Uko Miss Iribagiza yagize intumbero yo guhashya SIDA mu ndaya (Video)

Yanditswe na Uwiduhaye Theos
Kuya 5 Mutarama 2021 saa 11:46
Yasuwe :
0 0

Iribagiza Patience wari uri mu bakobwa batanu batorewe guhagararira Uburasirazuba muri Miss Rwanda 2017, akaza no kuba muri 15 bitabiriye umwiherero ariko ntabashe kwegukana ikamba, amaze iminsi atangiye urugamba rwo guhangana na Virusi itera SIDA ahereye mu bakora uburaya n’urubyiruko rutandukanye.

Mu kiganiro yagiranye na IGIHE yavuze ko yatekereje iki gikorwa ubwo yari muri Miss Rwanda, ariko ntibihite bimukundira kubera ubushobozi buke.

Ati “Byatangiriye muri Miss Rwanda. Natekereje ikintu nakora umwaka umwe nkaba mvuze ngo iki nicyo maze kugeraho nk’uko umutima wanjye wabyifuzaga, mbona nta kintu naba maze kugeraho bitewe n’ubushobozi buke. Nyuma natekereje uburyo nakora ibyo nkora byagera ku bantu benshi mfatanyije n’abandi bari bafite umutima wo gufasha Abanyarwanda.”

Uyu mukobwa w’imyaka 22 yavuze ko yahise atangiza Afro Ark, bivuze ’Inkuge ya Afurika’. Uyu muryango wibanda ku buzima bw’imyororokere uhugura abantu ku kurwanya Agakoko gatera SIDA, uburenganzira bwa muntu cyane ku bw’abagore n’abakobwa, kurwanya ihohoterwa rishingiye ku gitsina no guteza imbere umugore mu buryo bwose bushoboka.

Avuga ko hari abantu bamwe bajya bamwibeshyaho kubera ko baba babona ari umwana, ariko we avuga ko kwigisha ibintu nk’ibi bitagombera kuba umuntu akuze.

Ati “Iyo umuntu afite imyaka icyenda bitewe n’uko wakuze uba utangiye kugira imihindagurikire mu mubiri wawe, akenshi usanga na none ababyeyi batatuganiriza kuri iyo mihindagurikire ahubwo akakubwira ngo wirinde abasore cyangwa umukobwa. Umwana akajya kureba ikintu cyatumye ababyeyi bamubwira gutyo. Njye rero mbona ntari umwana ku buryo ntabasha gutanga inyigisho zijyanye n’imyororokere, ni nayo mpamvu natangije uyu muryango.”

Bakorana bya hafi n’abagore barimo n’abakora umwuga w’uburaya ndetse avuga ko babigisha ibintu bitandukanye, kugira ngo barebe ko bahindura imyumvire bakabuvamo.

Ati “Guhindura umuntu ngo ave muri uwo mwuga biragoye cyane ko nta kindi kintu aba ashora kugira ngo abone amafaranga, ariko twe dutekereza ko nyuma y’ibyo byose hari ingaruka bizagira. Turabigisha kuri Virusi itera SIDA ndetse n’ibijyanye no gutwara inda zitateganyijwe. Tubashishikariza kwipimisha, aho tubasanga aho bari tukajya kubigisha, tukabapima SIDA ku bushake ndetse abashaka kuboneza urubyaro tukabafasha.”

Avuga ko uretse ibyo banafite gahunda zitandukanye zigamije gufasha abakora umwuga w’uburaya kwiteza imbere, ndetse n’ababyaye bakiri bato bakabafasha.

Ati “Dufite gahunda yitwa urubohero. Twatangiye dufasha abakobwa babyaye bakiri bato, nyuma tuza kubona n’ababa bari mu buraya tubazanyemo byaba byiza. Tumaze kugira aho biga kuboha, abantu barenga 100 nibo twafashe, bitewe n’ubushobozi dufata bake. Muri abo 100, 15 nibo babashije gusoza amasomo yabo mu minsi ishize. Ubu babasha kuba bagurisha ibyo baboshye bakabikuramo amafaranga.”

Avuga ko bibanda ku bagore ariko na none ntibirengagize umugabo kuko asizwe inyuma impande zasumbana.

Uretse ibyo bafasha n’abaryamana bahuje ibitsina babagana bashaka serivisi zitandukanye kuko ngo nabo ari abantu nubwo rimwe na rimwe sosiyete ibafata ukundi.

Ati “Ikintu dukora ni ukubashishikariza kwipimisha, tukabereka uko birinda kuko numureka ntabwo uba uzi undi muntu ari buhure nawe. Numureka ngo n’uko aryamana n’undi bahuje ibitsina nta kintu uzaba ukemuye, nubigisha uko bakwiriye kwirinda ukanamuha serivisi ashaka bizaba byiza kuko ndibaza ko ukwiriye kumufasha kuko ari umuntu. Nawe aza yikandagira ariko tugerageza kumwereka ko ari umuntu nk’abandi.”

Ku bufatanye n’Ikigo cy’Igihugu gishinzwe Ubuzima, RBC ku nkunga ya UNAIDS - Rwanda, mu rwego rwo kurwanya virusi itera SIDA mu mwaka ushize Afro Ark yigishije abantu 60 bafite ibyago byinshi byo kwandura no kwanduza virusi itera SIDA muri Kinyinya, Kagugu ndetse na Kabuye.

Iribagiza Patience ufite imyaka 22 yiyemeje guhangana n'icyorezo cya Virusi itera SIDA cyugarije u Rwanda n'Isi muri rusange
Iribagiza yatangije urugamba rwo guhashya virusi itera SIDA abinyujije muri Afro Ark

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .