Bimwe mu bintu ukwiriye kwirinda nyuma yo gutandukana n’umukunzi wawe

Yanditswe na Mukahirwa Diane
Kuya 22 Ugushyingo 2020 saa 05:13
Yasuwe :
0 0

Gutandukana n’uwo ukunda ni kimwe mu bintu bibabaza cyane kugera n’aho uri muri ibyo bihe atabasha kurinda amarangamutima ye , ariko ni ubwo uba uvuye mu rukundo ubuzima bundi burakomeza. Niyo mpamvu hari ibyo ukwiriye kwirinda gukora kugira ngo ukomeze kugira ubuzima bwiza.

Dore bimwe mu bintu ukwiye kugendera kure mu gihe watandukanye n’uwari umukunzi wawe , kuko iyo ukomeje ibyo bintu urushaho kubabara ndetse bikaba byagukururira indwara y’agahinda gakabije .

Gukomeza kuba inshuti n’uwari umukunzi wawe

Iki nicyo kintu cya mbere ukwiye kwirinda nyuma yo gutandukana n’uwo mwakundaga. Gukomeza kuba inshuti na we bituma uhora utishimye kandi uhorana icyizere ko mwazasubirana, iyo bitabaye urushaho kubabara.

Biba byiza iyo ubaye uretse ubushuti bwanyu ukabanza ugakira ibikomere byo kuba mutakiri kumwe kandi ukamwakira nk’inshuti isanzwe, nyuma y’igihe mukazongera mukaba inshuti zisanzwe.

Kwerekana ko mukiri kumwe

Abantu beshi nyuma yo gutandukana batinya kwereka bagenzi babo ko batakiri kumwe bitewe nuko baba bumva bari bufatwe nk’abananiwe, nyamara icyo gikorwa gituma ukomeza kubabara kuko uba ubeshya umutima wawe.

Iyo ubwiye abantu ba hafi yawe ko utakiri kumwe n’uwo wakundaga bashobora kugufasha muri ka gahinda wari urimo, ndetse ntibakomeze no kumukubazaho cyane ngo biguhore mu bitekerezo.

Guhangayikishwa no kuba uri wenyine

Iyo uhangayikishijwe no kuba uri wenyine nyuma yo gutandukana n’umukunzi wawe bituma umutekereza cyane ndetse ugatekereza ibihe byiza mwagiranye muri kumwe bikakongerera agahinda.

Guhangayikishwa no kuba uri wenyine bishobora gutuma ujya mu ngeso mbi nko kunywa ibiyobyabwenge kugira wumve utuje cyangwa se ukaba wajya mu rukundo utabitekerejeho kubera kwanga kubaho wenyine.
Gutekereza cyane ku wahoze ari umukunzi wawe

Niba wumva ugikunda uwari umukunzi wawe, gerageza gushaka ibintu byaguhuza bituma utamutekerezaho cyane. Ushobora gukora siporo, kureba filime cyangwa kuganira n’inshuti.

Iyo ukomeje kumutekereza cyane bituma wumva umukunze cyane yaba we atakwitayeho bikaba byakubabaza cyane , ibintu bishobora no kukuviramo indwara y’agahinda gakabije.

Kugenzura uwari umukunzi wawe

Gukomeza kureba ibyo uwari umukunzi arimo ntabwo ari igitekerezo cyiza kuko nubwo hari igihe mwamaranye ariko ubu ntimukiri kumwe. Uba ukwiriye kumureka kuko kumugenzura bituma agaruka mu ntekerezo zawe.

Ibi ubu ukwiye kubibwira n’inshuti zawe zikubaha ko mutakiri kumwe ntizikomeze kukubwira amakuru ye cyangwa kuzana ibiganiro bimuvugaho. Niba ufite imbuga nkoranyambaga akoresha, ukwiriye kwirinda kujya kuzigenzura ureba ibyo yashyizeho kuko bishobora kukugiraho ingaruka.

Gushaka kumwihoreraho

N’iyo yaba ari we waguhemukiye mu rukundo, gushaka kumwihimuraho ukwiye kubigendera kure kuko bizagushyira mu bibazo nko kuba wakora ikintu kibi gihanwa n’amategeko.

Gukora imibonano mpuzabitsina n’uwari umukunzi wawe

Kuba wakomeza gukorana imibonana mpuzabitsina n’uwo mwigeze gukundana uba uri kwishyira mu kaga kuko bizatuma utabasha kumucikaho burundu ndetse nawe ashobora kukugira igikoresho cy’imibonano mpuzabitsina kuko nta rukundo agufitiye.

Igihe uzaba wamenye ko uri igikoresho cye nta rukundo ruri hagati yanyu bizagutera agahinda, kuko uzaba ubonye ibitandukanye n’ibyo wowe watekerezaga.

Kutongera kwizera urukundo

Niba umubano wari urimo utagenze neza ntabwo bivuze ko urukundo rwose ariko rumera. Hari igihe ari uko uwo mwari kumwe mutabashaga guhuza ariko nyuma ye wabona undi ugukunda nk’uko ubyifuza.

Niyo mpamvu bidakwiriye gutuma wanga urukundo kuko iyo hamwe byanze hari ahandi byemera kandi ukanezerwa cyane, ibyakubayeho ntibigatume ufata umwanzuro wo kutazongera gukunda.

Mu gihe watandukanye n'uwo wakundaga, ni byiza kwitondera bimwe mubyo uhura nabyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .