00:00:00 IGIHE NETWORK KN KINYARWANDA EN ENGLISH FR FRANCAIS

Kicukiro: Abasaga 400 basoje amasomo y’imyuga, bahiga guhanga imirimo mishya (Amafoto)

Yanditswe na IGIHE
Kuya 21 June 2022 saa 06:30
Yasuwe :

Abanyeshuri 420 biganjemo imfubyi n’abatishoboye basoje amasomo y’imyuga mu Ishuri ERM Hope TVET riri i Kabuga mu Murenge wa Masaka mu Karere ka Kicukiro, biyemeza kongera imirimo ihangwa bagamije kwiteza imbere n’imiryango baturukamo.

Mu mpera z’icyumweru ni bwo aba banyeshuri bahawe impamyabushobozi mu muhango witabiriwe n’abayobozi batandukanye kuva ku bo mu nzego z’ibanze.

Abanyeshuri 420 bahawe impamyabushobozi muri ERM Rwanda bari mu byiciro bitatu birimo icy’abize amezi atatu, abamaze atandatu n’abasoje umwaka wose.

Mu gihe bamaze ku ntebe y’ishuri, bahawe amasomo y’imyuga arimo kudoda, guteka, gusudira, gukora imisatsi, inzara n’ibindi.

Abasoje amasomo bavuze ko bahawe ubumenyi buzabafasha kwitwara neza ku isoko.

Kamikazi Kelly wize ibijyanye no guteka yavuze ko yungutse ubumenyi buzamufasha no kuba yakwihangira umurimo.

Yagize ati “Mu byo dukuyemo rero ni uko umuntu yashobora kwihangira umurimo, kuba yakwitekera cyangwa agatekera abashyitsi.’’

Yasabye urubyiruko bagenzi be kuyoboka imyuga na bo bagashaka amahirwe y’ibishobora kubateza imbere.

Ndikumana Eric yavuze ko ubumenyi yahawe bumwemerera kuba na we yakwikorera.

Ati “Ndashishikariza abashyira amaboko mu mifuka kwiga imyuga kuko uwayize ntakunda kubura akazi. Haba hari amahirwe menshi.’’

Umunyamabanga Nshingwabikorwa w’Umurenge wa Masaka, Nduwayezu Alfred, yashimiye ababyeyi bohereje abana kwiga imyuga kuko ubumenyi baharahuye buzabafasha kwiteza imbere.

Yasabye abakiri ku ntebe y’ishuri gukomeza gutera ikirenge mu cya bakuru babo bahawe impamyabushobozi.

Yakomeje ati “Ndabizeza ko ndi kumwe namwe kandi nzakomeza kubashyigikira, twiteguye kuzakora ibishoboka byose kugira ngo ishuri ryacu rikomeze kujya mbere.’’

ERM Hope TVET ni ishuri ryigenga, rigendera ku musingi w’ijambo ry’Imana. Ryakira abana bose ritarobanuye amadini n’amatorero babarizwamo. Ryashinzwe na Pasiteri Kayinamura Sitaki Emmanuel, ni na we Perezida waryo.

Yavuze ko mu mwaka wa 1996 ari bwo yagize igitekerezo cyarivuyemo, icyo gihe akaba yararanganyije amaso mu gihugu hose abonamo abana b’imfubyi n’abapfakazi bari mu buzima busharira, yiyemeza kubafasha.

Ati "Igitekerezo cyatangiye mu 1996 nyuma ya Jenoside yakorewe Abatutsi mu Rwanda, ubwo imihanda yose wabonaga harimo abana b’imfubyi n’abapfakazi batagira kirengera. Ni ho ijambo ry’Imana naryumvise muri njyewe muri Yakobo 1:27 rivuga ngo Idini Imana yishimira ni irifasha imfubyi n’abapfakazi kandi ntiriganzwe n’Isi.’’

Mu 2008 yaje kunguka ikindi gitekerezo nyuma yo gusanga benshi muri abo bana yafashaga batarabashije kwiga amashuri yisumbuye na Kaminuza.

Ni bwo yatangije ishuri ryigisha imyuga ngo rizafashe abarigana gutegura ahazaza habo binyuze mu mushinga wabafasha. Kuva iri shuri ritangijwe, abarenga ibihumbi bine bamaze kurinyuramo.

Pasiteri Kayinamura Sitaki Emmanuel washinze Ishuri ERM Hope TVET yashimye abanyeshuri bagaragaje umuhate mu masomo yabo
Abanyeshuro 420 ni bo basoje amasomo yabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .