00:00:00 IGIHE NETWORK KN KINYARWANDA EN ENGLISH FR FRANCAIS

Kumugara ingingo si ukumugara ubwonko- Ubuhamya bwa Nsabikunze witeje imbere

Yanditswe na Ntabareshya Jean de Dieu
Kuya 26 December 2023 saa 08:22
Yasuwe :

Nsabikunze Wanceslas utuye mu Murenge wa Gikondo mu Karere ka Kicukiro, akora ubudozi ariko akaba afite ubumuga bw’ingingo (yamugaye amaguru yombi). Yagaragaje ko abantu bafite ubumuga badakwiye kwitinya kuko bifitemo ubushobozi.

Nsabikunze Wanceslas yavutse adafite ubumuga, nyuma y’imyaka itatu nibwo yarwaye imbasa biza kumuviramo ubumuga bw’ingingo.

Yaje kujyanwa mu kigo cyita ku bana bafite ubumuga butandukanye cyashinzwe na Padiri Fraipont Joseph Ndagijimana, cya HPV Gatagara, ari naho yaje kwigira umwuga w’ubudozi amaze imyaka irenga 40 akora.

Yagize ati “Ntabwo najya muri bya bindi umuntu yirata, ariko ntabwo navuga ko mbayeho nabi. Nk’uko n’abandi bagira inzozi zo kwifuza uko bazabaho ejo hazaza, nanjye mbona inzozi zanjye nari mfite narazigezeho.”

“Ntabwo umuntu ufite ubumuga abujijwe kugira inzozi zo kubaho neza, nkurikije amateka yanjye navutse ndi umwana uteganya kuzaba umugabo kandi inzozi nagize icyo gihe nagiye nzirotora. Niyo mpamvu numva ko mugenzi wanjye ukiri hasi nta kabuza yazatera imbere. Nkiri n’umwana muto najyaga mbiganiriza abandi ko nzaba umukire kandi burya koko hari ubwo inzozi zawe zikuyobora.”

Nsabikunze kuri ubu afite umugore n’abana batanu bakagira imitungo itandukanye irimo n’inzu atuyemo mu mu Mujyi wa Kigali. Yagaragaje ko abantu bafite ubumuga badakwiye guhabwa akato kuko nabo baba bafite ubushobozi.

Ati “Kumugara ntabwo twavuga ngo ni yo ndwara idakira, ni byo tubana nabyo ariko mu mutwe haba ari hazima ingingo ntaho zihurira n’ubwonko icyakora niba waragize ibyago ukarwara icyo gice (ubwonko) ugomba kubyakira nta kundi.”

Yagaragaje ko bagihura n’imbogamizi zijyanye n’imisoro, aho bifuza ko leta yajya ishyiraho igabanyuka nibura rya 50% ku bantu bafite ubumuga kuko usanga batakaza byinshi kurusha abadafite ubumuga mu mikorere yabo ya buri munsi.

Kuri ubu Nsabikunze yemeza ko nubwo afite ubumuga bw’ingingo, ariko abasha kwibeshaho ndetse agatanga n’ubufasha bukwiye ku bagize umuryango.

Binyuze mu budozi bwe, ashobora kubona akazi ko kudodera abantu impuzankano nk’ikigo cy’ishuri, abakora akazi runaka, imyenda isanzwe yo kwambara, amarido ndetse n’ibindi.

Yibarira nibura ibihumbi 200Frw bya buri kwezi ashobora kwinjiza kandi yakuyeho iby’ibanze nkenerwa buri munsi. Asaba abafite ubumuga butandukanye kwitinyuka mu kwishakamo ibisubizo.

Umukozi mu Nama Nkuru y’Abantu bafite Ubumuga NCPD, Tuyizere Oswald, yemeje ko abafite ubumuga iyo bahawe umwanya batanga umusanzu ukomeye mu iterambere ry’Igihugu kuko bifitemo ubushobozi.

Yagaragaje ko bisaba ko bakurirwaho imbogamizi zose zikibabangamiye mu nzego zitandukanye kugira ngo batange umusanzu wabo nk’uko bikwiye mu kwiteza imbere no mu iterambere ry’Igihugu muri rusange.

Yasabye kandi ababyeyi bafite abana bafite ubumuga kudapfukirana ubushobozi bwabo, ahubwo bakabafasha bijyanye n’ubumuga bafite.

Ibarura Rusange ryakozwe mu 2022 ryagaragaje ko abantu bafite ubumuga mu Rwanda bagera ku 391.775 ku baturage bose bangana na miliyoni 13,24, ni ukuvuga ko ari 3,4%. Abagore ni 216.826 na ho abagabo bakaba 174.949.

Nsabikunze Wanceslas ufite ubumuga bw'ingingo yemeza ko abafite ubumuga bashoboye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .