Mani Martin yahishuye iby’umukobwa bakundanye bwa mbere n’agahinda yasigiwe n’umubyeyi we (Video)

Yanditswe na Uwiduhaye Theos
Kuya 11 Ukuboza 2018 saa 10:25
Yasuwe :
0 0

Maniraruta Martin umaze kumenyekana nka Mani Martin, ni umwe mu bahanzi b’abahanga; umuziki we uryohera benshi kubera uko agorora ijwi abijyanisha n’umudiho wa kinyafurika.

Ntawarondora abanyempano bari mu Rwanda ariko Mani Martin ari mu b’imbere. Uyu musore w’imyaka 29 yavukiye ahitwa Ntura mu karere ka Rusizi, mu ntara y’Iburengerazuba.

Iyo muganira yitsa ku kuba kuva akiri muto, uwamubonaga wese yarirahiraga impano ye itangaje, ariko ntanahisha agahinda aterwa no kuba nyina yaramuhanuriye akiri muto ko azaba icyamamare, agatabaruka atabonye umuhungu we kuri televiziyo cyangwa ku rubyiniro.

Impano ye yigaragaje akiri muto, ikurira mu itorero ADEPR yaririmbyemo mbere yo gutangira umuziki ukora mu mfuruka zose z’ubuzima.

Yabwiye IGIHE ati “Nkiga ku ishuri twagiraga isomo nakwita nk’aho ari iry’ubuhanzi n’ubugeni, abantu bahitagamo kuboha ariko njye nkahitamo kuririmba.”

Kugeza ubu nto nta dini ryihariye agira, asengera ahamworoheye ku munsi wo guterana.

Ikiganiro kirambuye yagiranye na IGIHE

IGIHE: Ujya uteganya gukora indirimbo zihimbaza Imana ko ariwo murongo wahozemo?

Mani Martin: Ubuhanzi bwanjye ntabwo ari ibintu ntegura ngo mvuge ngo ndashaka kuririmba kuri iki, ndashaka kuririmba abagore, ubuzima bwanjye cyangwa ibindi […] ahanini bituruka ku buvanganzo. Igice cyose iyo niyumvisemo umuhamagaro wo kuvuga ku kintu runaka nshobora kubikora, ibijyanye n’Imana nabyo nshobora kubiririmba.

Byose biterwa n’ubuzima mbayemo, ibyo ndikubona, muri make ni ibyo. Nta bintu bijya bimvamo ngo ibindi binjyemo ariko nta n’ibyo mpamagara ngo mbiririmbe.

IGIHE: Ni iki wishimira umaze kugeraho ?

Mani Martin: Ibintu nishimira ni byinshi! Kuba ngeze iki gihe ngikora umuziki ni ibintu nishimira kuko mbikora mbikunze, niho hantu mbona isoko y’ibyishimo byanjye.

Ikindi ni ukugenda mbona abatoya bagenda bigira kubyo nakoze cyangwa se bagira icyo babivomamo, ni ibintu bishimishije ku myaka yanjye, ni nko gutera igiti ukabona abantu bagenda bakuraho imbuto. Ikindi uyu mwaka ni bwo bwa mbere nari ntangiye kugurisha indirimbo zanjye kuri interineti nabyo byaranshimishije cyane.

IGIHE: Naho mu bintu bifatika, ugeze kuki kubera umuziki?

Mani Martin: Ntabwo njya mvuga ku bintu bijyanye n’amafaranga cyane cyane iyo ari ayanjye bwite. Kimwe mu byo navuga ni uko umuziki wabashije kunyishyurira amashuri yisumbuye na kaminuza.

Namaze igihe kinini cyane ndirimba ariko atari umwuga, nkabikunda nkagenda ahantu hose mu gihugu ndirimba, ariko numva ataricyo nzakora, numvaga bitavamo akazi kanjye ka buri munsi. Icyo gihe imibereho yanjye ijyanye no kwiga yari igoye kandi ndirimba, nanazwi mu gihugu.

Kuva ntangiye kugira muzika umwuga yahise itangira gukemura ibibazo byanjye bya buri munsi, inyishyurira amashuri yanjye yose ndetse na kaminuza, ntagiye kuvuga amamodoka cyangwa ibindi byose.
IGIHE: Kwiga byakugoye bitewe n’iki ?

Mani Martin: Ni ubushobozi. Nize ku bigo byinshi nshakisha aho bishyura make.

IGIHE: Wize ku bigo bingahe?

Mani Martin: Nize ku bigo bine. Icyiciro rusange ubwacyo nacyize kuri bitatu.

IGIHE: Ni uwuhe muhanzi wakundaga cyane ukiri umwana?

Mani Martin: Nakundaga cyane Cecile Kayirebwa kuko ari mu bantu batumye ndirimba, n’indirimbo za mbere nafashe mu mutwe ku myaka nk’itandatu zabaga ari ize. Zari indirimbo zinakomeye ku buryo ubu ngubu mba numva gufata izindi nkazo byangora, ariko kubera urukundo rwa muzika nkazimenya.

Naramukundaga cyane, numvaga nifuza kuzamubona. Nari nziko ariwe muririmbyi wa mbere ku Isi, iwacu mu cyaro ntabwo twabaga tuzi abandi bantu baririmba, wa muntu bita icyitegererezo.

IGIHE: Nyuma mwaje guhura?

Mani Martin: Twarahuye turamenyana, turaganira biranshimisha cyane. Sinzi niba hari imishinga yindi tuzakorana kuko ntitwigeze tubiganiraho, ariko byanshimisha mbashije nko gukorana nawe indirimbo.

IGIHE: Ni izihe nzozi wari ufite ukiri muto?

Mani Martin: Numvaga nzaba umunyamakuru kubera ko mu bintu nakundaga, habagamo no kumva amakuru cyane no gusoma, nkumva abanyamakuru ni abantu b’ingirakamaro ku Isi kubera ko batanga ubumenyi mu muryango abantu baba bakeneye.

Ariko urumva ni ibintu byasaga nk’ibidashoboka, ni ibintu natangiye kurota ndi umwana nkiri mu cyaro.

IGIHE: Kuki wavuye mu kuririmba indirimbo zihimbaza Imana?

Mani Martin: Sinkunda ibyo bintu byo kuva mu ndirimbo zihimbaza Imana nkajya mu zisanzwe kuko njyewe sinibona nk’umuhanzi w’ikintu kimwe icyo aricyo cyose, simba nshaka umupaka mu byo nkora.

Ndi mutoya naririmbaga mu rusengero gusa numvaga aribyo nshaka nta n’ikibazo kirimo, ariko ntangiye gutekereza ko muzika nayigira umwuga natangiye gushaka uburyo yaba ikora ku bice byose by’ubuzima, uko nashaka kuririmba kose nkabikora.

IGIHE: Ni ukuvuga ko umuziki wawe wabaye uw’umwuga utangiye kuririmba ibice byose?

Mani Martin: Yego!

IGIHE: Ubona ari iyihe myaka umusore akwiriye gutakaza ubumanzi ?

Mani Martin: Nta myaka ihari umusore yatakaza ubumanzi igenwe, byose biterwa n’ukuntu yakuze n’ibindi wagiye werekwa.

IGIHE: Ni uruhe rwibutso ufite ku mukobwa mwakundanye bwa mbere ?

Mani Martin: Umukobwa twakundanye bwa mbere rero nigaga mu wa mbere w’amashuri yisumbuye, ndetse twaranicaranaga, twigaga tuba mu kigo.

Njye nari nziranye na animateri (animateur), kugira ngo tuganire tutari mu ishuri byasabaga ko najyaga gusaba umwanya impande y’icyumba cye, tukaganirira aho. Ikintu cyansetsaga ni ukuntu twahagararaga tukaba twamara isaha tutararebana mu maso.

IGIHE: Umaze gukundana n’abakobwa bangahe?

Mani Martin: Ntabwo nabavuga bose ariko barenze icumi.

IGIHE: Ikintu cyakubabaje mu buzima ni ikihe ?

Mani Martin: Kugeza ngannye gutya umbajije ikintu cyambabaje kurusha ibindi byose, ni urupfu rwa Mama wanjye. Kubera ko kimwe n’undi muntu wese, mama w’umuntu aba ari intwari ye, ariko njye aya ni amateka yanjye.

Mama wanjye yari umubyeyi utarabaye mu mujyi, utarahuye n’ubumenyi bwinshi abantu baba bazi, ariko hari ikintu kimwe yari azi, ko mfite impano, akumva ko ndi umwana ufite ikintu kidasanzwe muri njyewe, agakunda no kubimbwira kenshi.

Ikintu cyambabaje kurusha ibindi byose ni uko yagiye mbere cyane atarambona ku rubyiniro ndirimba, atarambona kuri televiziyo […] mu by’ukuri ntiyigeze abona aho ya mpano yambonagamo imaze kugera. Buri gihe ni ikintu gishobora kumbabaza, ni nayo mpamvu ahantu hose ndi mba numva hari icyuho cya mama wanjye gihari.

IGIHE: Byabaye ryari ?

Mani Martin: Nari nkiri muto ndi mu wa mbere w’amashuri yisumbuye.

IGIHE: Ni ikihe kintu cyatuma ubeshya?

Mani Martin: Nyine naba ngiye gukiza ubuzima, ariko ubundi si ikintu gipfa kumbaho.

IGIHE: Mu muziki ufite izihe gahunda?

Mani Martin: Gahunda mu muziki ni nyinshi cyane. Urabona mu mwaka washize nakoze album y’indirimbo 15 yitwa ‘Afro’ akaba ari iya gatanu. Sinahise nshyira hanze indirimbo zose, niyemeje ko iyo nzajya nkorera amashusho nzajya mpita nyishyira hanze urwo nirwo rugendo ndimo.

IGIHE: Umushinga w’indirimbo yawe na Sauti Sol ugeze he?

Mani Martin: Indirimbo yanjye na Sauti Sol irahari gusa habonetse akabazo mu mashusho yayo, ntabwo ikipe yabo yose yayumvikanyeho ariko kugeza ubu nta n’ubwo turanzura ko tuyiretse kandi kuko twari twemeje ko izasohokana n’amashusho, mu byo twari tumaze iminsi tuvuganye ni uko haba hasohotse amajwi yayo ariko nabyo ntiturabyemeza.

Mani Martin avuga ko aterwa agahinda no kuba umubyeyi we yaritabye Imana atabonye impano y'umuhungu we ibyara umusaruro
Uyu musore w'imyaka 29 ari mu mishinga ikomeye y'indirimbo ziri kuri album ye nshya

Amafoto & Video: Salomo George


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza