye bakabiharira ababyeyi bonyine, n’aho biri muri gahunda y’amasomo bakabinyuraho bihuta ntibahatsindagire ngo abana babashe kuhasobanukirwa neza.

Nyamara inzego z’ubuzima n’abahanga mu guhuza imitekerereze n’imyitwarire bavuga ko inyigisho ku buzima bw’imyororokere zagira uruhare rukomeye mu kurinda inda z’imburagihe mu bangavu, mu gihe byaba bikozwe byitaweho kandi ku gihe.

Umuyobozi w’ishami rishinzwe kurinda no kuvura indwara zandurira mu mibonano mpuzabitsina mu Kigo cy’Igihugu cy’Ubuzima(RBC), Makuza Jean Damascene yavuze ko mu gihe cy’ubugimbi n’ubwangavu abana baba bakeneye kumva akamaro ko kwifata ndetse bakanabikora, ngo kuko bizabarinda kugwa mu bishuko byakwangiza ahazaza habo, bagakura bafite ubuzima buzira umuze.

Yavuze ko imyaka baba barimo iteye inkeke zo kuba byoroshye ko batwarwa n’ikigare cy’urungano, bityo bakaba bagwa mu bishuko mu buryo bworoshye.

Ati ”Iyi ni yo mpamvu ari ngombwa ko ababyeyi n’abarezi bigisha abana iby’ubuzima bw’imyororokere kuko bishobora gutuma bamenya uko bitwara mu bihe bahuye n’ihurizo, nko kwirinda inda z’imburagihe n’indwara zandurira mu mibonano mpuzabitsina, cyangwa bageze mu gihe cyo kujya mu mihango.”

Umuhanga mu mitekerereze ya muntu, Twizerimana Sylvester yabwiye IGIHE ko inyigisho ku buzima bw’imyororokere zifasha abangavu n’ingimbi kumenya kwifata mu gihe umubiri waba ugize irari.

Ibyo ngo byabafasha kugira imibereho myiza n’ubuzima buzira umuze, cyane ko baba bari mu bihe by’impinduka zidasanzwe z’umubiri.

Twizerimana ko “benshi mu bangavu n’ingimbi bagwa mu bishuko kubera ko batigishijwe ubuzima bw’imyororokere [ingaruka mbi zo kutifata].Baba basa n’abari mu rujijo, bityo bahura n’ibishuko ntibamenye ko byashyira ubuzima bwabo mu mazi abira.”

Iyo ngo niyo mpamvu ababyeyi n’abarezi bakwiye kuremamo abana uwo muco bakiri bato, bakabigisha uko bitwara bakifata.

Uretse kubarinda ikigare cy’urungano, inyigisho ku buzima bw’imyororokere zanafasha mu kurinda abangavu n’ingimbi kugendera ku bintu bimwe na bimwe bitari byiza bashobora kubona kuri za televiziyo cyangwa internet.

Hatangwa inama ko abangavu n’ingimbi batangira kwigishwa kwifata bakiri bato bakazakurana uwo muco, ndetse ababyeyi n’abarezi bakagira iyo myitwarire kugira ngo babere abo bana urugero rwiza bazakurikiza.

Bamwe mu barezi bemeza ko kwigisha abana ubuzima bw’imyororokere bikenewe ndetse ko ari ngombwa ko buri wese abigiramo uruhare, ariko bakavuga ko ababyeyi bakwiye gufata iya mbere mu kuzuza izo nshingano kuko babana nabo igihe kinini, maze abarezi bagashyiraho akabo nk’inyongera.

Nibidakorwa bityo, hagaragazwa impungenge ko abana bari muri icyo kigero bazakomeza gutwarwa n’ikigare cy’urungano ndetse bikaba byakoroha ko bayobywa, ibintu bizakomeza gushyira ubuzima bw’abangavu mu kaga harimo nko kuba inda z’imburagihe ziziyongera, no kwandura indwara zandurira mu mibonano mpuzabitsina.

Abahanga bagaragaza ko kwigisha abana ibijyanye n'ubuzima bw'imyororokere bakiri bato bibarinda kugwa mu bishuko bishobora no kubaviramo guterwa inda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .