00:00:00 IGIHE NETWORK KN KINYARWANDA EN ENGLISH FR FRANCAIS

Umusizi Nsanzabera agiye gusohora igitabo ku mateka y’umwiherero n’umushyikirano mu mateka y’u Rwanda

Yanditswe na IGIHE
Kuya 12 Kanama 2021 saa 03:24
Yasuwe :
0 0

Umusizi Nsanzabera Jean de Dieu agiye gushyira hanze igitabo gishya yise “Umwiherero n’umushyikirano, Mu muco n’amateka y’u Rwanda”, gikubiyemo amateka y’umuzi w’umwiherero w’umushyikirano mu mateka y’u Rwanda, byabaye umuco w’ibihe byose.

Ni igitabo kitezweho kurangira Abanyarwanda inkomoko y’umwihererero n’umushyikirano bavomamo ubumwe, n’ibyemezo bisangiwe mu kubaka igihugu. Iki gitabo kinakomoza ku myiherereo n’imishyikirano yabayeho, n’imyanzuro yagiye ifatirwamo uhereye mu ntango y’u Rwanda ku ngoma ya Gihanga ahasaga mu wa 1091 kugeza ku buyobozi bwa Kagame Paul mu wa 2021.

Icyo gitabo kivuga byinshi byiza byaranze amateka y’umushyikiraro n’umwiherero mu Rwanda nk’ibikorwa ndangasano na ndangamyumvire y’uburyo bakemuraga ibibazo bahuye na byo, bikanabafasha gutegura igenamigambi ryubaka igihugu mu myaka amagana n’amagana batakiriho.

Nsanzabera yavuze ko Umushyikirano ari kimwe mu birangamateka y’umuco w’Abanyarwanda mu mibereho yabo, bkaba ikirango cy’ikirenga mu mibereho n’imyumvire ya bo.

Ati “Kuva na kera, nta Munyarwanda wakoraga ikintu icyo ari cyo cyose ntawe bagiye inama zo kukinoza. Amateka y’u Rwanda, yaranzwe n’ubumwe n’umushyikirano udakebakeba, haba mu bayobozi b’igihugu hagati yabo, haba mu baturage hagati yabo, ndetse unashinga imizi hagati y’abaturage n’abayobozi.”

Usibye ko n’umunyamahanga washakaga kugirana n’u Rwanda [Mu bayobozi n’abaturage] umushyikirano uhamye, atari ahejwe, dore ko mu mateka y’u Rwanda, hagiye hagaragaramo benshi mu bihugu by’ibituranyi by’u Rwanda, bahamije umubano n’umushyikirano w’akaburarugero n’u Rwanda.

Nsanzabera akomeza agira ati“Inama y’umushyikirano n’umwiherero w’abayobozi bakuru b’gihugu, ni umugozi w’umurunga waranze uruhererekane rw’abayobozi b’u Rwanda, ni kimwe mu biranga imitekerereze yabo yo kubaka igihugu nk’icyabo koko badakebakeba cyangwa se badategereje ko hari undi uzaza kukibubakira, ntibakibemo nk’abacanshuro cyangwa se abahiganirwa kurusha, bose bakomora ku nama y’umushyikirano. Kuko inshingano z’Abayobozi mu Rwanda rwo hambere, uw’ibanze yabaga umuturage, umuryango n’igihugu”.

Yavuze ko u Rwanda rufite ibintu byinshi bikubiye mu murage rwasigiwe n’abakurambere mpangarwanda, byadufasha kubaka u Rwanda ruramye kandi ruhamye.

Ati “Ibintu byose biri mu myumvire y’Abanyarwanda, mu mitekerereze no mu migenzereze ya bo y’ihangabuhanga, bivomwa mu murage dukomora ku bakurambere mpangarwanda, ari na byo byatumye u Rwanda ruhinduka umushinga aho kuba igihugu, ruba umurage uhererekanywa, aho kuba ubukonde bw’abantu ku giti cyabo.”

Iki gitabo kizahosohoka mu minsi ya vuba. Nikijya ahagaragara kizaba kiboneka muri nzu zigurisha ibitabo nka Librairie Ikirezi na Caritas.

Nsanzabera Jean de Dieu , ni umwanditsi w'ibitabo bigaruka ku muco n'namateka by'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .