IGIHE.com > Umuco > Umurage
“Kurata, gusingiza no kwibuka intwari z’igihugu ni inshingano ya buri munyarwanda”

“Kurata, gusingiza no kwibuka intwari z’igihugu ni inshingano ya buri munyarwanda”


Yanditswe kuya 1-02-2013 - Saa 09:49' na Rene Anthere Rwanyange

Ku mugoroba w’igitaramo cy’amagaju cyo kwibuka intwari, kuri uyu wa kane tariki ya 31 Mutarama, kuri Stade nto i Remera, Minisitiri w’intebe Dr Pierre Damien Habumuremyi yatangaje ko kurata, kwizihiza no kwibuka intwari z’igihugu ari umwanya wo gutoza abakiri bato kugera ikirenge mu cy’intwari z’u Rwanda.

Minisitiri w'intebe asubuhuza abitabiriye igitaramo cy'intwari

Minisitiri w’intebe Dr Pierre Damien Habumuremyi witabiriye igitaramo cy’intwari yatangaje ko uwo ari umwanya wo guha agaciro umurage abakurambere basize kandi na byo ari urwego rw’ubutwari. Yagize ati “Iki gitaramo kiri muri bimwe mu bikorwa byatekerejwe ngo gifashe Abanyarwanda kwizihiza neza umunsi w’intwari. Kwizihiza, kurata no kwibuka ibikorwa by’intwari ni byo bitumye twicara hano. Iyo wibutse ukanashima ibikorwa n’ibitekerezo ndashyikirwa byaranze intwari zacu twibuka uyu munsi, si umuhango gusa kuko ari ugutoza abakiri bato ndetse n’abakuze kugera ikirenge mu cy’intwari.” Asaba Abanyarwanda bose kudahemukira ibikorwa by’intwari z’u Rwanda buri wese agaharanira gukora neza kandi bagakunda igihugu cyabo.

Minisitiri w'Intebe Dr Pierre Damien Habumuremyi, Minisitiri Protais Mitali na Tugireyezu Venantie Minisitiri muri Perezidansi ya Repubulika mu gitaramo

Minisitiri w’Umuco na Siporo Mitali Protais yatangaje ko iki gitaramo ari ku nshuro ya kabiri kibaye ariko kubera umusaruro kimaze gutanga kizajya kiba buri mwaka. Agaruka ku nsanganyamatsiko yahawe uyu mwaka “Ubutwari ni ishingiro ry’agaciro n’iterambere”, ko iganisha ku cyerekezo igihugu cyihaye cyo kwihesha agaciro no kwigira. Yatangaje kandi ko ku munsi w’igitaramo nk’uyu ari uwo kwibuka n’izindi ntwari zakoze ibikorwa by’indashyikirwa ku gihugu kandi ko n’ibikorwa bya buri munsi biranga ubutwari.

Abarotse ubwicanyi bw'i Nyange na bo bitabiriye igitaramo cy'intwari

Kanyemera Augustin umwe mu bana barokotse ubwicanyi bwakorewe abanyeshuri b’i Nyange, na bo bari bitabiriye igitaramo, asaba urubyiruko kuzirikana ku butwari kuko ari ryo shingiro ryo kubaka igihugu. Ati “Nta muntu ushobora kubaka igihugu cyangwa kugiteza imbere adashingiye ku bwitange cyangwa ku butwari, kuko ari bwo shingiro ry’ejo hazaza.” Asaba abakuze na bo gukoresha ubunararibonye bafite bafasha abakiri bato gusigasira umuco w’ubutwari kandi bakabera abana urugero rwiza kugira ngo babasigire umurage mwiza.

Iki gitaramo cyitabiriwe n’abayobozi b’Inteko Ishinga Amategeko imitwe yombi, abaminisitiri (MINEDUC, MINISANTE, MIFOTRA, MIDMAR, MINEAC, MYICT, Minisitiri muri Perezidansi ya Repubulika); umuyobozi w’Umujyi wa Kigali, abasenateri n’abadepite; abahagarariye amadini n’amatorero n’abandi.

Itorero ry’igihugu “Urukerereza” ryerekanye umukino ushushanya ubutwari bw’Abanyarwanda wiswe “Umurage ndangamirwa”.

Urukerereza mu gitaramo
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO