Kwamamaza

Igitaramo ‘I Nyanza Twataramye’ cyasojwe benshi bakinyotewe

Yanditswe kuya 5-08-2016 saa 12:59' na Ezechiel Mbananabo


Igitaramo ‘I Nyanza Twataramye’ cyabaye kuri uyu wa Kane nyuma y’isozwa ry’Iserukiramuco Nyafurika ry’Imbyino(Fespad) cyarangiye ahagana saa saba z’ijoro benshi mu bakitabiriye bakunda umuco nyarwanda batifuza ko kirangira kubera uburyohe bakibonyemo.

Ni igitaramo ndangamuco nyarwanda ngarukamwaka gitegurwa n’Akarere ka Nyanza hamwe n’abafatanyabikorwa bako kigamije kugaragaza ibyiza by’umuco nyarwanda no kuwusigasira kugira ngo udacika.

Ku nshuro yacyo ya gatatu cyabereye mu Rukari ku Gicumbi cy’umuco mu Karere ka Nyanza, aho kitabiriwe n’imbaga y’abantu benshi baturutse imihanda yose bigajemo Abanyenyanza baje kwihera ijisho.

Cyaranzwe n’imbyino gakondo z’amatorero atandukanye nk’urukerereza n’urugangazi, abahanzi baririmba ku giti cyabo, ibisakuzo, abavuga amazina y’inka, gukirana, amahigi n’ibindi.

Iki gitaramo cyatangiye ku mugoroba wo kuri uyu wa Kane ahagana saa kumi n’ebyiri, kigasozwa ahagana saa saba z’ijoro,cyarangiye benshi mu bakitabiriye batifuza gutaha kubera uburyo cyabanyuze nk’uko bamwe babitangarije IGIHE.

Rugemintwari Dieudonné yavuze ko ari cyo gitaramo kiza kuri we mu byo yitabiriye byabereye mu Rukari.

Ati “Cyarangiye abantu benshi batabashika nubwo bwari bwije cyane.Twari tucyicaye tuzi ko turikesha kuko cyari gishimishije cyane.”

Yakomeje avuga ko yakigiyemo byinshi bimwibutsa umuco nyarwanda birimo ibyivugo, ibisakuzo n’ibindi.

Umukecuru w’imyaka 72 utifuje ko amazina atangazwa, yavuze ko igitaramo cyarangiye ari bwo yifuzaga ko cyakomeza bitewe n’imbyino nyarwanda ndetse no gukirana byamuryoheye.

Minisitiri w’Umuco na Siporo,Uwacu Julienne yabwiye imbaga y’abari bateraniye mu Rukari ko igitaramo ‘I Nyanza Twataramye’ kiri mu bikorwa byo kwishimira ibyiza by’ubukungu buri mu muco w’Abanyarwanda,kandi ko bishimiye ko hari n’abandi Banyafurika bitabiriye Fespad baje kwifatanya n’u Rwanda.

Barimo abaturuka mu bihugu bya Misiri,Senegal, Kenya na Repubulika Iharanira Demokarasi ya Congo.

Minisitiri Uwacu yasabye ko umuco wo gutarama ukwiye kuba uruhererekane hagati y’Abanyarwanda.

Uwacu wanashoje Fespad ku mugaragaro yavuze ko muri iri serukiramuco babonye umwihariko wa buri karere mu mbyino ndetse basanga Abanyafurika ari bamwe.

Fespad yatangiriye mu Mujyi wa Kigali tariki ya 1 Kanama ikomereza mu turere turimo Musanze mu Ntara y’Amajyaruguru, Kayonza mu Ntara y’i Burasirazuba na Rusizi mu Ntara y’u Burengerazuba ikaba yashorejwe i Nyanza mu Ntara y’Amajyepfo kuri uyu wa 4 Kanama.

Abanyamisiri basusurukije benshi
Abanyasenegal bagaragaje ubuhanga mu kuvuza ingoma
Abaturage bari benshi bitegereza imbyino z'abitabiriye Fespad
Bamwe mu bayobozi b'Uturere twa Nyaruguru, Huye n'utundi bari muri iki gitaramo
Hamuritswe inyambo zo mu Rukari
Minisitiri Uwacu na Guverineri w'Intara y'Amajyepfo mu bakurikiye iki gitaramo
Senderi ari mu bahanzi basurukije abitabiriye igitaramo

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved