00:00:00 IGIHE NETWORK KN KINYARWANDA EN ENGLISH FR FRANCAIS

Minisitiri Mbabazi yasabye Abanyarwanda kuganuza abavandimwe n’inshuti bashingiye ku bushobozi bafite

Yanditswe na Akayezu Jean de Dieu
Kuya 6 Kanama 2021 saa 10:18
Yasuwe :
0 0

Minisitiri w’Urubyiruko n’Umuco, Mbabazi Rosemary, yavuze ko n’ubwo ibirori byo kwizihiza Umunsi w’Umuganura bibaye mu bihe by’icyorezo cya Covid-19, Abanyarwanda bakwiye kuwizihiriza iwabo mu miryango basabana n’abavandimwe ndetse n’abafite uburyo bakaganuza inshuti zabo.

Minisitiri Mbabazi yabigarutseho kuri uyu wa Gatanu, tariki ya 6 Kanama 2021, mu butumwa yahaye Abanyarwanda ubwo hizihizwaga Umunsi Mukuru w’Umuganura mu kiganiro cyabaye hifashishijwe ikoranabuhanga.

Muri uyu mwaka ufite insanganyamatsiko igira iti “Umuganura, isôoko y’ubumwe n’ishingiro ryo kwigira”, ishingiye ku ndangagaciro z’umuco w’u Rwanda ari zo gukunda Igihugu, kurangwa n’ubupfura, gukunda umurimo n’ubumwe.

Minisitiri Mbabazi yavuze ko Umuganura wari ipfundo ryahuzaga Abanyarwanda, ari na yo mpamvu Abanyarwanda kuri ubu bawizihiza bishakamo iterambere rishingiye ku muco.

Ati “Turashimira Leta y’u Rwanda yagaruye Umuganura kugira ngo twongere twubake ubumwe bwacu cyane ko ari yo mahitamo yacu nk’Igihugu. Twifuza ko imbaraga dufite nk’Abanyarwanda zigaragara cyane mu biduhuza kuruta ibidutanya.”

Yakomeje agira ati “Twizihije Umuganura mu buryo budasanzwe kubera icyorezo cya Coronavirus; turasaba abagize umuryango baba hamwe, gukomeza kwizihiza Umuganura ariko bashobora no kuganuza inshuti, abavandimwe batabana, bifashishije ikoranabuhanga.”

Umuyobozi w’Akarere ka Gakenke, Nzamwita Deogratias, wari uhagarariye Minisitiri w’Ubutegetsi bw’Igihugu, yavuze ko nubwo icyorezo cyatumye hatabaho ibikorwa byo kuba abantu bahura ari benshi bagasabana bitabuza ko abagize umuryango bashobora gusangira ku musaruro bejeje.

Ati “Umuryango uri bwizihize neza Umuganura, abagize umuryango bari bufate umwanya wo guhura baganire kandi barebere hamwe Ibyo bagezeho baba barahuye n’ibibazo bagafata ingamba z’uko babirenga.”

Yakomeje agira ati “Abagize umuryango kandi baraza gusabana ariko kandi imiryango yifite iri bubone akanya ko kuganuza abagezweho n’ingaruka za Coronavirus baturanye cyane nk’abarwaye bakaba bagira icyo babaha cyabaramira.”

Mukarurangwa Mugabo Immaculée, umunyamuryango wa Unity Club Intwararumuri, yavuze ko mu byo bafite mu kigega bazigamye baganuza Abanyarwanda, harimo gahunda ya Ndi Umunyarwanda bafatanyije na Komisiyo y’Ubumwe n’Ubwiyunge.

Ati “Tuzakomeza gukora ibiganiro hirya no hino cyane nko mu mashuri kugira ngo bibe uruhererekane. Ikindi ni uko tuzakomeza kuba hafi y’abo twaganuje iyo ndangagaciro ya Ndi Umunyarwanda.”

Buri wa Gatanu wa mbere w’ukwezi kwa Kanama, Abanyarwanda bizihiza Umunsi Mukuru w’Umuganura, aho baba basangira umusaruro weze ndetse bakishimira n’ibyo bagezeho mu mwaka ushize banahigira ibyo bazakorera igihugu n’umuryango mugari mu mwaka ukurikiyeho.

Ku ruhande rw’Abanyarwanda baba mu mahanga na bo bagaragagaje ko Umunsi w’Umuganura bari kuwizihiza basangira n’imiryango yabo ndetse n’inshuti zabo, aho bamwe basangira indyo ya Kinyarwanda. Eugene Rurangwa we n’umuryango we baba muri Sénégal bizihije uyu munsi bategura amafunguro gakondo harimo ayo mu Rwanda nk’ibigori, ibishyimbo, imyumbati n’ibindi. Banakoze kandi umuhango wo guha abana amata ukunze kwitabwaho mu birori by’Umuganura.

Bamwe mu Banyarwanda bari ku migabane itandukanye bagaragaje ko aho bari bakizirikana amateka n’umuco w’u Rwanda. Harimo abari mu Bushinwa, mu Buhinde, mu Buholandi n’ahandi bagaragaje ibyo bateganya gukora mu kwizihiza Umuganura 2021 hagamijwe kuwusigasira nk’isôoko y’ubumwe.

Mutangana Yvette uba mu Bubiligi yavuze ko kwizihiza Umunsi w’Umuganura byongera gutuma baganiriza abato bakababwira amateka y’u Rwanda ndetse bakababibamo urukundo rwo kuzirikana umuco warwo.

Yagize ati “Kuri uwo munsi si ugusangira gusa ngo birangirire aho. Ahubwo tuganiriza abakiri bato umuco nyarwanda. Ikintu kimaze kugaragara ni uko abana bavukiye aha ngaha bakura bafite imico itandukanye. Utabaye hafi y’abana ngo ubasobanurire umuco w’aho baturuka hari igihe bibagirwa uwo muco wabo.”

Ibiganiro byo kwizihiza uyu munsi byitabiriwe n’Abanyarwanda bari imbere mu gihugu ndetse n’abari mu mahanga bifatanyije mu gutanga ibitekerezo no kugaragaza ibyishimo bafite kuri uyu munsi w’Umuganura.

Abanyarwanda basabwe kuganuza abavandimwe n’inshuti hifashishijwe ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .