00:00:00 IGIHE NETWORK KN KINYARWANDA EN ENGLISH FR FRANCAIS

Inkuru ya Ikirezi wamaze hafi imyaka ibiri agemurira abakoze Jenoside yahitanye umuryango we

Yanditswe na IGIHE
Kuya 19 January 2022 saa 01:24
Yasuwe :

Ikirezi Esther ni umugore utuye mu Mujyi wa Kigali, warokotse Jenoside yakorewe Abatutsi akiri uruhinja abifashijwemo n’umubyeyi wamutoraguye nyina amaze kwicwa akamusiga afite amezi nk’umunani.

Inkuru ye iyo ayibara avuga ko ari amakuru yahawe ko yavutse mu 1993 mbere gato y’uko Jenoside yakorewe Abatutsi itangira muri Mata 1994.

Aho yarokokeye ni mu Ntara y’Amajyepfo hagati y’Akarere ka Nyanza na Ruhango ariko uwamutoraguye na we ntiyashoboye kuhamenya neza. Ibi ni na byo byagoranye muri gahunda yo gushakisha umuryango we.

Uwo mubyeyi yamutoraguye na we arimo ahunga yiyemeza kumurerana n’uwe yari ahetse kuko atari afite icyizere ko abandi bagera kuri batandatu yari yarabyaranye n’umugabo badahuje ubwoko bazarokoka.

Mu kiganiro Inkuru Yanjye yagiranye na Gerard Mbabazi, Ikirezi yavuze ko na we yari afite igikomere cyaturutse ku mupanga yakubiswe mu mutwe igihe bicaga nyina.

Avuga ko amakuru yahawe ari uko yarereshejwe ikiremve cyangwa umufa bitewe n’uko uwamutoraguye atashoboraga kumubonera amata.

Uwo mubyeyi yaje kwiyemeza guhunga amugeza i Burundi ariko amushakira ikigo cy’imfubyi kubera bwa bushobozi buke bwo kumwitaho.

Mu 2002 bagarutse mu Rwanda yamusobanurira uko byagenze igihe yamutoraguraga, amubwira ubukana bwa Jenoside ndetse amushishikariza guhora.

Ikirezi byamugiyemo yiyemeza kwica abahutu ndetse atangira gukora urutonde rw’abo azica. Icyo gihe yari amarangije umwaka wa kabiri w’amashuri abanza.

Yabisobanuye agira ati “Buri munsi yarantozaga nk’uko umuntu bamujyana i Gishali ari umusivile akavayo abaye umupolisi akagirira umumaro sosiyete. Yarantozaga kandi nkumva ngomba kubikora ariko na we ryari ihungabana ryabimuteraga.”

Nyuma yo kugera mu Rwanda Ikirezi yaje gutandukana na wa mubyeyi we abaho mu buzima bubi mu ngo nyinshi yagiye anyuramo ariko akomera ku ntego ye yo kutiyandarika n’indi myifatire mibi yitirirwa imfubyi.

Nubwo byamugoye cyane yaje kurangiza amashuri abanza ajya mu yisumbuye buhoro buhoro abasha gukira ibikomere byo ku mutima n’ibyo ku mubiri yatewe na Jenoside yakorewe Abatutsi ndetse agera igihe cyo gushinga urugo.

Ati “Nari nk’igiti cy’inkokore, abantu bibuke uburyo igiti cyakubiswe n’inkuba kiba kimeze; nari nka cyo. Ni ko Imana yabishimye ariko yatumye nubaka urugo, ndahimira Imana ko nashibutse.”

Mu buhamya bwe, Ikirezi avuga ko yakiriye agakiza yiyumvamo kubabarira ba bantu yari yarashyize ku rutonde rw’abakwiriye gupfa[ abigizemo uruhare]. Nyuma y’imyaka igera kuri irindwi ngo yumvise ijwi rimuhatira kugemurira abahamwe n’ibyaha bya Jenoside bafunzwe ndetse araryumvira.

Ati “Naje kumva ijwi rimbwira ko niba raravuye mu by’amoko nkababarira abahutu ngomba gushaka abantu bakoze Jenoside bagakatirwa burundu nkabagemurira. Ni ibintu byangoye n’umuntu yabyumva akanyita igicucu. Nashatse abo bantu ndababona [batanu].Nabagemuriye umwaka n’amezi umunani, buri wa Gatanu nikoreraga indobo nkajya kubareba kuri Gereza ya 1930.”

Yakomeje agira ati “Abantu baransuraga bakambuza bakanyita igicucu, bansenya ariko numvaga nshaka kwereka Imana ko namaramaje. Icyo ni cyo kimpa imbaraga zo kubabarira umuntu wese wampemukira uyu munsi.”

Uyu mubyeyi yavuze ko iyo umuntu amuhemukiye yibuka ko hari ikintu yababariye kirenze kamere bikamutera kuzura umutima w’imbabazi.

Ikirezi Esther avuga ko yamaze umwaka n'amezi umunani agemurira abakoze Jenoside yahitanye abo mu muryango we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .