‘Urukweto rw’ibumoso rwa mushiki wanjye’, igitabo gishya kivuga ku myitwarire y’abakobwa

Yanditswe na Ferdinand Maniraguha
Kuya 8 Gicurasi 2018 saa 02:11
Yasuwe :
1 0

Imvugo “ab’ubu” yahozeho kandi izahoraho. Ikunze kwifashishwa kenshi abantu bashaka kwerekana ko urubyiruko rw’iki gihe rudashobotse cyangwa rukora ibihabanye n’umuco gakondo w’abakurambere.

Byahumiye ku mirari muri ibi bihe bya Facebook, WhatsApp na Instagram, aho usanga abakuze batavuga rumwe n’abato bakunze kwifotoza bambaye ubusa bagakwirakwiza amafoto ku mbuga nkoranyambaga. Hari na bamwe mu bakobwa batungwa agatoki ko bahinduranya abasore nk’abahinduranya imyenda n’ibindi.

Ashingiye kuri ibyo byose, Umwanditsi Mfuranzima Fred, yanditse agatabo yise ‘A Sister’s Left Shoe’ gakubiyemo ibaruwa yageneye mushiki we amugira inama y’uburyo yakwitwara mu bibazo bishingiye ku iterambere byugarije abakobwa hanze aha.

Iyo baruwa itanga inama ku bakobwa cyane cyane bibwira ko bazatezwa imbere no kuryamana n’abagabo, abashidukira ibigezweho bakibagirwa ibyo bari barimo, abibwira ko uburanga bwonyine buzababeshaho n’ibindi.

Ni igitabo cy’amapaji 32 kiri mu Cyongereza cyoroshye kigenewe cyane cyane abangavu n’inkumi.

Mu kiganiro na IGIHE, Mfuranzima Fred, yavuze ko igitekerezo cyo kwandika iki gitabo cyaturutse ku muntu wamuhamagaye kuri radio anenga abakobwa b’iki gihe.

Yagize ati “Hari habaye Umunsi w’Abagore umwaka ushize. Hari ikiganiro nakoraga kuri Radio Isango Star, umuntu arahamagara aravuga ngo ‘abakobwa b’iki gihe nta kigenda, ntibazi gukubura, ntabwo bashoboye’. Nsohotse naratekereje nti ‘ese koko ntabwo bashoboye? Ese niba badashoboye ni iki nabafasha?”

Yavuze ko kuri ubu hari byinshi abakobwa bakwifashisha biteza imbere ariko bakabikoresha nabi ari naho hava kubanenga.

Ati “Igitabo ntangira mubwira ibyiza byo kuba umukobwa noneho nkagaruka kuri bya bindi babanenga cyane mwereka ko atari ko byakabaye. Ntukwiriye kwifotora ngo ushyire amafoto yawe ku mbuga nkoranyambaga wambaye ubusa, ntukwiye kwigira gutya […] Urubyiruko rufite byinshi rwagakoze, niruve mu burangare, igihugu kirarukeneye.”

Uyu musore w’imyaka 21 warangije amashuri yisumbuye mu Ishami ry’Amateka, Ubukungu n’Ubumenyi bw’Isi (HEG) mu 2016, avuga ko iki gitabo kizafasha ababyeyi batinyaga kuganiriza abakobwa babo ku bijyanye n’imyitwarire iriho muri iki gihe.

Ati “Hari ababyeyi batinya kuganiriza abana babo cyangwa abahungu batinya kuganira na bashiki babo ku myitwarire runaka ariko ashobora kuguha iki gitabo kikakuganiriza.”

Muri iyi baruwa, Mfuranzima asoza abwira mushiki we ati “Wibuke ko hari ibintu udashobora kugarura birimo umugati wamaze kuribwa, ijambo ryamaze kuvugwa, amahirwe yatakaye, igihe cyahise n’ubusugi bwatakajwe.”

Iki gitabo ni icya gatatu Mfuranzima asohoye nyuma y’ibindi birimo icyitwa “Kuva ku gasozi Bututsi” kivuga ku mateka y’agasozi kitwaga “Bututsi” kiciweho Abatutsi basaga ibihumbi 43 muri Jenoside yakorewe Abatutsi, yasohoye umwaka ushize. Agasozi “Bututsi” gaherereye mu yahoze ari Komini Rusatira muri Butare, ubu ni mu karere ka Huye, muri Isar Songa.

Iki ni igitabo cya gatatu uyu musore w'imyaka 21 ashyize hanze
Mfuranzima avuga ko igitabo cye kigamije gutanga inama ku bakobwa by'umwihariko ababyirukira mu bihe bya none
‘Urukweto rw’ibumoso rwa mushiki wanjye’, igitabo gishya kivuga ku myitwarire y’abakobwa muri iki gihe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza