Yezu ntakigarutse, abamuyobotse bamutesha agaciro –Mubalaka utegura umunsi wera w’umucyo

Yanditswe na Akayezu Jean de Dieu
Kuya 28 Ukuboza 2018 saa 02:08
Yasuwe :
0 0

Ku wa 25 Ukuboza, buri mwaka Abatuye Isi by’umwihariko abemera Yezu Kirisitu, bifatanya mu kwizihiza ibirori by’ivuka rye, bizwi nka Noheli.

Ntabwo bizwi neza ko itariki 25 Ukuboza ariyo Yezu yavutseho, gusa abanditsi b’Abakristu bagiye bagaruka cyane kuri Noheli nk’itariki y’amavuka ya Yezu Kristu.

Mu kinyejana cya 18, abantu bamwe batangiye gutanga ibindi bitekerezo byabo ku bijyanye na Noheli.

Isaac Newton yavuze ko umunsi wa Noheli watoranyijwe hagendewe ku bihe by’ubukonje bukabije ubwo izuba riba rigaragara mu gihe cya mu gitondo (winter solstice) rikarasa ritinze, igihe Abaromani bitaga “Bruma” kizihizwaga ku wa 25 Ukuboza.

Mu 1743, Umudage w’Umuprotestanti Paul Ernst Jablonski, yavuze ko Noheli yashyizwe ku itariki 25 Ukuboza hagendewe kuyijyanisha n’umunsi w’izuba ku Baromani “Dies Natalis Solis Invicti” kandi ngo wari umunsi wa kiliziya gusa.

Umuyobozi w’Itsinda ry’Abantu bamaze kugera kuri 300 bategura ‘Umunsi Wera w’Umucyo, (White Day and Shine/Light), Mubalaka Edward asanga n’ubwo abantu benshi ku Isi bizihiza umunsi mukuru w’ivuka rya Yezu, Noheli, kuri 25 Ukuboza atariyo itariki uyu munsi wakabaye wizihirizwaho.

Kuri we avuga ko inyandiko zanditswe n’abahanga batandukanye zirimo na Bibiliya, zigaragaza ko Noheli ariwo munsi Yezu yavutseho ari nabwo hatangiye kubarwa umunsi wa mbere.

Ati “Kayizari Augusto niwe watanze itegeko ryo kwibaruza, ni nako kubarurwa kwa mbere kwabaye ku Isi hose. Buri muntu wese yajyaga kwibaruza aho akomoka, Yozefu nawe iwabo hari I Bethlehem”.

“Icyo gihe rero kuko yari yarasabye umugeni (Mariya), yaravuze ngo reka tujye kwibaruza iwacu, bagezeyo uko niko kwandikwa kwa mbere mu ibarura rya mbere ryabayeho. Bivuze rero ngo Yezu avukiye i Bethlehem nibwo batangiye kubara umunsi wa mbere (Umunsi wa Mbere w’ukwezi kwa mbere, umwaka wa mbere).”

Mubalaka akomeza avuga ko Yesu/Yezu yavutse tariki 1 Mutarama umwaka wa Mbere. Bishatse kuvuga ko Noheli yagakwiye kujya yizihizwa buri Tariki ya Mbere z’Ukwezi kwa Mbere.

Abamuyobotse bamutesha agaciro

Mubalaka Edward wakunze kunengwa n’abakurikiranira hafi ibijyanye n’imyemerere ye avuga ko abamunenga nta kibazo bamutera kuko bafite imyumvire yabo ariko abamutuka bo ngo “Batesha agaciro Umwami wabo.”

Yakomeje agira ati “Niba umwemera (Yesu/Yezu) ntabwo wakabaye utukana, ntan’ubwo wajya umwibuka ukoresheje umusaraba, nta nubwo wamufata nk’umukanana w’insina (igipupe) ahubwo wakabaye wibaza impamvu iyi tariki 25 bayihimbye ngo abe ariyo izaba yifashishwa mu kwizihiza Noheli.”

Yezu ntakigarutse

Mubalaka avuga ko kuba Yesu/Yezu yarabambwe ku musaraba ubwabyo yabonye ko umusaraba ari ikintu kibi, bityo akaba yumva ko mu bishobora gutuma atagaruka kuri iyi Si ari uko abantu bambara umusaraba.

Yagize ati “Icya mbere bamugize Se w’imfubyi n’abapfakazi, abantu bagakwiye kumenya ngo uriya ni Umwami, bakavuga bati uko tuzamushyingira, uko tuzamutoranyiriza abagore, abantu bakavuga bati uyu ni umugore wa Yesu nk’uko abami babikoraga.”

“Ariko icya kabiri gikomeye, uziko bamubambye nk’uko ibitabo bibisobanura, uziko bamubambye bamutera imisumari mu biganza ndetse aranapfa. Ibi bintu bamukoreye abaye ari inshuti yawe ntabwo warangiza ngo wambare wa musaraba bamubambyeho ngo urimo uramwibuka.”

Yakomeje agira ati “Yezu ubwe niba abibonye ko bamuteye umusumari kuri uriya musaraba, yarangiza akabona umuntu arimo kugenda awambaye, ubwabyo yabitinya.”

Asoza kandi asaba abanyarwanda gukunda iby’iwabo, kugaruka ku isoko n’umuco ndetse n’indangagaciro aho kwishinga ibyazanywe n’abigishaga iyobokamana bavuga ko Yesu/Yezu ari umucunguzi (Messiah) w’Abayisiraheli atari uw’abanyarwanda cyangwa abandi banyafurika.

Mubalaka Edward, Umunyamakuru, Umunyamategeko n’Umusesenguzi mu bya Politiki, akaba n'Umuyobozi w'itsinda ritegura umunsi wera w'umucyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza