IGIHE.com > Umuco
Itorero Inganzo Ngari ryapfushije umwe mu babyinnyi baryo (Updated)

Itorero Inganzo Ngari ryapfushije umwe mu babyinnyi baryo (Updated)


Yanditswe kuya 18-04-2012 - Saa 13:15'

Mu gitondo cyo kuri uyu wa Gatatu tariki ya 18 Mata 2012, ni bwo Itorero Inganzo Ngari ryatangaje inkuru y’urupfu rw’umwe mu babyinnyi baryo.

Nyinawinkotanyi Rwirangira Irène yari umukobwa ukiri muto dore ko yari afite imyaka 20 gusa. Yari amaze iminsi isaga 10 arwariye mu bitaro bya Kibagabaga, avurwa ariko abamuvura batazi icyo bavura nk’uko twabitangarijwe na Karemera Emery, Umuyobozi w’itorero twavuze haruguru.

Aganira na IGIHE, Karemera yagize ati : “Irène yafashwe ababara umutwe, afite n’imbeho. Yahise ajya kwivuza ku bitaro bya Kibagabaga kuko ari naho yari atuye. Abaganga baramwakiriye, bagerageza kumuvura ; ariko mu by’ukuri ntibabasha kubona icyo arwaye”.

Yakomeje agira ati : “Abaganga ntibigeze bemera ko bananiwe ngo bareke umwana ajye kwivuza ahandi, ahubwo barebye ibimenyetso n’uburyo yashikagurikaga ; bishyiramo ko arwaye ‘fièvre typhoide’, niko gutangira kumuhata imiti. Byageze aho babona ko uburwayi bwe buri gukomera aho koroha, hanyuma ku munsi w’ejo (ku wa Kabiri) ni bwo bamwohereje mu Bitaro Bikuru bya Kaminuza bya Kigali (CHUK)”.

N’agahinda kenshi, Umuyobozi Mukuru w’Itorero Inganzo Ngari yakomeje agira ati : “CHUK nibo babashije gutahura ko ubwonko bwa Irène bwari bwangiritse, ariko nta cyo bari bakiramira kuko mu ijoro ryakeye nibwo umwana yashizemo umwuka”.

Abaganga baracyanengwa gutanga serivisi mbi

Tuganira n’abantu batandukanye bari bazi Nyakwigendera Irène ndetse banamubaye hafi mu burwayi bwe bavuze ko urupfu rwa Irène rwatewe ahanini n’uburangare bw’abaganga. Abaganiriye na IGIHE ntibifuje ko amazina yabo ashyirwa ahagaragara ariko ntibyabajije kugaragaza akababaro kabo.

Umwe yagize ati : “Jye sinumva ukuntu abaganga ba Kibagabaga, biyemeza guhata umwana imiti batazi icyo arwaye ngo barakeka ko…Ntibakajye bakekeranya ku buzima bw’umuntu kabisa”.

Undi yagize ati : “Njye nari mpari ubwo Irène yageraga CHUK. Yagezeyo abaganga baho babanza gutinya kumwakira kuko babonaga ko ageze kure. Byabaye ngombwa ngo habaho kwegera abaganga ku buryo bw’umwihariko kugirango babashe kumwakira, n’ubwo byarangiye atuvuyemo”.

Icyo ibitaro bya Kibagabaga bibivugaho

Mu kiganiro cyihariye na IGIHE, Dr Christian Ntizimira uyobora ibitaro bya Kibagabaga yavuze ko Irène yageze muri ibyo bitaro ahinda umuriro n’umutwe umurya. Yakorewe ibizamini byabugenewe, ashyirwa mu bitaro mu gihe cy’iminsi 10, aho yahabwaga imiti ya antibiotiques zifite imbaraga kurusha izindi mu Rwanda.

Ati "Nyuma yahawe transfert ; ubundi hano iyo umuganga atanze transfert, umurwayi aherekezwa n’umuforomo, ariko Irène we yaherekejwe n’umuganga (docteur) kugirango asobanure neza uburyo arwaye hakurikijwe uko yakurikiranwe. Ntabwo rero yarangaranwe, kandi abaganga bababajwe no kumva ko hari abakeka ko batakoze akazi kabo neza, mu gihe bo ntako batagize".

Nyinawinkotanyi Rwirangira Irène yavutse ku itariki 12/03/1992 i Bujumbura mu gihugu cy’u Burundi. Yarangije amashuri yisumbuye mu mwaka ushize wa 2011, ku ishuri rya S.O.S ; uyu mwaka yari atangiye kaminuza i Mudende (UAAC).

Yakundaga umuco kandi akanezerwa cyane mu gihe cyo kubyina imbyino Nyarwanda.

Nyinawinkotanyi Rwirangira Irène
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO