00:00:00 IGIHE NETWORK KN KINYARWANDA EN ENGLISH FR FRANCAIS

Abafite imishinga y’ikoranabuhanga batangiye kwiyandikisha muri Hanga Pitchfest

Yanditswe na IGIHE
Kuya 12 September 2022 saa 02:54
Yasuwe :

Ibikorwa byo kwiyandikisha mu irushanwa ryo guhanga udushya mu ikoranabuhanga rizwi nka Hanga Pitchfest byatangiye, aho rigiye kuba ku nshuro ya kabiri hatoranywa imishinga igaragaza ibisubizo by’ibibazo bitandukanye byugarije Isi.

Kwiyandikisha byatangiye kuri uyu wa Mbere tariki 12 Nzeri 2022, bizasozwa 17 Ukwakira 2022.

Iri rushanwa ryateguwe na Minisiteri y’Ikoranabuhanga na Inovasiyo ku bufatanye n’Urwego rw’Igihugu rushinzwe Iterambere RDB. Biteganyijwe ko urubyiruko rufite imishinga ihiga indi mu ikoranabuhanga ruzahembwa mu Ukuboza uyu mwaka.

Umushinga wandikishwa ugomba kuba ukorera mu Rwanda kandi wanditswe muri RDB. Ntukwiriye kuba urengeje imyaka itanu utangiye gukora.

Imishinga yemewe ni idasanzwe ifitanye imikoranire n’abandi bashoramari uretse abafashwa n’inshuti, abavandimwe n’abandi mu buryo bworoheje. Imishinga yaba yarigeze guhatanira ibindi bihembo nayo iremewe.

Umushinga kandi ugomba kuba ugaragaza icyo uje kumarira abaturage hifashishijwe ikoranabuhanga.

Kwiyandikisha bikorerwa kuri internet unyuze kuri uru rubuga www.hangapitchfest.rw

Ahantu hose hasaba kuzuzwa uwiyandikisha agomba kuhuzuza. Kwiyandikisha bikorwa mu ndimi zirimo Ikinyarwanda, Icyongereza n’Igifaransa.

Nyuma yo kwiyandikisha, itsinda ry’abategura Hanga Pitchfest rizazenguruka hirya no hino mu bice bigize igihugu, rihura n’urubyiruko rwiyandikishije rukeneye ubujyanama ku buryo rwarushaho kunoza imishinga yarwo ngo izaseruke inoze.

Ni igikorwa kizatangira kuwa 28 Nzeri 2022 kigeze kuwa 6 Ukwakira 2022. Gutoranya imishinga 45 ya mbere bizakorwa hagati ya tariki 24 Ukwakira na tariki 31 Ukwakira naho gutoranya imishinga 25 ya mbere bikorwe hagati ya tariki 7 Ugushyingo kugeza tariki 9 Ugushyingo 2022.

Ba nyiri imishinga izaba yatoranyijwe bazajya mu mwiherero uzaba hagati ya tariki 14 Ugushyingo na tariki 18 Ugushyingo. Ibirori nyamukuru bizatoranyirizwamo batanu ba mbere bizaba tariki 10 Ukuboza 2022.

Abazatsinda bazaza biyongera ku bandi bahembwe umwaka ushize nyuma yo kugaragaza imishinga myiza y’ikoranabuhanga. Mu bahembwe harimo imishinga itanu ya mbere yatoranyijwe mu mishinga 200 yari yahatanye.

Imishinga yegukanye ibihembo nyamukuru icyo gihe harimo Afruduino Ltd, Second Life Storage, Afri-Farmers Market Ltd, BAG innovation, na Karisimbi Tech Solution

Umushinga wa mbere uzahembwa 50.000$, uwa kabiri uhembwe 20.000$, uwa gatatu uhembwe 15.000$, uwa kane n’uwa gatanu buri umwe uzahembwa 12.500$.

Hanga Pitchfest 2022 izaba n’umwanya wo guhuza abashoramari, abikorera, abafite imishinga igaragaza udushya n’ibindi.

Hari ibindi bihembo kandi bizatangwa muri aya marushanwa bitangwe n’abafatanyabikorwa.

Perezida Kagame niwe wahembye aba mbere bagaragaje imishinga yahize indi muri Hanga Pitchfest 2021
Imishinga itanu ya mbere yahawe ibihembo n'ubundi bufasha bugamije gutuma itanga ibisubizo by'ibibazo bihari
Umwaka ushize ubwo Hanga Pitchfest yabaga bwa mbere, yitabiriwe ku rwego rushimishije
Urubyiruko rurashishikarizwa kwitabira icyiciro cya kabiri cya Hanga Pitchfest

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .