Uwase yashyize hanze igitabo kigaruka ku butwari bw’umwana w’umukobwa

Yanditswe na Mukaneza M.Ange
Kuya 21 Kamena 2018 saa 09:04
Yasuwe :
0 0

Uwase Alonga Dominique, Umunyarwandakazi usanzwe yandika ibitabo bikubiyemo inkuru z’abana, yashyize hanze igitabo gikubiyemo umugani ugaragaza ubutwari bw’umwana w’umukobwa watabaye umudugudu yari atuyemo abikesha inkweto ze.

Iki gitabo yise ‘Ysolde and Her Magical Shoes’, gikubiyemo inkuru ikozwe mu buryo butari busanzwe bumenyerewe mu Rwanda. Igaruka ku mateka y’umwana w’umukobwa wari warahawe inshingano ikomeye yo kugaburira agace bari batuyemo, ibintu bitamworoheye kubera kubura mama we.

Byaje kurushaho gukomera ariko ubwo umugore w’umugome bari baturanye yirukanwaga mu cyaro cy’iwabo agasiga abavumye, umuvumo bakijijwe n’inkweto za Ysolde zari zifite imbaraga zidasanzwe.

Mu kiganiro na IGIHE, Uwase usanzwe ari n’umuyobozi w’inzu itunganya ibitabo ya Imagine We, yavuze ko iki gitabo yacyanditse agendeye ku nkuru itangaje ya Ysolde Shimwe, rwiyemezamirimo washinze UZURI K&Y Designs ikora inkweto z’abagore n’abagabo, afatanyije na mugenzi we Kevine Kagirimpundu.

Ati “Birasa no kwereka abantu ibiri ku mutima wanjye. Birashimishije cyane kuba inkuru yanjye yarasohotse ikaba iri gusomwa n’Isi. Ndumva byandenze, ndizera ko bazabona urukundo n’imbaraga nashyize mu kwandika iki gitabo.”

Yakomeje avuga ko inzozi ze ari uko Abanyarwanda basobanukirwa ko nabo bashobora kugira inkuru zisekeje kandi zitangaje.

Ati “Ntabwo bikwiye ko duhora dusoma Cinderella kandi bishoboka ko twasoma Ysolde. Ndizera ko iki gitabo kizatuma abana b’abakobwa b’Abanyarwanda biyumvamo ubushobozi. Ndizera ko ababyeyi bazishimira iki gitabo, ndetse Abanyarwanda bazahuza imbaraga kugira ngo iki gitabo kizasomwe n’abana bose mu Rwanda no hanze. Reka tugeze uyu mugani mwiza ku Isi yose.”

Umuyobozi ushinzwe itangazamakuru muri Imagine We, Malika Helene, yavuze ko bemera ko inkuru zifitemo ubushobozi bwo kubera icyitegererezo abakiri bato no kubigisha indangagaciro zikwiye.

Ati “Turifuza guhindura isura y’igihugu cyacu n’umugabane muri rusange binyuze mu nkuru zacu. Icyo twifuza ni uko iki gitabo cyagera ku bana b’abakobwa benshi bashoboka, turifuza gusaba buri wese kudufasha muri uru rugendo. Gurira iki gitabo umukobwa wawe, umwisengeneza, mubyara wawe, cyangwa ukigurire umwana w’umukobwa uwo ari we wese aho utuye. Dufashe kugeza iki gitabo mu mpande zose z’isi.”

Igitabo ‘Ysolde and Her Magical Shoes’ cyashyizwe hanze na Imagine We isanzwe ikora ibitabo bigenewe abana bato n’abatangiye kubyiruka, kuri ubu ushobora kukibona mu masomero atandukanye arimo Ikirezi Bookshop, Charisma ndetse no muri Uzuri K&Y.

Iki gitabo cyanditswe hagendewe ku nkuru ya Ysolde Shimwe, umwe mu bashinze inzu ikora inkweto ya Uzuri K&Y
Iki gitabo cyanditswe hagendewe ku nkuru ya Ysolde Shimwe, umwe mu bashinze inzu ikora inkweto ya Uzuri K&Y

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza