Ikiganiro na Amb. Igor César, umudipolomate w’u Rwanda ufite inkuru y’ubuzima itangaje (Video)

Yanditswe na Philbert Girinema
Kuya 28 Ukwakira 2019 saa 02:49
Yasuwe :
0 0

Ni nyuma gato ya Rwanda Day, umunaniro ni wose ku maso y’abantu, bari bamaze amajoro bataryama kubera imyiteguro y’iki gikorwa mbonekarimwe ku banyarwanda baba muri Diaspora. Amb. Igor César nawe ni uko ariko we aragaragaza ibinezaneza.

Twahuye ku cyumweru, nyuma y’amasaha make iki gikorwa kirangiye, twicarana mu isomero rya Motel One, hotel iri mu Mujyi rwagati i Bonn hafi gato y’ahabereye Rwanda Day.

Twaganiriye birambuye kuri Rwanda Day, mubaza uko abona yagenze, ariko mu Kinyarwanda gitomoye kigenda buhoro, akitsa ku kuvuga ko we adashobora kwiha amanota.

Ati “Ntabwo wakora ikintu ukirimo ngo ube n’umusifuzi, njye ndi umukinnyi ntabwo ndi umusifuzi. Ahubwo abaje muri Rwanda Day nibo bagira uruhare mu kuvuga ukuntu Rwanda Day yari imeze.”

Igor wakundishijwe u Rwanda na sekuru, yavugaga ko “agashya nabonye, ni uko mu biganiro bya Rwanda Day u Rwanda rusigaye ari u Rwanda nk’uko rwakagombye kuba ruri. Wumvise izina u Rwanda, ni u Rwanda rutari ahantu hamwe gusa ahubwo rugenda rukarenga imbibi.”

Mu Budage, kimwe mu bihugu areberera hari abanyarwanda bagera ku 1295, muri bo abarenga 800 bitabiriye Rwanda Day ndetse banayigiramo uruhare rukomeye.

Uyu mugabo, ni umwe mu badipolomate b’u Rwanda bibazwaho byinshi, ndetse hari n’abazi ko atazi Ikinyarwanda cyangwa se ko ari Umudage wasabye ubwenegihugu n’ibindi nk’ibi.

Twaricaye, mubaza buri kimwe cyose kijyanye n’ubuzima bwe, inkomoko ye, uko yabaye umudipolomate, intumbero ye n’ibindi bitandukanye. Gusa, imitekerereze ye itandukanye n’uko abantu bamufata, ni umugabo ukunda u Rwanda bya nyabyo, ni umunyarwanda byuzuye utewe ishema n’igihugu cye kandi uvuga ashize amanga ko azagikorera mu gihe cyose akigifite.

Amb. Igor César ubwo yaganiraga n'Umunyamakuru wa IGIHE mu Mujyi wa Bonn mu Budage, umunsi umwe Rwanda Day ibaye

Yavutse tariki ya 13 Mutarama 1968, se ni umunyarwanda hanyuma mama we akaba Umudagekazi. Se yavuye mu Rwanda ahagana mu 1960 ajya kwiga mu Bubiligi.

U Rwanda rwabonye ubwigenge ari mu mahanga, nyuma ajya gutura mu Budage aho yigaga muri Kaminuza ya the Bauhaus University Weimar.

Igor César yavukiye mu Mujyi wa Weimar mu Budage, ahamara imyaka ine y’ubwana bwe, nyuma mu 1971 azana n’ababyeyi muri Afurika aho babaye mu bihugu bitandukanye birimo mu Burundi, Ethiopia.

Uko yagiye akura, niko sekuru yamukundishije u Rwanda kugeza ubwo yumvaga ari igihugu cy’agatangaza azageramo akanyagirwa n’imvura y’amata n’ubuki, gusa ibyo yabonye arugezemo, byashimangiye urukundo rwe ku gihugu cye.

Ikiganiro na Amb. Igor César uhagarariye u Rwanda mu Budage

IGIHE: Abantu benshi ntibazi ko uri umunyarwanda mu maraso, wabasobanurira ute uwo uriwe?

Amb. Igor: Njye ndi umunyarwanda wuzuye, ufite inzobe. Icyo nzi ni uko yaba mu mateka y’abanyarwanda n’Abadage, ubwoko bwabaga ari ubwa so.

Navutse ku munyarwanda, ndi umunyarwanda, nakuze nzi ko ndi umunyarwanda, nagize n’amahirwe yo kuvuka ku Mudagekazi bimpa kuba ndi Umunyarwanda kandi nshoboye no kuba Umudage no kumenya andi mateka y’ibindi bihugu twagiye tubamo.

IGIHE: Wigeze umara igihe kinini mu Rwanda?

Amb. Igor: Oya! Abantu benshi iyo bumvise ikinyarwanda baba bibaza ko navukiye mu Rwanda. Navukiye mu Budage, nakuriye mu mahanga kubera amateka y’u Rwanda. Ariko ntabwo byambujije kugira amahirwe yo kubana na Sogokuru ari nawe wankundishije u Rwanda n’ikinyarwanda.

Mu biganiro bye nagiye niga Ikinyarwanda, ni nayo mpamvu iki Kinyarwanda mwumva gisa n’icy’abasaza, ni uko ari umusaza wakinyigishije.

IGIHE: Ufite abana bangahe?

Amb. Igor: Mfite abana bane, babiri nabyaye, n’abandi babiri ndera.

IGIHE: Nabo bazi Ikinyarwanda?

Amb. Igor: Barakiga, twatangiye n’amashuri y’ikinyarwanda kuri Ambasade bamaze imyaka ibiri biga Ikinyarwanda. Umwe mu bahungu banjye mwaramubonye muri Rwanda Day yari mu bantu bavuze ikivugo, aracyakarishya ururimi rwe, aracyacyubakiraho.

IGIHE: Mwinjiye mute muri dipolomasi?

Amb. Igor: Njye ntabwo nigeze nkora akazi ka dipolomasi mbere yo kuba Ambasaderi. Kandi si twe dufata uwo mwanzuro ahubwo ni ababa baduhaye ayo mahirwe n’inshingano byo kuba aba ambasaderi.

Ntabwo navuga inzira iganisha umuntu ku kuba ambasaderi ndebye urugendo njye nakoze, icyo nzi ni uko nize gukunda u Rwanda, natojwe kuri urwo rukundo ndubamo, nkorera u Rwanda nk’umunyarwanda, nkunda kubakira u Rwanda aho nari ndi hose, bigera ahantu ngira n’amahirwe barampamagara bansaba ko nahagararira u Rwanda mu Budage.

Amb. Igor César avuga neza ikinyarwanda nubwo atabaye mu Rwanda

IGIHE: Mu mashuri wize ibijyanye n’iki?

Amb. Igor: Nize mu bihugu bitandukanye. Nize i Burundi, niga Kaminuza muri Canada ibijyanye na politiki, niga gato no mu Budage. Nakoreye umuryango w’abanyarwanda nkiri muto, nabaye uwubakisha inzu, nakoze mu bijyanye n’ibikorwa remezo, mu Rwanda nakoze ibikorwa bitandukanye.

IGIHE: Ni iki cyatumye wiga ibijyanye na politiki?

Amb. Igor: Amateka y’u Rwanda. Njya nshishikariza urubyiruko rw’uyu munsi ngo ntibazakunde u Rwanda ari uko barubuze. Njye nakunze u Rwanda kuko ntari ndufite, gukunda u Rwanda utarufite bituma ukorana n’abanyarwanda kugira ngo urwo Rwanda urugire aho uri hose.

Ubwo rero kureba uburyo twakubaka umuryango ushobora kugira n’igihugu aho witirirwa twabitangiye tukiri bato. Narangije amashuri abanza ngiye gutangira ayisumbuye ntibatwemerera gukomeza bitewe n’uko tutari abenegihugu.

Icyo nicyo cyatumye ntagira ubunyarwanda bwanjye, nabumenye kubera ko ntari mfite igihugu bituma mparanira kugira igihugu, mparanira kubana n’abandi banyarwanda, kwiyubaka, kubaka umuryango w’abanyarwanda aho uri hose kugeza aho mbaye ambasaderi ntabwo nigeze ndohoka gukora kugira ngo u Rwanda n’abanyarwanda batere imbere.

IGIHE: Twirengagije amateka, ni iki cyatumye ukunda u Rwanda bene aka kageni?

Amb. Igor: Nganira na sogokuru nabonaga uburyo umunyarwanda atekereza n’uburyo yibona, nsanga ari byo byatumye nshaka ko ubunyarwanda bwanjye bugira uburemere.

Nakuze mbona yaba papa cyangwa sogokuru, ikintu cyose cyiza babonaga bacyitiriraga u Rwanda. Urugero iyo babonaga ikintu cyiza wumvaga uti “iki ni cyiza cyenda gusa n’u Rwanda”, “Uyu rwose afite umuco wenda gusa n’uw’u Rwanda”, ugasanga u Rwanda ni ikigereranyo cy’ibyiza.

Ndibuka ubwa mbere ntaha mu Rwanda nkareba ukuntu hasa, ukuntu hameze, hari umukungugu, hari ibibazo, abantu bari barishwe, ntabwo hari hameze nk’uko hameze ubu. Hari ibintu byinshi bitajyanye n’uko umusaza, ababyeyi bagendaga bavuga u Rwanda.

Ndibuka rimwe nagiye kureba papa ndamubwira nti warakoze kuba waratubeshye kuko iyo utubwira ukuri ntabwo u Rwanda nari kuruharanira. Ariko iyo ndebye u Rwanda turimo ubu, mpita mbona ibyo yashakaga kutubwira.

IGIHE: Wageze mu Rwanda bwa mbere ryari?

Amb. Igor: Nageze mu Rwanda bwa mbere mu 1984. Ntabwo nabashije gutembera u Rwanda kuko ntari mbifitiye uburenganzira. Naciye mu Rwanda mva i Burundi njya i Bukavu, wagendaga ahubwo wifata utazi niba unagera aho ugana.

IGIHE: Ubu wabashije gusura ibice byose by’u Rwanda?

Amb. Igor: Ndibaza nta gice cy’u Rwanda ntarasura. Nageze mu Majyarugu, Amajyepfo, Uburasirazuba, Iburengerazuba n’i Kigali. Natashye mu Rwanda mfite amatsiko yo kureba ibyo bice umusaza yajyaga avuga, imihanda, imisozi, kugendera mu mazi, nasuye u Rwanda mu nzira nyinshi.

IGIHE: Uyu munsi nihe wumva watura mu Rwanda?

Amb. Igor: Burya u Rwanda urarukunda nk’u Rwanda ariko aho ukomoka hari akantu uhakundira kuko burya kuvuga ngo aha hantu niho imizi yanjye iva, ‘ngo ntawanga nyina ngo arwaye ibiheri.’ Iburengerazuba kubera i Kivu, kubera uburyo hameze niho nkunda mu Rwanda kandi n’abakerarugendo basa naho bahakunda.

IGIHE: Ni iki cyagushimishije mu buzima bwawe?

Amb. Igor: Kuva nkiri muto twize kwakira buri kintu cyose uko kije ukacyakira cyuzuye, ntabwo wakira ikintu igice. Rero njye sinzi kurobanura ngo mvuge ngo iki ikintu nicyo cyari cyiza kuko ibintu byose nabayemo nabibayemo byuzuye. Twabaye mu buzima bwiza, twabaye mu buzima buciriritse, twabaye mu bibazo ariko muri ibyo byose hari icyiza uvanamo kuko ni isomo ry’ubuzima.

Isomo ry’ubuzima uryakira n’urukundo n’ubushishozi, icyo ndimo cyose mba mfite amatsiko nshaka kumenya kurusha. Kumbwira rero icyo nakunze kurusha ibindi bigabanya n’ibyiza mba nakuye mu isomo. Mpora nshaka icyo cyiza ntabwo ndobanura, nize kwemera ikintu cyose kikujeho ukacyakira ariko ukacyakira ukivanamo isomo.

IGIHE: Ujya uganira n’abana bawe mugaca imigani?

Amb. Igor: Cyane! Nta kintu nzi mu Kinyarwanda gikomeye kurusha imigani. Byerekana y’uko abanyarwanda kuva kera hari uburyo bahaga abana amasomo kugira ngo babyigireho banabyubakirero.

IGIHE: Ni ikihe gitabo wasomye kikagushimisha kurusha ibindi?

Amb. Igor: Nsoma byinshi ariko hari ibitabo mbona ku muco nyarwanda umuntu yanditse amateka akajya no mu mizi yayo n’uburyo bwo gutekereza inkomoko y’ibitekerezo by’abanyarwanda, Alex Kagame ari mu bantu wasoma ukamenya amateka y’abanyarwanda n’uburyo batekerezaga. Nsoma byinshi mfite amatsiko menshi.

Ambasade y’u Rwanda mu Budage ihagarariye u Rwanda muri Romania, Tchèque, Slovaquie, Pologne, Ukraine na Liechtenstein.

Ambasaderi Igor César usanzwe ahagarariye u Rwanda mu Budage ubwo yashyikirizaga Perezida Andrej Kiska wa Slovaquie impapuro zimwemerera guhagararira u Rwanda muri icyo gihugu
Amb. Igor asobanura ko yakunze u Rwanda kubera Sekuru, ariko ko ubwo yarugeragamo bwa mbere yatunguwe n'uko yarusanze
Amb. Igor ubwo yagezaga ijambo ku bari bitabiriye Rwanda Day mu Budage
Aha yahaga ikaze Madamu Jeannette Kagame mu cyumba cyabereyemo Rwanda Day i Bonn mu Budage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza