Abanyeshuri ba ’Saint Paul International School’ basuye imurika ryateguwe na RALC

Yanditswe na

IGIHE

Kuya 18 Gashyantare 2016 saa 07:31
Yasuwe :
0 0

Abanyeshuri barenga 60 bo mu ishuri Saint Paul International School basuye imurika ry’ibitabo by’Ikinyarwanda ndetse n’ibikoresho gakondo ryabereye muri Sitade Ntoya y’i Remera, mu Mujyi wa Kigali.

Iryo murika ryateguwe n’Inteko Nyarwanda y’Ururimi n’Umuco (RALC) muri gahunda yo gutegura Umunsi Mpuzamahanga w’Ururimi Kavukire wizihizwa tariki ya 21 Gashyantare, buri mwaka.

Mu Rwanda, uwo munsi uzizihirizwa i Kigali kuri iki Cyumweru, hagendewe ku nsanganyamatsiko igira iti” Ikinyarwanda kinoze, ishingiro ry’Uburere n’Ubumenyi”.

Elizabeth Mujawamariya uhagarariye umuryango ‘Grace Rwanda Society’ wandika ibitabo bigenewe abana, ukorera muri Canada, yavuze ko inshingano ikomeye yatumye yitabira iri murika ari ugukomeza gukangurira abana gusoma, bahereye ku rurimi kavukire rw’Ikinyarwanda, kandi ko nta kabuza uwo mugambi uzagerwaho.

Yagize ati “Turagira ngo dukomeze gukangurira abana bato gusoma ibitabo by’ururimi rw’Ikinyarwanda,kuko hari inkuru nyinshi cyane cyane izirebana n’umuco, n’ibintu bya gakondo dusa nk’aho tugenda twibagirwa, cyane cyane ndabivuga nk’umuntu wabaga mu mahanga”.

Umukozi wa RALC asobanurira abanyeshuri impamvu yo kwizihiza Umunsi Mpuzamahanga w'Ururimi Kavukire

Bamwe mu banyeshuri basuye iri murika ry’ibitabo, ndetse n’ibikoresho gakondo biranga umuco nyarwanda, bavuze ko bishimiye iki gikorwa kuko babonye ibitabo byinshi birimo umuco nyarwanda.

Maliza Ntagwabira Praise, umunyeshuri wiga mu mwaka wa gatandatu, muri iri shuri yagize ati ” Nabonye ibintu byinshi biranga umuco nyarwanda, batweretse abantu benshi banditse ibitabo, baranadusobanurira”.

Kampire Francine, umwarimu muri Saint Paul International School, avuga ko ibintu byose bishimishije ngo kuko yabonye byinshi abanyeshuri babo batari bazi birimo umuco nyarwanda wimbitse kandi ufitiye abana n’abantu bakuru akamaro.

Yagize ati “Bigiye gutuma turushaho kwigisha abana bacu umuco nyarwanda wimbitse”.

Uyu mwarimukazi asanga hari ibikwiye kongerwamo imbaraga nko kongera iminsi y’imurika kugira ngo haboneke abana benshi bashobora gusura kuko harimo ibintu byinshi by’ingenzi bifitiye akamaro abana b’Abanyarwanda.

Ati “Twabonye hagomba kongerwa ibitabo, twasuye Editions Bakame, natwe ku ishuri hari ibitabo tubura cyane iby’amashuri yo hasi by’Ikinyarwanda batubwiye ko nta bihari kandi twari dufite amatsiko yo kumenya koko niba bihari.”

Umuyobozi w’ishami ry’Ururimi mu Nteko Nyarwanda y’Ururimi n’Umuco, Nsanzabaganwa Modeste, avuga ko ari ubwa mbere hakorwa gahunda yihariye y’abana mu kwizihiza Umunsi Mpuzamahanga w’Ururimi Kavukire. Gusa ngo ku bufatanye n’amashuri, iki gikorwa kizakomeza kunonosorwa kugira ngo kigere ku bantu benshi kurushaho.

Uretse ibitabo by’Ikinyarwanda n’ibikoresho bya gakondo byerekana umuco nyarwanda birimo kumurikwa, hari n’ibikoresho by’ubugeni.

Abanyeshuri berekwa imitako n'imyambaro bikorwa n'Abanyarwanda
Beretswe ibikoresho biranga umuco nyarwanda
Abanyeshuri bandika amazina y'ibikoresho bya Kinyarwanda n'icyo byakoreshwaga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza