Umwanditsi Mfuranzima yasohoye igitabo yise ‘Urwandiko kuva ku gasozi Bututsi’ kivuga kuri Jenoside

Yanditswe na Evariste Nsengimana
Kuya 30 Werurwe 2017 saa 02:29
Yasuwe :
0 0

Umwanditsi Fred Mfuranzima yasohoye igitabo cyitwa “Kuva ku gasozi Bututsi” kivuga ku mateka y’agasozi kitwaga “Bututsi” kiciweho abatutsi basaga ibihumbi 43 barimo abari bahatuye n’abahahungiye muri Jenoside yo muri Mata 1994.

Agasozi “Bututsi” gaherereye mu yahoze ari komini Rusatira muri Butare, ubu ni mu karere ka Huye, muri Isar Songa.

Mfuranzima atuye mu Karere ka Gasabo mu mujyi wa Kigali, avuga ko uretse kuba yari asanzwe ari umwanditsi w’ibitabo, ngo yatekereje kwandika iki gitabo ashaka ko amateka y’aka gasozi yagira ahantu abikwa.

Mu kiganiro yagiranye na IGIHE, yavuze ko yanditse iki gitabo mu buryo bw’ibaruwa yifuzaga ko buri munyarwanda azasoma agasobanukirwa n’amateka y’aka gasozi mu gihe cya Jenoside.

Yagize ati “Cyanditse nk’ibaruwa ; nandikiye umuntu wese ukunda amahoro. Nacyise ‘Kuva ku gasozi Bututsi’ kuko ako gasozi kera kitwaga ‘Bututsi’. Ni ahantu hiciwe abantu benshi muri Jenoside yakorewe abatutsi, hari n’urwibutso rushyinguyemo abantu ibihumbi bisaga 40. Nagiyeyo ngiye kwibuka numvise ibyahabaye ndavuga nti ‘byaba byiza nanditse igitabo kivuga ibyahabaye kuko nta kintu cyavugaga ku mateka yaho.”

Umwanditsi Fred Mfuranzima avuga ko yanditse iki gitabo ashaka kugira uruhare mu kubika amateka y'agasozi 'Bututsi'

Mfuranzima warangije amashuri yisumbuye mu Ishami ry’Amateka, Ubukungu n’Ubumenyi bw’Isi (HEG) mu 2016, yakomeje avuga ko mu mwanya muto n’ubushobozi yabonaga akiri umunyeshuri yafashijwe n’ikigo cyamuhaga umwanya wo gukora ubushakashatsi ku mateka y’aka gasozi maze amakuru abonye akajya ayandika buhoro buhoro kuko yari afite intego kandi yumva ko azayigeraho.

Iki gitabo, gikubiyemo ubuhamya bw’abantu batandukanye, bujyanye n’amateka ya Jenoside yakorewe abatutsi ku gasozi Bututsi n’abari bahungiye hafi yako, amateka y’iyahoze ari komine Rusatira, amazina ibihumbi bisaga umunani y’abantu bakuru biciwe kuri ako gasozi n’ibitekerezo by’urubyiruko kuri Jenoside yakorewe abatutsi.

Umwanditsi kandi yagarutse ku nkomoko z’amazina amwe yo muri aka gace nka Rusatira, Ruhashya, Kinazi n’ayandi.

Iki gitabo gisohotse ari icya mbere cy’uyu mwanditsi kivuga kuri Jenoside, gusa hari ikindi yari yaratangiye kiri hafi gusohoka.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza