00:00:00 IGIHE NETWORK KN KINYARWANDA EN ENGLISH FR FRANCAIS

Uburyo bugezweho bwa makeup za tattoo, bwavunnye amaguru abisigaga ’tilo’

Yanditswe na Mukahirwa Diane
Kuya 29 March 2022 saa 12:06
Yasuwe :

Buri mwuga wose iyo uwufitiye urukundo urawumenya kandi ukawukora neza nta kabuza. Urugero rwiza ni Shema Yves wakuze yisanga mu bugeni akiyegurira cyane ibijyanye na tattoo.

Uru rukundo nirwo rwakomeje kumugurumanamo kugeza mu 2016 ubwo yafataga umwanzuro wo kujya muri Kenya kwiyungura ubumenyi mu gutera tattoo.

Nyuma yo kunguka ubumenyi yasubiye mu Rwanda ariko ku bwo gushaka imibereho ajya kuba umu-Dj, rwa rukundo rwongeye kumukurura agaruka mu gutera tattoo.

Yinjiye ku isoko azanye umwihariko wa tattoo za makeup ariko abantu batarabyumva abanza guhangana nabyo gusa ntibyatinze kuko abantu baje kubona ko bikenewe.

Shema yatangiye afite umukiliya umwe na we byamusabye igihe kirerekire kumwumvisha ko akwiye kumukorera. Bitewe n’ubunyamwuga akorana yaje kwaguka ubu ku munsi akorera abantu batandatu kandi abakiliya baba ari urujya n’uruza.

Shema yavuze ko yatangiye akorera undi muntu. Yavuze ko gutera tattoo byamuhaye ubushobozi bwo kubaho ubuzima yahoze yifuza kandi ko yabonye ubushobozi bwo gutangira studio ye.

Ati “Ubu mbayeho ubuzima nahoze nifuza, icyo nifuza nk’umusore mbasha kukibona, ikindi kandi nabashije kubona akazi ubu mfite studio yanjye ikora tattoo inyinjiriza ubu ubuzima bwarahinditse.”

Ni makeup ifite umwihariko

Wari wajya ahantu wakererewe cyangwa hagutunguye ukagenda utisize makeup kubera kwihuta? Niba byarakubayeho ushobora kumva neza akamaro ka makeup za tattoo.

Abantu bisiga makeup usanga ku gihe cyabo cyo kwitegura barenzaho umwanya wo kuzisiga, ibintu usanga hari abo bigora byagera kuri wa wundi utazi kuzisiga neza bikamubera imbogamizi.

Hari abandi baba batazi no kwisiga tilo na gato kandi bakunda gucya no kugira ubundi bwiza bwongerwa na makeup.

Iyo utabizi nta yandi mahitamo uba ufite, igikorwa wubashye ugiyemo ushaka ababizobereyemo aribo ‘makeup artists’ bakagufasha.

Ubu ubuzima bwaroroshye kuko ubaye ukunda makeup ariko utazi kuzikorera cyangwa udafite umwanya uhagije ushobora gushyirishaho izimara igihe kirerekire za tattoo ugatandukana no guhora wisiga.

Hari ubwoko butandukanye bwa makeup za tattoo burimo ‘Micro blading’ ubu akaba ari ubwo ku bitsike butuma udahora wisiga tilo. Hari ‘Permanent Eyeliner’, uyu ni wa murongo bashyira hejuru y’ijisho na Permanent Lip Tinting, ituma udohora wigisa ku munwa n’izindi.

Izi tattoo za makeup zikorwa mu buryo butandukanye ariko mu Rwanda hamenyerewe iya Micro blading, ubona ko abantu benshi batangiye kuyitabira kuko iborohereza guhora bisiga tilo.

IGIHE mu kurushaho gusobanukirwa imikorerere y’iyi tattoo, yaganiriye na Shema usanzwe atera tattoo zitandukanye ariko yibanze kuri izi zo ku bitsike asobanura imikorere yayo n’ibyo kuyigengeseraho.

Tattoo yo ku bitsike ivaho

Abenshi bamenyereye tattoo zishyirwa ku bindi bice by’umubiri ariko zitari iza makeup, izi zirimo ibice bibiri izishobora kuva ku mubiri cyangwa izijyaho zikagumaho.

Shema yavuze ko tattoo za makeup zitamara ku mubiri ubuzima bwose ko ahubwo imaraho igihe kinini ari imyaka itanu, bitewe n’iyo ushaka bavanga imiti itandukanye ikamaraho cya gihe wifuza.

Ati “Imiti ya tattoo zisanzwe itandukanye n’iza makeup. Iyo isanzwe ikugiyeho ni burundu kandi ntabwo zishyirwa mu maso ariko iya makeup imara igihe kinini n’imyaka itanu, ubundi ni umwaka umwe cyangwa ibiri biterwa n’ubushake bw’umukiliya.”

Yakomeje avuga ko igihe tattoo imaraho biterwa n’ibara ry’uruhu rw’uyishyiraho ndetse n’ibara yashyizeho.

Ati “Hari uruhu rushobora kumara umwaka umwe cyangwa ibiri, iyo ari umuntu w’igikara biba bitandukanye n’umuntu w’inzobe cyangwa witikuje, uw’inzobe uba ufite amahirwe ko ushobora kumara umwaka umwe kuko uyikora wayoroheje cyane cyangwa idafashe cyane.”

Shema yavuze ko mu gutera umuntu tattoo buri mukiliya agomba kugira ibikoresho bye yarangiza bikajugunywa.

Ati “Buri muntu aba afite ibikoresho bye, iyo umwe avuyeho ibyo yakoreshejweho birahindurwa niyo mwaba mufitanye isano birahindurwa. Buri mukiliya dufungura ibikoresho areba.”

Yavuze ko byaba byiza ukoze ubushakashatsi bwimbitse, ukabanza kumenya uko ikora kandi ukanamenya n’ugiye kuyigushyiraho ubumenyi abifitemo.

Ibi bijyana n’ibyo ukwiye kubahiriza nyuma yo kuyishyiraho kugira ngo ifate neza. Shema yavuze ko mu cyumweru cya mbere uba ugomba kwitwararika kugira ngo uzagire tattoo isa neza.

Ati “Iyo tumaze kugukorera umara icyumweru hari ibintu witwararika kugira ngo itavaho birimo kwirinda gusigaho amavuta aho twayisize,. Ntabwo ugomba kuhakaraba isabune, kudashyiraho izindi makeup, kutajya muri casque yo muri salon, gusigaho amavuta ya vaseline no kwirinda koga amazi ashyushye.”

Nubwo Shema amaze gutera imbere, avuga ko agifite imbogamizi z’ibikoresho kuko ntaho yabikura mu karere, abikura kure bikamugeraho bihenze bikaba byatuma n’ikiguzi aca umukiliya cyiyongera.

Shema ari mu bantu batangije uburyo bwa tattoo za makeup mu Rwanda
Iyi tattoo ishobora kumaraho umwaka cyangwa ibiri
Shema azobereye no mu gutera izindi tattoo
Umukobwa washyiriweho iyi tattoo ntibimusaba kongera kwisiga tilo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .