Uko Muhoza w’imyaka 22 yatangije umushinga wo kurengera ibidukikije akanabihemberwa n’Ubwami bw’u Bwongereza

Yanditswe na Habimana James
Kuya 16 Nyakanga 2019 saa 10:49
Yasuwe :
0 0

Iyo havuzwe ‘My Green Home’ humvikana amazina y’abantu babiri, Muhoza Rosette na David Kinzuzi, abanyeshuri babiri biga muri Kaminuza ya Kepler mu Mujyi wa Kigali.

Umuhoza Rosette yiga ibijyanye n’icungamutungo mu mwaka wa nyuma naho Kinzuzi yiga ibijyanye no gucunga ubuzima (Health Care management).

Uyu ni umushinga Muhoza afatanyije na Kinzuzi batangije mu myaka ibiri ishize, ubyaza ibikomoka kuri pulasitiki mo ibikoresho nk’amapave yifashishwa mu kubaka ibipangu, inzu, inzira y’abanyamaguru n’ibindi.

Mu myaka ibiri umaze, uyu mushinga umaze gutsindira ibihembo bitatu harimo icyitwa Green Growth Innovation Award cyatangiwe mu nama ya Youth Connekt 2018, aha bahembwe ibihumbi bitanu by’amadorali ya Amerika, icya kabiri ni icyo mu irushanwa ry’urubyiruko rufite imishinga yahindura ubuzima bw’abaturage cyiswe’ Pitch Night’ 2018, aha ho batsindiye ibihumbi bitanu by’amadorali.

Icyo uyu mushinga uheruka gutsindira ni icyo muri uyu mwaka cyiswe Commonwealth Innovation Award, aho bagiherewe i Londres mu Bwongereza, cyari gifite agaciro k’ama-pound 2500.

Ikiganiro kirambuye Muhoza Rosette yagiranye na IGIHE

IGIHE: Ukiri muto wumvaga uzajya mu byo kurengera ibidukikije?

Muhoza: Nkiri umwana numvaga nshaka kuzakora ikintu cyafasha umuryango ntuyemo, numvaga nzaba umuganga nkajya mvura abantu ariko nyuma ngiye kurangiza amashuri yisumbuye muri Fawe Girls School mu Mujyi wa Kigali, ibintu by’ubuganga nabyo byamvuyemo ahubwo numva nzaba nk’umujyanama mu by’ubuzima, numvaga najya kwiga hanze y’u Rwanda ariko naho ntibyaje gukunda.

Nyuma nasabye kwiga muri Kaminuza ya Kepler baramfata mpita njya kwiga icungamutungo, muri rwa rugendo rwo kumenya icyo umuntu ashaka mu buzima bwe nibwo navuze nti ni iki nakora?

Ariko mu buzima bwanjye nakuze ndi umuntu ukunda gukora ibintu byanjye, numvaga ko nubwo nakwiga ntagomba kuba wa muntu uzajya gusaba akazi.

Njyeze muri Kaminuza nasanze nayo ifasha abantu kwishakamo impano, batubwiye ko tujya hanze mu miryango tukareba ibibazo bihari kandi tukanashaka ibisubizo, njye na mugenzi wanjye Kinzuzi nibwo twakoze ku bijyanye n’ibidukikije kuko twasanze ari ikibazo cyugarije Isi bitari u Rwanda gusa, nk’urubyiruko twasanze tugomba gutanga umusanzu wacu.

Aha niho twavuze ngo dushake igisubizo kidasanzwe cyafasha abantu ariko kirimo ubundi buhanga.

Mu 2018 haje irushanwa ryateguwe na UNICEF rifasha urubyiruko mu bintu bitandukikanye birimo uburezi, ibidukikije, ubuganga, ikoranabuhanga n’ibindi, natwe rero twari dufite umushinga ariko nta mafaranga dufite.

Tubonye ayo mahirwe twatanze umushinga wacu, ubwa mbere twari abantu 100 kandi bashakamo barindwi, twaratsinze tuza muri barindwi ndetse tuza no kugera mu bahatana bwa nyuma, turatsinda baduhemba ibihumbi bitanu by’amadorali ya Amerika.

IGIHE: Ayo mafaranga yabafashije iki?

Muhoza: Tukimara gutsinda twagaragaraye ahantu henshi, abantu bamwe batangira kuvuga ngo twakize ariko nyamara ntabwo twahise tuyabona, twayabonye hashize umwaka wose, ibi ni ibintu bisa nkaho byaduteye intege nke ariko twakomeje kwihangana.

Nyuma tuyabonye twaravuze ngo reka dutangire dukore, twashatse ahantu hahendutse, dukodesha ahitwa Batsinda muri Kagugu, twahise dutangira gushaka imashini izajya ikora ayo mapave ariko abantu bakomeza kudutenguha, nyuma twatekereje ko muri IPRC bashobora kudufasha, ubu nibo barimo kuyidukorera turashaka ko byihuta ku buryo uku kwezi byaba byarangiye.

IGIHE: Muzajya mukoresha ibihe bikoresho?

Muhoza: Tuzajya dukoresha amapulasitiki y’amacupa harimo nk’ay’amazi, udukombe n’ibindi, dufitanye ubufatanye na REMA kuko twari twabasabye ko twajya tugera ku myanda aho iri hose, baduhuje n’Umujyi wa Kigali ariko ubona ko byatinze, turashaka ko twazajya tugera ku kimoteri cya Nduba kuko hari amapulasitiki menshi kandi ntacyo akora, twamaze no gukorana n’amahoteli ane batubwiye ko badafite abajyana iyo myanda.

IGIHE: Mwumva muzahaza isoko ry’u Rwanda?

Muhoza: Gahunda ihari ni uko twajya duha abantu bashaka kubaka inzu zabo, nyuma wenda tukazakorana n’ibigo bikomeye byubaka imihanda.

IGIHE:Uherutse guhembwa n’ubwami bw’u Bwongereza? Byagenze gute?

Muhoza: Kugira ngo menye iki gihembo byaciye kuri internet. Kubera akazi dukora tugenda dushakisha aho hose batera inkunga, aha rero nibwo twabonye batanga ibihembo bibiri, kimwe cyitwa Commonwealth Innovation Award n’ikindi cyitwa Commonwealth Youth Award, gusa mu cya commonwealth Youth Award cyo ntibadufashe.

Bigeze muri Nzeri umwaka ushize nibwo batubwiye ko baduhisemo ariko badusaba ko tugomba gutanga abantu bazi akazi kacu bakabahamagara, twarabatanze barababaza basanga koko hari ibyo dukora, muri Afurika twatsinze turi ibihugu bitatu, muri rusange twari abantu 15 bavuye ku Isi yose.

Igihembo ngishyikirijwe n’igikomangoma Harry, mu by’ukuri natunguwe n’ukuntu yishimiye kuba mvuye mu Rwanda, yarambazaga ngo ko mu Rwanda nta pulasitiki mugira ibi bintu ubikora gute? Wabonaga ko na we azi neza ko mu Rwanda nta kintu cy’umwanda kiharangwa.

IGIHE: Intego mufite ni yihe?

Muhoza: Dufite intego yo kuzakomeza guhangana n’ikibazo cy’ibintu byose byangiza ibidukikije ariko ikibazo ni amafaranga, uyu ni mushinga ukeneye amafaranga menshi kandi ayo tumaze gukorera ni make, twasabaga REMA kujya idufasha ikadukomangira kuri iyo miryango yafasha ibikorwa byacu.

Igikomangoma Harry yishimiye kuganira na Rosette wari i Londres mu Bwongereza
Igikomangoma Harry yitegereza igikombe Rosette yari amaze gutsindira
Aha Muhoza Rosette yari hagati y'igikomangoma Harry n'Umunyamabanga Mukuru wa Commonwealth, Patricia Scotland

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza