Ibanga ry’u Rwanda, inkunga z’u Buyapani n’ibindi: Ikiganiro na Perezida wa JICA ku Isi

Yanditswe na Rabbi Malo Umucunguzi
Kuya 22 Nyakanga 2019 saa 10:48
Yasuwe :
0 0

Perezida w’Ikigega cy’u Buyapani gishinzwe Ubutwererane Mpuzamahanga, JICA, Shinichi Kitaoka, yagaragaje ko umubano w’u Rwanda n’u Buyapani ukomeje gutanga umusaruro, kandi bitewe n’ubuyobozi bwiza u Rwanda rufite, uzakomeza kongererwa imbaraga.

U Buyapani ni umuterankunga ukomeye w’u Rwanda, aho nibura guhera mu 2008 kugeza mu 2017, bwahaye u Rwanda inkunga igera hafi kuri miliyoni $350 binyuze muri JICA. Yashyizwe ahanini mu nzego zirimo Iterambere ry’ibikorwa remezo bifasha mu bukungu, ubuhinzi, ikoranabuhanga, kongera ubushobozi bw’abakozi n’ibindi.

Mu bikorwa byabyawe n’ubwo bufatanye harimo abaturage 131,000 bagejejweho amazi meza mu Burasirazuba; ihangwa rya FabLab rimaze gutuma havuka ibigo bisaga 62; abakorerabushake 280 bagize uruhare mu bikorwa binyuranye mu Rwanda n’amashanyarazi yagejejwe ku baturage 195,000 inyubako 65 z’ubuyobozi n’ibigo nderabuzima icyenda.

Hubatswe kandi ibikorwa birimo umupaka uhuriweho wa Rusumo na kilometero 145 z’imihanda ihuza u Rwanda n’abaturanyi; abanyarwanda 1165 bungukira ubumenyi mu Buyapani; hahugurwa abarimu 63,563, n’ibindi byinshi.

Mu kiganiro Kitaoka yagiranye n’itangazamakuru, yagarutse ku ngingo zitandukanye zirimo umubano n’u Rwanda, ibikorwa u Buyapani bukomeje guteramo inkunga muri iki gihugu n’ibindi. Yari kumwe n’uhagararye JICA mu Rwanda, Maruo Shin.

Ni izihe ntego z’uruzinduko rwawe?

Kotaoka : Nkunda gukora ingendo mu bihugu bitandukanye, iyo ibiro byacu bitarimo gukora neza tuba tugomba kubisura kugira ngo tumenye impamvu, ariko ku rundi ruhande n’iyo birimo gukora neza cyane, dukunda kubisura ngo nabwo tumenye uko bakora. Ibyo mu Rwanda rero byo ni byo biro bya Jica muri Afurika bikora neza cyane mu buryo butandukanye.

Icya mbere ntabwo ari mu bihugu byinshi dushobora gutanga inguzanyo, kuko hagomba kuba hari uburyo bwizewe mu gihugu kubera ko turimo gukoresha imisoro, kubera inshingano zacu ku misoro y’abaturage, ntabwo twatanga inguzanyo cyane ku bihugu bifite imikorere mibi mu bijyanye n’imari.

Muri iki gihugu ho bimeze neza. Mu bindi bikorwa dukorana n’ibihugu harimo impano, ubutwererane mu bya tekiniki, hari n’ibikorwa by’ubutabazi nk’igihe hari ibiza, dufite gahunda y’abakorerabushake u Buyapani bwohereza mu bihugu bitandukanye, aho uyu munsi no mu Rwanda hari abagera kuri 41.

Mu mikorere yacu tugerageza kwicarana n’ibihugu tukareba icyo twakorana, ni nayo mpamvu twitwa Ikigega cy’u Buyapani cy’Ubutwererane mpuzamahanga, aho kuba Ikigega Nterankunga cy’u Buyapani, twumva ko iyi mikorere ariyo ikwiye.

Ni iki cyatumye ibikorwa bya Jica mu Rwanda bigera ku ntego

Kitaoka : Hari imikoranire myiza hagati y’u Buyapani n’u Rwanda, ibyo rukeneye bihura neza n’ibyo natwe twifuza gutanga. Kubaka imihanda, gukwirakwiza amazi, ubuvuzi, ni ibintu bikomeye mu bufatanye bwacu.

Igikomeye ni uko uburyo bukoreshwa mu gutuma iki gihugu gitera imbere, urugero nka Perezida Kagame yita cyane ku iterambere ry’Ikoranabuhanga, ibi ni ingenzi kuko [u Rwanda] ni igihugu kidakora ku nyanja, kandi urwego rw’ikoranabuhanga rushobora kwihutisha cyane ibindi bikorwa.

Ikindi inkunga yacu mu kubaka imihanda, ituma u Rwanda rubasha gukorana n’ibindi bihugu bituranye, ni ingenzi cyane. Ikindi ni uko yitaye cyane ku rwego rw’ubuzima nk’ikibazo cyo kugwingira by’umwihariko, turimo kwita cyane ku buzima, imirire, ubuhinzi, ni ibintu twitayeho cyane.

Maruo Shin: Ikindi ni Ikawa, harimo umushinga wihariye kuko u Rwanda ni igihugu kigira ikawa nziza, ubu turimo gukorana mu mushinga w’ubufasha mu bya tekiniki bitari gusa mu guhinga ahubwo no mu gutunganya no kumenyekanisha ubuhinzi bw’ikawa mu Rwanda.

U Buyapani ni igihugu cyahuye n’ibibazo byinshi birimo intambara, ariko ubu ni igihugu gikomeye ndetse u Rwanda ni igihugu cyanyuze muri Jenoside ubu kirimo kwiyubaka. Hari amasomo ibihugu byombi byasangira?

Kitaoka : Igisubizo cyanjye cyoroshye ni uko ibihugu burya biratandukanye, buri gihugu hari amahirwe cyihariye. Ahagana mu 1860, ni mu myaka isaga 150 ishize, u Buyapani bwagize igihe cyo kwiheza, ariko buza kubona ko nibukomeza kubaho bwonyine budashobora kuzahangana n’ibihugu byo mu Burengerazuba bw’Isi. Kugira ngo tubashe guhangana nabyo byasabye gukora cyane, nyuma u Buyapani buza kuba kimwe mu bihugu bikomeye.

Ariko u Buyapani bwakoze amakosa bujya mu ntambara mbi, burahatikirira, mu 1945. Ubwo nasuraga urwibutso [rwa Jenoside rwa Kigali], nahise nibuka Hiroshima na Nagasaki. Muri Hiroshima, abantu ibihumbi 250 bapfuye ako kanya, muri Nagasaki ho ni hafi kimwe cya kabiri. U Buyapani bwanyuze mu bihe twamanitsemo amaboko. Byasabye ingufu nyinshi kugira ngo twongere kubaka igihugu cyacu.

Dufite amateka yenda gusa, u Rwanda rwavuye muri Jenoside, yego hari ubufasha bw’ibihugu bimwe bwabayeho ariko uruhare rukomeye rwabaye urw’Abanyarwanda ubwabo. Natwe ni uko twakoresheje imbaraga zacu, aho guhindukirira Amerika, u Bufaransa n’abandi, twahisemo kureba imbere ngo twongere kubaka igihugu.

Ubumwe hano ni ingenzi. Perezida Kagame ubwo yazaga mu Buyapani ku nshuro ya mbere yasuye Hiroshima, yunamira abahaguye, hari ibintu duhuriyeho, ni amateka yo kubasha kwivana mu bibazo.

Ku buyobozi bwawe ni iki umaze kubona mu mikorere ndetse n’imikoranire y’ibihugu bya Afurika n’ibindi

Kitaoka:Hari ibihugu bimwe nasuye, Malawi, Zambia, wasura nk’iguriro ugasanga ibintu byinshi bitumizwa mu mahanga, n’ibintu bisanzwe biri aho. Aho biragoye gutera imbere. Ibyo ugasanga biva mu Bushinwa. Ni ngombwa guharanira kwikorera bya bintu by’ibanze, mwe ubwanyu. Aho ntekereza ko bitewe n’ikirere, mwe mufite igihugu cyiza kibereye ubuhinzi, kuba Perezida Kagame arimo kwibanda ku buhinzi ni ikintu cyiza.

Ntekereza ko muri iyi minsi ibihugu bito bifite imiyoborere myiza birimo kugenda bitera imbere, kandi binyuze mu kuzirikana ko ari byo bigomba kwikorera ibyo bikeneye kurusha kubwira ibihugu bikomeye ngo muduhe ibi, ahubwo bigahaguruka bigakora wenda bikavuga ngo mudufashe aha. Ni uburyo bwiza.

Ariko hari n’ibindi bihugu muri Afurika, naje hano mvuye muri Congo ariko mumbabarire kubivuga, ni igihugu kinini, gifite amahirwe menshi ariko ni kinini cyane ku buryo bigoye kukiyobora. Biragoye gushyiraho uburyo buhamye bw’iterambere. Hari imishinga myinshi ikenewe hirya no hino mu gihugu, ariko ugasanga bigoye kubona icyo uheraho. Ibi bikorwa nyamara muri iki gihugu gito, ku buryo aya ari amahirwe aho kuba ikibazo ku bihugu bito.

Ikindi iyo ugereranyije iterambere ry’ibihugu bya Afurika n’ibya Aziya, abayobozi ba Aziya bakomeje kwitwararika ku bijyanye na ruswa. Muri Afurika ho harimo ruswa usanga itarangira. Umuyobozi ushoboye kandi utihanganira ruswa, ni ingenzi cyane kugira ngo igihugu cye kigere ku iterambere.

Hari gahunda yo kwagura ibikorwa mufite mu Rwanda ngo bigere mu zindi nzego

Maruo Shin: Dukorana na Guverinoma y’u Rwanda, tugendera kuri gahunda yayo y’iterambere. Kimwe mu bintu bikomeye muri iki gihe ni uguteza imbere ubukerarugendo bushingiye ku nama, gushyiraho ibirwa nk’iyi KCC yakira inama mpuzamahanga.

Ni imwe muri gahunda y’iterambere ry’igihugu, ku bw’ibyo, ukoroshya ingendo muri Kigali ni ngenzi cyane. Ubu imiterere y’umujyi wa Kigali imeze neza ugereranyije n’ibihugu duturanye nka Dar Es Salaam, Nairobi, Kampala. Umubare w’imodoa urimo kwiyongera, bityo imwe mu ngamba zikomeye zikwiye gufatwa mbere y’uko duhura n’ibibazo bimeze nk’ibyo mu bihugu duturanye. Ubu rero turimo gufasha mu bijyanye n’ubwikorezi, ariko twifuza no kugira uruhare mu gukemura ibibazo biri muri uru rwego, ni kimwe mu bikorwa duteganya gushyiramo imbaraga bijyanye na gahunda y’igihugu y’iterambere.

Ni iki giteganywa mu kurushaho guteza imbere ubumenyi ngiro mu Rwanda?

Maruo Shin: Tumaze igihe dutera inkunga Ishuri Rikuru ry’ubumenyi ngiro rya Tumba, turashaka kureba uko twarushaho gukorana kuko Ishuri rya Tumba rifatwa nk’ikigo cy’icyitegererezo mu Karere ka Afurika y’Iburasirazuba, turifuza gushyigikira icyo gitekerezo, kugira ngo dufashe ishuri rya Tumba maze imbuto ziryeraho tuzisangize akarere muri rusange.

Hari ubutumwa ufitiye abanyarwanda?

Kitaoka:Mu nama iheruka ya TICAD yabereye muri Kenya mu myaka itatu ishize no mu nama iri imbere ya Yokohama, Perezida Kagame yagize uruhare rukomeye mu bayobozi ba Afurika, ni umuntu wubashywe mu Buyapani kandi dufitanye imikoranire myiza, dusangiye amateka yo kubasha kwivana mu bibazo bikomeye, duhuzwa n’amateka kandi ntekereza ko uyu mubano twarushaho kuwuteza imbere.

Uru ni uruzinduko rwanjye rwa kabiri muri iki gihugu kandi mu ruzinduko ruheruka nahise mbona ko iki ari igihugu cyiza kandi kizakomeza kurushaho kuba cyiza.

Muri igihugu kirimo gutera imbere mu buryo bwacyo, ni ibintu nubashye cyane.

Shinichi Kitaoka yagiranye ikiganiro n'itangazamakuru ari kumwe na Maruo Shin uhagararye JICA mu Rwanda
Kitaoka yashimye imiyoborere y'u Rwanda ikomeje gutuma rutera imbere
Kitaoka avuga ko u Rwanda n'u Buyapani bisangiye amateka yo kwivana mu bibazo, bikabasha gutera imbere
U Buyapani bwibanze cyane ku mpano n'ubufasha mu bya tekiniki mu nkunga buha u Rwanda

Amafoto: Himbaza Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza