00:00:00 IGIHE NETWORK KN KINYARWANDA EN ENGLISH FR FRANCAIS

Ibyihariye kuri Padiri De Jamblinne witandukanyije na Parmehutu akarwana ku Batutsi guhera mu 1959

Yanditswe na Akayezu Jean de Dieu
Kuya 14 Ugushyingo 2021 saa 07:39
Yasuwe :
0 0

Umubiligi Padiri Stanislas De Jamblinne wabaye Umumisiyoneri mu Rwanda kuva mu myaka ya 1950 ndetse akaza gukomeza umurimo w’Ubupadiri kugeza mu 2000, yitabye Imana ku wa 12 Ugushyingo 2021 afite imyaka 99.

De Jamblinne wari umaze imyaka 74 mu bikorwa by’ubumisiyoneri mu bihugu by’u Rwanda, u Burundi ndetse n’u Bubiligi, yaguye mu gace ka Evere mu Murwa Mukuru, Bruxelles.

Mu gihe yamaze mu Rwanda yakoze imirimo itandukanye irimo kuyobora Ishuri rya Rwaza, irya Kansi nyuma mu 1959 agirwa Padiri Mukuru wa Paruwasi ya Cyanika [hari muri Perefegitura ya Gikongoro].

Umusaza Sebagabo Simon uri mu bazi neza ubuzima n’imibereho ya Padiri De Jamblinne, yabwiye IGIHE ko yari atandukanye n’abandi bapadiri bera [Abamisiyoneri] b’Ababiligi babaye mu Rwanda.

Sebagabo yavuze ko mu 1959, ubwo Abatutsi bo hirya no hino mu gihugu batangiraga kwicwa, abandi bakameneshwa, bagatwikirwa ibyabo, Padiri De Jamblinne yabirwanyije cyane.

Ati “Icyo gihe ubwicanyi bwatangiye ataramara umwaka i Gikongoro, ariko yari yaratangiye kuba inshuti n’abaturage bose, we iby’amoko ntabwo yari abizi. Nyuma rero atangiye kubona ko bamwe mu bakirisitu be batangiye kwicwa no gusenyerwa biramubabaza cyane.”

Yageze i Gikongoro mu bihe by’amage

Mu 1959, Sebagabo [yari afite imyaka 17 icyo gihe] yari umunyeshuri mu Iseminari ya Kabgayi. Yakomokaga muri Paruwasi ya Cyanika ari naho iyo umwaka warangiraga yajyaga kwerekana amanota cyangwa akajya gushakayo ibindi byangombwa.

Avuga ko icyo gihe aribwo yahise amenyana na Padiri De Jamblinne ari na we wayoboraga iyo Paruwasi ya Cyanika nka Padiri Mukuru wayo.

Mu kiganiro yagiranye na IGIHE, yagize ati “Yari umuntu mwiza, ndibuka ko icyo gihe badutegekaga ko umupadiri mukuru wa paruwasi yacu ari we ugomba kutureberera, ubwo buzima rero nibwo twabanyemo.”

Ku rundi ruhande ariko, mu mwaka wa 1959, nibwo Abatutsi bari hirya no hino mu gihugu batangiye kwicwa, abandi barameneshwa ndetse hari n’abatwikiwe mu byabo.

Sebagabo avuga ko Padiri De Jamblinne yakoze ibitandukanye n’ibyo abandi bamisiyoneri [bari bashyigikiye iyicwa ry’Abatutsi n’ivanwaho ry’Ingomba ya Cyami], barebereraga ibikorwa by’ubunyamanswa byakorerwaga Abatutsi.

Ibivugwa na Sebagabo bishimangirwa n’Igitabo ‘Inzira ya Jenoside yakorewe Abatutsi’, cyanditswe na Minisitiri w’Ubumwe bw’Abanyarwanda n’Inshingano Mboneragihugu, Dr Bizimana Jean Damascène, kigasohoka mu 2014.

Abatanze ubuhamya muri iki gitabo bagaragaje ko uyu mupadiri yari umuntu w’intwari ndetse ibikorwa bye byabaga byuzuye ubumuntu, gutinya Imana no kubaha ibiremwa byayo.

Bagaragaje ko yarwanye ku Batutsi bo mu Bufundu ku buryo bwa gitwari yararaga amajoro abacikisha akabageza ku mipaka y’u Burundi, Repubulika Iharanira Demokarasi ya Congo na Uganda.

Bamwe mu batarashoboye kujya i Burundi nibo boherejwe ku ngufu mu Bugesera, Rukumberi, Bibwe, Muyinga n’ahandi.

Amateka agaragaza ko abo bantu bajyanwaga ahantu hadatuwe, hari ibihuru kandi harangwa n’umubu wa ‘Tse Tse’ hagamijwe ko bazaharimbukira bishwe n’inzara cyangwa uburwayi.

Ubwo buryo kandi bwo kwimura abantu ku gahato bajyanwa ahantu hadafite iby’ibanze mu mibereho yabo kandi bigakorwa hashingiwe ku bwoko bwabo, ni kimwe mu biranga Jenoside.

Yatakambiye Perefe Nkeramugaba

Igitabo cyanditswe na Dr Bizimana kigaragaza ko impunzi z’Abatutsi zatangiye guhungira kuri Paruwasi ya Cyanika ku wa 24 Ukuboza 1963. Nyuma y’iminsi itanu nibwo Padiri De Jamblinne yandikiye uwari Perefe wa Gikongoro, Nkeramugaba Andereya, amusaba kwita ku burenganzira n’ubuzima bw’izo nzirakarengane zahungaga urupfu.

Muri iyo baruwa ngo Padiri De Jamblinne yasoje abwira Perefe Nkeramugaba ko niba adatabaye izo nzirakarengane zari hafi kwicwa, zigizwe ahanini n’abagore n’abana ko bizabazwa ubuyobozi bwa Perefegitura kandi ko n’Imana yo mu Ijuru itazabimubabarira.

Padiri De Jamblinne yabyanditse agira ati “Izi mpunzi zageze hano kuri Paruwasi zihazanywe na kontabure wa komini witwa Antoni Mpatsagashi. Icyo gihe mwadusubije ko ku munsi ukurikiyeho komini yagombaga kuza kubatwara ikabasubiza mu byabo.”

“Nyuma yabwo ariko, mwebwe ubwanyu mwatuzaniye Bwana Kalaveri Sebihubi n’umuryango we mu modoka yanyu ahungira kuri paruwasi. Mugomba kuba muzi neza ko mu ijoro ryo ku wa gatanu saa tanu z’ijoro, bwana Komiseri wa Polisi yazanye ikamyo yuzuye abantu bahigwa guhera uwo munsi, umubare w’impunzi ugenda urushaho kwiyongera.”

Icyo gihe Padiri De Jamblinne yabwiye Perefe Nkeramugaba ko abo bantu bose bahungaga ubwicanyi bwateguwe, bukoranywe ubugome, bwibasiye abaturage b’abatutsi.

Ati “Twabakiriye kubera ko dufite umutima wa kibyeyi n’uwa Gikirisitu. Kubera ko kugeza ubu twakoze ibishoboka byose bya kimuntu kugira ngo duhangane n’iki kibazo, kubera kandi ko inshingano yacu irebana n’ibya Roho, turabibutsa Nyakubahwa Perefe ko imbere y’Imana, imbere y’Igihugu n’imbere y’amahanga yose.”

“Iyicwa ryegereje ry’imbaga n’inzirakarengane ibihumbi bibiri na Magana atanu birimo ibihumbi bibiri by’abagore n’abana bahungiye hano kuri paruwasi , ni mwebwe ubwanyu bizabazwa n’ubutegetsi bwa Perefegitura ya Gikongoro.”

Muri iki gitabo kandi havugwamo ko iyi baruwa ya Padiri De Jamblinne yoherereje Perefe Nkeramugaba yanageneye kopi, Perezida wa Repubulika, abagize Guverinoma bose ndetse na Musenyeri wa Diyosezi ya Butare ari nayo Paruwasi ya Cyanika yabarizwagamo.

Padiri De Jamblinne yimye ‘Ukarisitiya’ Perefe

Sebagabo yabwiye IGIHE ko Padiri De Jamblinne yari umuntu ukunda abantu bose atarobanuye ubwoko cyangwa ngo agendere kuri politiki yari igezweho mu Rwanda ari nayo Ababiligi bagenzi be basize bafashije ubutagetsi bwariho kubaka.

Ati “Yari umuntu ugira urukundo, hari abakunze kuvuga ngo yari inshuti y’Abatutsi ariko ntabwo ariko byari bimeze ahubwo we yakundaga abantu bose by’umwihariko Abakirisitu ba Diyosezi ye.”

Mu 1963, Padiri De Jamblinne yafashije Abatutsi benshi abakiza abicanyi. Nijoro yararaga azenguruka ashaka aho Abatutsi babaga bihishe, akajya mu ngo zabo akabazana kuri Paruwasi.

Uko yashakishaga Abatutsi abahisha ni nako yageragezaga kugira inama abicanyi abasaba kureka uwo mugambi wabo mubi.

Sebagabo ati “Hari igihe Abatutsi bari bamaze kuba benshi baraje kwihisha mu Kiliziya, noneho ubwo yashaka gusoma misa, akayisomera hanze, abaje mu misa bakicara hanze noneho ba bandi bakicara imbere mu Kiliziya kandi bose bagakurikira misa kugeza irangiye.”

Yakomeje agira ati “Yigeze no kurakara abonye Perefe Nkeramugaba mu Kiliziya, amugeze imbere aje guhazwa amwima Ukarisitiya amubwira ko adakwiye guhabwa Umubiri wa Kirisitu mu gihe cyose akomeje kwicira ubusa ibiremwa by’Imana.”

Ibi kandi no mu gitabo cya Dr Bizimana yabikomojeho avuga ko mu 1973 nabwo Padiri De Jamblinne yakomeje kurwana ku banyeshuri b’Abatutsi akabahisha abandi kugeza ubwo yararaga abatwara mu modoka ye yihishe nijoro akabageza ku mupaka w’u Rwanda n’u Burundi akabaha impamba n’umugisha ubundi bakambuka.

Uruhare rwa Padiri De Jamblinne mu iterambere rya Gikongoro

Mu birebana n’iterambere ry’agace k’u Bufundu, Padiri De Jamblinne yagize uruhare rukomeye mu guteza imbere aka gace.

Yigishije abaturage batari bake imyuga irimo ububaji, gutwara no gukanika imodoka, ubwubatsi n’indi myuga itandukanye.

Bivugwa ko hari n’imihanda itandukanye yubakishije muri ako gace, yubakisha amateme, ahantu hatashoboraga kugendwa nko mu migezi ya Mwogo, Kaviri na Rukarara.

Abatuye n’abahoze batuye mu Bufundu kandi bamwibukira ku kuba yarubakishije amavuriro menshi muri Paruwasi ya Cyanika [aha twavuga nk’irya Kirambi na Mbuga], yubakishije amashuri ahantu henshi cyane kugira ngo yorohereze abana bakoraga urugendo rurerure bajya ku mashuri.

Akiri mu Rwanda, bamwe mu baturage bo mu Bufundu bafataga umunsi umwe bakajya kumusura aho yari atuye mu Mujyi wa Kigali, bakamushyira amafunguro mu rwego rwo kumushimira ubumuntu bwe.

Padiri de Jamblinne yavukiye i Bruxelles mu Bubiligi, ku wa 14 Nyakanga 1922, ayoboka inzira yo kwiyegurira Imana binyuze muri Kiliziya Gatolika.

Yaje kuba Umupadiri mu 1943, arahirira kuba Umumisiyoneri muri Mata 1947, ari nabwo nyuma yaje koherezwa gukora umurimo wo kogeza ubutumwa bwa Kirisitu mu Rwanda.

Padiri De Jamblinne kandi yakoreye ubutumwa muri Paruwasi zirimo iya Nyagahanga na Rushaki muri Diyosezi ya Byumba, Paruwasi ya Rwaza na Runaba muri Diyosezi ya Ruhengeri ndetse n’ahandi harimo Paruwasi ya Rusumo muri Diyosezi ya Kibungo.

Padiri Stanslas De Jamblinne wabaye mu Rwanda igihe kinini yatabarutse ku myaka 99 y'amavuko
Mu gitabo 'Inzira ya Jenoside yakorewe Abatutsi mu Rwanda cyanditswe na Dr Bizimana Jean Damascène hagaragaramo uko Padiri De Jamblinne yarwanyije ubwicanyi bwakorerwaga Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .