Uko Mukarurinda Alice wabuze abe muri Jenoside yaje kubabarira abamwiciye

Yanditswe na Tuyishimire Raymond
Kuya 19 Mata 2021 saa 07:50
Yasuwe :
0 0

Imyaka 27 irashije mu Rwanda habaye Jenoside yakorewe Abatutsi. Ni Jenoside yasize ibikomere ku mitima ya benshi ku bwo kubura ababo. Ibi ni ko bimeze kuri Mukarurinda Alice, umubyeyi w’abana batanu utuye mu Karere ka Bugesera mu Murenge wa Nyamata.

Mu kiganiro Mukarurinda yagiranye na IGIHE, yagarutse ku ruhare rw’Inkiko Gacaca mu kunga abarotse Jenoside yakorewe Abatutsi, by’umwihariko uko zamufashije kubabarira abamwiciye umuryango.

Mukarurinda yakuriye mu yahoze ari Segiteri Kayumba, akura ari umukobwa ukunda gusenga akaba n’umuyoboke ukomeye wa Kiliziya Gatolika, mu buhamya bwe yavuze ko na mbere y’uko Jenoside iba bari baratujwe ahantu batishimiye.

Mu 1959 birukanywe mu Mujyi wa Kigali, bajya gutuzwa mu Bugesera. Ubwo yiteguraga gukora ikizamini gisoza amashuri abanza, yaratsinze ariko ntiyashyirwa ku rutonde rw’abemerewe kujya mu mashuri yisumbuye, asimbuzwa abandi azira ko ari Umututsi.

Mukarurinda yavuze ko icyo gihe abari Abatutsi bari abayobozi bakuweho basimbuzwa Abahutu ngo hazabashe gukorwa urutonde rw’abicwa.

Ati “Mu 1991 ni bwo abana bacu, basaza bacu, babonye ko ibintu byacitse. Batangiye gufata urutonde rw’abakozi ba Leta b’Abatutsi, bagashyirwa ku rutonde rw’abagomba kuzicwa. Abari ba resiponsabure [bayoboraga utugari], ba Nyumbakumi bayoboraga ingo icumi, babakuyeho ,bavuga ko nta Mututsi uzongera kuyobora.”

Mukarurinda yavuze ko tariki ya 13 Mata 1994 bisi yazanye abasikare i Ntarama, bafatanya n’Interahamwe kwica Abatutsi.

Ati “Baje bafite imbunda, za gerenade , bahiga uwitwa Umututsi wese ngo bamwice. Nari ndi hanze mpetse umwana w’amezi icyenda, mbona kiliziya barayitwitse, umuriro uragurumanye. Babanje kurasa urusenda, abantu bose bikubita hasi, ubwo narindi kumwe n’umugabo wanjye duhita twiruka.”

Mukarurinda yavuze ko tariki ya 29 Mata 1994, ari umunsi mubi atazibagirwa kuko ari bwo yagabweho igitero n’interahamwe ndetse bamuhekura areba.

Ati “Ni bwo bangezeho baza ari abasirikare benshi cyane, bahita bagota urufunzo. Baravuze ngo nimubajyane mubasubize iwabo muri Ethiopia. Barinjiye baradutemagura, bahise bafata impiri bankubita mu mutwe, umwana wanjye wari ufite amezi icyenda bamucamo kabiri.”

Mukarurinda yabwiye IGIHE ko nyuma y’ibi, Abasirikare ba FPR Inkotanyi baje bakabarokora maze batangira no kubomora ibikomere, ari na ko babaha ubuvuzi bw’ibanze.

Uko yaje kubabarira abamwiciye umuryango

Nyuma ya Jenoside yakorewe Abatutsi mu 1994, Mukarurinda yagannye inzira y’Ubumwe n’Ubwiyunge nubwo bwose yari yarahemukiwe.

Uyu mubyeyi yavuze ko mu 2003 yaje kugirirwa icyizere aba inyangamugayo ya Gacaca hagamijwe gutanga ubutabera ku bari bakurikiranyweho kugira uruhare muri Jenoside yakorewe Abatutsi.

Muri izi nshingano niho yamenyeye ko abamwiciye umuryango bireze bagasaba imbabazi.

Ati “Nagizwe Umunyamabanga w’Urukiko rwa Gacaca mu Murenge wa Nyamata. Ahari ni Imana yashakaga kunkiza. Nabonaga dosiye z’abashinjwa Jenoside, ngahura n’abahamijwe ibyaha bagakatirwa gufungwa. Perezida wa Repubulika yaje gutanga imbabazi, bamwe bampemukiye barataha.”

Mukarurinda yavuze ko kubabarira umuntu wamutemye byabanje kumugora ariko aza kubigeraho.

Uyu mubyeyi yavuze ko icyamuteye imbaraga mu rugendo rwo kubabarira abamwiciye ari uko bamuhaye amakuru y’aho abayeyi be bishwe bajugunywe.

Nyuma y’aho n’abandi bakomeje kugenda bamusaba imbabazi. Yavuze ko kuri ubu abana n’abamwiciye mu matsinda y’Ubumwe n’Ubwiyunge.

Ati “Tubana mu matsinda y’ubumwe n’ubwiyunge, turakorana, nta kibazo kugera n’uyu munsi nta kibazo turagirana. Ntabwo nongeye kubikanga cyangwa ngo nongere kubatekereza nabi.”

Perezida wa IBUKA mu Karere ka Bugesera, Bankundiye Chantal, na we ashimangira ko inkiko Gacaca zagize uruhare rukomeye mu kongera kubanisha Abanyarwanda.

Ati “Uruhare rw’Inkiko Gacaca twarushimira, turashimira leta yashyizeho iyo gahunda kuko uburyo Jenoside yakozwemo iyo hadakora inkiko Gacaca, Abarokotse Jenoside yakorewe Abatutsi bari kuzagera aho bagasaza, bakibagirana batarabona ubutabera. Inkiko Gacaca zahuje abarokotse n’abayikoze”.

Yavuze ko intambwe y’ubumwe n’ubwiyunge imaze kugera ku rugero rwiza. Ati “Nubwo Abatutsi bo mu Karere ka Bugesera bakozweho na Jenoside bakababara, urugendo rw’ubumwe n’ubwiyunge ruhagaze neza. Kugeza ubu, hari abarokotse Jenoside n’abayikoze nyuma bakemera ibyaha bagasaba imbabazi, n’abarangije igifungo bari mu rugendo rwo kongera guhuza imitima.”

Kugeza ubu, Abarokotse Jenoside bo mu Karere ka Bugesera bibumbiye mu matsinda y’ubumwe n’ubwiyunge agamije kubanisha abarokotse Jenoside n’abayikoze mu rwego rwo kwimakaza inzira y’ubumwe n’ubwiyunge.

Mukarurinda yafashijwe n'Inkiko Gacaca kubabarira abamwiciye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .