00:00:00 IGIHE NETWORK KN KINYARWANDA EN ENGLISH FR FRANCAIS

Aba-feminists si agatsiko k’abagore bananiranye, abadutuka bafite ubwoba - Ikiganiro na Nsanga Sylvie (Video)

Yanditswe na Iradukunda Serge
Kuya 28 Werurwe 2021 saa 11:02
Yasuwe :
0 0

Hashize igihe mu Rwanda hagaragara ukutavuga rumwe ku bijyanye na feminism, aho benshi bayifata nk’inkundura igamije kubangamira abagabo ndetse bakabona aba-feminists nk’abaje guhutaza abagabo mu buryo bumwe cyangwa ubundi.

Ijambo feminism (féminisme), abahanga bagaragaza ko ryatangiye gukoreshwa mu 1837 rihimbwe n’umuhanga w’Umufaransa, Charles Fourier, nyuma riza no gutirwa mu zindi ndimi.

Iri jambo ryakwirakwiye cyane mu Bufuransa muri uwo mwaka wa 1837, rikoreshwa cyane mu Buholandi mu 1872 rigera mu Bwongereza ahagana 1890, ndetse ritangira no gukoreshwa cyane muri Leta Zunze Ubumwe za Amerika mu 1910.

Abahanga bagaragaza ko feminism ari imyemerere no guharanira ko abagabo n’abagore bareshya bakagira uburenganzira bungana mu bijyanye na politike, ubukungu, umuco n’ibindi. Abafite iyi myemerere n’imyumvire bitwa ‘feminists’.

Iyi myemerere cyangwa ibikorwa byo gushaka ko abagabo n’abagore bareshya byatangiye mu bihe bya kera nubwo ijambo ‘feminism’ ryavutse nyuma. Nk’urugero umuhanga w’Umugiriki Plato wabayeho mbere y’ivuka rya Yezu (428/427—348/347) yakunze kumvikana avuga ko abagore bafite “ubushobozi kamere” bungana n’ubw’abagabo mu bijyanye no kuyobora ndetse no kurinda u Bugiriki.

Mu Bugiriki bwa kera ntawigeze aha agaciro iyi mitekerereze ya Plato kuko batabonaga uburemere bwayo. Gusa iyi mitekerereze ye yatumye abagore bo muri Roma ya kera bahaguruka batangira guharanira uburenganzira bwabo.

Ibikorwa byamenyekanye cyane ni igihe abagore bo muri uyu mujyi bahagurukaga bakigaragambya bashaka ko hakurwaho itegeko rizwi nka ‘Oppian Law’ ryababuzaga kugira uburenganzira ku mitungo irimo Zahabu n’ibindi.

Muri iki gihe Marcus Porcius Cato wari ufite inshingano nk’iza Perezida w’Urukiko rw’Ikirenga mu Isi y’uyu munsi yarwanyije iki gitekerezo cya Plato avuga ko “mu gihe abagore bazareshya n’abagabo bitazatinda ko batangira kubayobora no kubakandamiza.”

Feminism, umuntu yavuga ko yaranzwe n’inkundura eshatu, aho inkundura ya mbere yaranzwe no guharanira ko abagore bagira uburenganzira mu by’imitungo no gutora, iya kabiri irangwa no guharanira uburinganire no kurwanya ivangura iya gatatu yatangiye ahagana mu 1990, igamije gushaka ko abagore bagira uburenganzira no mu bindi bintu byose bisigaye. Iki gice kandi cyaranzwe n’ibikorwa byo kwamagana ibikorwa by’ihohoterwa rikorerwa abagore n’abakobwa.

Mu Burayi iyi nkundura ya gatatu ya feminism ho yaranzwe no kuvuguruza ibyemezo byari bikubiye mu ya kabiri kuko byagaragaraga ko bihereza amahirwe gusa abagore bataryamana n’abo bahuje ibitsina.

Mu ba feminists bamenyekanye cyane harimo Abigail Adams wari umugore w’uwahoze ari Perezida wa Leta Zunze Ubumwe za Amerika, John Adams.

Uyu mugore yamenyekanye cyane kubera ibaruwa yandikiye umugabo we amubwira ko abagore nibatagira uburyo bitabwaho kimwe n’abagabo bazigomeka ku butegetsi kandi ko batazigera bemera ko hagira itegeko batagizemo uruhare ribagenga.

Mu bandi bamenyekanye cyane harimo Elizabeth Cady Stanton na Lucretia Mott bamenyekanye mu kizwi nka ‘Seneca Falls Convention’, Mary Wollstonecraft, Susan B Anthony, Alice Stone Blackwell, Elizabeth Cady Stanton na Emmeline Pankhurst.

Inkundura ya feminism yatangiye mu myaka yo hambere bitewe n'ihohoterwa abagore bahuraga naryo

Feminism mu Rwanda

Nta gihe kinini gishize inkundura ya “Feminism” mu Rwanda itangiye gufata indi ntera, aho bamwe mu basore, abagabo, inkumi n’abagore batangira kwerura bavuga ko ari aba feminists.

Ahanini ibikorwa n’ubuvugizi bw’abafite iyi myumvire y’uko umugabo n’umugore bakwiye kureshya bikunze kunyuzwa kuri Twitter. Mu bamenyekanye cyane muri ibi bikorwa harimo Nsanga Sylvie, Judicaelle Irakoze, Bonitah Kobusingye n’abandi.

Uretse aba na bagenzi babo, mu Rwanda hari undi mubare munini w’abantu bemera ko umugabo n’umugore bakwiriye kureshya bakagira amahirwe angana ku bintu byose, gusa bo ntiberure ngo bavuge ko ari aba-feminists cyangwa bakabikora batazi ko ibikorwa barimo bihuje n’intego za feminism.

Mu rwego rwo gushaka kumenya byinshi kuri feminism, IGIHE yagiranye ikiganiro na Nsanga Sylvie, umwe mu mpirimbanyi ziza ku isonga za “feminism” mu Rwanda, tuganira kuri iyi myemerere, imbogamizi abayifite bahura nazo ndetse n’uko bakira ibyo bamwe babavugaho.

Nsanga Sylvie uvuga ko abona feminism nk’Ubukirisitu kuko yibanda ku kuzamura umugore umaze igihe yaratsikamiwe.

Ati “Feminism ni imyumvire, ni imitekerereze, ni imyifatire ndetse n’ibikorwa byose bigamije guteza imbere uburenganzira bwa muntu ariko cyane cyane ubw’abagore kuko ari njye nawe twemeranya ko umugore yahohotewe kuva Isi itangira.”

Akenshi abantu bakunze kugira ibitekerezo bitandukanya kuba feminists rimwe na rimwe bakumva ko ari agatsiko n’abagore bananiranye bashaka kwigaranzura abagabo.

Sylvie Nsanga yavuze ko abantu bafite imyumvire nk’iyi biterwa no kutamenya icyo feminism ari cyo.

Ati “Abantu baba bafite ubwoba ko feminism ari agatsiko k’abagore bananiranye ni ukubera ko batiha umwanya ngo bumve bati ese bariya bantu icyo basaba ni iki ? Ahubwo icyo nakubwira abantu batinya feminism cyangwa aba-feminists kubera ibikorwa baba bakora. Urebye neza abagabo bayoboye kuva kera, iyo babona izi nkundura zo guteza imbere abagore ukuntu imyemerere ya feminism ikomeye bibatera ubwoba.”

“Abadutuka bafite ubwoba...”

Nsanga yavuze ko abantu bakunze kugaragaza ibitekerezo birwanya feminism cyangwa bituka abafite iyi myumvire ari uko bafite ubwoba bw’uko hari byinshi bishobora guhinduka mu gihe abagore baba bakorewe ubuvugizi.

Ati “Abantu banga feminism mu by’ukuri njye ndabumva ariko kera sinabumvaga kubera ko nari nkiri umwana, ariko kubera gukura bisigaye bituma numva buri muntu bitewe n’ibihe arimo[…] urebye abagabo benshi birirwa banadutuka kuri Twitter n’ahandi hose bafite ubwoba. Bafite ubwoba kubera ko hari ibintu byinshi bibanezeza mu buzima ku buryo bumva ko biri kugenda bibaca mu myanya y’intoki. Bumvaga ko bakubita umugore uko babishaka kubera ko ari umutungo wabo.”

Nsanga Sylvie akomeza agaragaza ko abagabo bamenyereye ko bafite ibintu byabo bakora bonyine badashaka ko bijya hanze, ariko ngo kuri uyu munsi biri kujya hanze bikabatera ubwoba.

Ati “Abantu benshi bafata aba- feminists nk’abagore b’abarakare, nkubwije ukuri nanjye ndarakara kuko iyo hari umuntu wahohoteye umuntu ndarakara ku buryo ntasinzira.”

Yavuze ko ibikorwa byabo bitagamije gutesha agaciro abagabo. Ati “Kuri njye ubwoba abantu bafite ni ubwoba bwo gutakaza za mbaraga bari bafite. Urumva abagabo bari bafite imbaraga kandi ibitekerezo byabo byarumvwaga ariko rero ibyo nta nubwo tubibatse ahubwo nibabikoreshe mu buryo bwiza.”

“Ubugabo se ni iki?”

Kenshi mu muco nyarwanda hakunze kugaragara imyumvire yo kubaha abagabo, hamwe n’ibitekerezo byabo usanga byarahabwaga intebe [uko byaba bimeze kose] kurenza iby’abagore, gusa iyi myumvire Nsanga Sylvie ntayikozwa.

Yagize ati “Ntabwo umuntu ashobora kuba aho atanga ibitekerezo by’amafuti ngo tumurebere ngo kubera ko ari umugabo. Ubugabo se ni iki? Ahubwo njye mu muco wanjye nari nzi ko iyo bavugaga ko umuntu ari umugabo yabaga ari umuntu wakoze ibikorwa by’indashyikirwa, ubugabo bwawe ntabwo ari ukuba ukandamiza abandi.

Abantu ntibakwiye gutinya feminism ahubwo bakwiye gutinya ibikorwa bibi bitajyanye n’amategeko y’igihugu, bitajyanye n’amategeko ya muntu, nibatinya ibyo bibi bazaba bakoze neza.”

Ntakozwa imigenzo n’ibirori nka ‘bridal shower’, inkwano no guca imyeyo

Nsanga Sylvie yagaragaje ko hari ibikorwa n’imigenzo atemera we nk’umuntu ku giti cye kuko abona ikubiyemo imyumvire igamije guhohotera umugore n’umukobwa ndetse no kumusubiza inyuma. Muri ibi harimo ibijyanye n’inkwano, ibirori byo gusezera ku bukumi bizwi nka ‘bridal shower’ ndetse no guca imyeyo cyangwa gukuna.

Yavuze ko nko ku nkwano, abagabo bitwaza ko bakoye bagafata umugore uko bashatse nk’aho bamuguze. Yavuze ko niba ari ikimenyetso cyo gushimira ababyeyi kuba barareze neza, n’umuryango w’umuhungu ukwiriye kurihabwa.

Bridal shower Nsanga asanga ari ahantu higishirizwa imyumvire isubiza umugore inyuma.

Guca imyeyo Nsanga avuga ko ikibazo cyabyo ari uko bikorerwa no ku bana bakiri bato, batazi akamaro kabyo ku buryo bikwiriye gufatwa nk’ihohoterwa rishingiye ku gitsina.

Nubwo hari byinshi Leta y’u Rwanda yakoze mu gusubiza umugore agaciro no gushyira amategeko, Nsanga asanga hari byinshi bigomba gukorwa n’umuryango birimo no kurera umwana w’umuhungu bamwumvisha ko areshya na mushiki we kugira ngo mu gihe azaba yashinze urugo azamenye kubaha umugore no kutamuhohotera.

Nsanga Sylvie yanenze abumva ko aba-feminist ari agatsiko k'abagore bananiranye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .