Ubuhamya busiganuza Imana, igitabo cya Padiri Nkusi kigaragaza urugendo yanyuzemo muri Jenoside

Yanditswe na Ferdinand Maniraguha
Kuya 4 Ukwakira 2019 saa 11:07
Yasuwe :
0 0

Padiri Nkusi Pierre Claver yasohoye igitabo ‘Rwanda 1994: Ubuhamya busiganuza Imana’ kivuga ku rugendo rw’umusaraba yanyuzemo mu gihe cya Jenoside yakorewe Abatutsi mu 1994.

Mu 1994, Nkusi yari Padiri Mukuru wa Paruwasi Nyarubuye mu Karere ka Kirehe, hamwe mu hiciwe Abatutsi benshi kandi mu buryo bubabaje cyane.

Jenoside yabaye Nkusi atari muri Paruwasi ye kuko yatangiye ari i Kigali, akahatangirira urugendo rw’umusaraba agenda yihisha abara ubukeye, abihayimana bagenzi be n’abakirisitu bamwicirwa mu maso n’ibindi.

Igitabo cye agihera tariki 7 Mata ubwo yageraga i Kigali, ategereje ko ari burare mu Kigo cy’abihayimana cya Centre Christus. Byaje guhinduka uwo munsi ntiyaharara bukeye aza kumenya ko abihayimana 17 bishwe bazira uko bavutse.

Mu gitabo cye abo bihayimana abagarukaho by’umwihariko, buri wese akamuvuga ibyo amwibukiraho.

Igitabo cya Padiri Nkusi gikomereza mu Ruhango aho yahise ajya ari naho umuryango we wari utuye, akagaragaza inzira y’umusaraba banyuzemo ngo bave mu Ruhango bagere i Kabgayi ahari hahungiye ibihumbi by’impunzi ziganjemo Abatutsi.

I Kabgayi Nkusi avuga uburyo bahagiriye ibihe bibi, bamwe muri bo Interahamwe zikaza kubica ariko abasigaye bagakomezanya bifashishije isengesho no kudacika intege.

Padiri Nkusi akomeza avuga uko bavuye i Kabgayi mu buryo butoroshye, bagakomereza mu nkambi mu Byimana no mu Bugesera kugeza bageze i Rwamagana ubwo Jenoside yahagarikwaga.

Muri urwo rugendo rwose, Padiri Nkusi wamuritse igitabo cye kuri uyu wa Kane tariki 3 Ukwakira 2019, yavuze ko yiboneye shitani n’ibikorwa byayo bibi, akabona n’ukuboko kw’Imana nubwo muri ibyo bihe hari ubwo bibazaga niba Imana ikiriho.

Ati “Shitani yatanyije abantu, kugera aho kwica babigira nk’umukino, bakabigira nk’aho ari ibyishimo. Shitani kandi nayibonaga mu gahinda ko kutifatanya n’abababaye.Twari dutunzwe n’isengesho, nubwo twari tubayeho nabi ariko ntitwasibaga misa.”

Abajijwe impamvu yabanje gutegereza imyaka 25 ngo yandike, Padiri Nkusi yavuze ko yari agifite ibikomere, yajya kwandika bikanga.

Ati “Hari igihe ujya kwandika ukibuka umuhoro waguciye hejuru, ukibuka gerenade yaguciye hejuru ugatitira. Twamaze igihe dutitira.”

Yavuze ko nubwo u Rwanda rwanyuze mu bihe bibi, ubu ruri mu muzuko bikaba bisaba imbaraga za buri wese ngo ibyabaye mu Rwanda bitazasubira.

Umushakashatsi muri Komisiyo y’Igihugu yo Kurwanya Jenoside (CNLG), Bimenyimana Valens yashimiye Padiri Nkusi kuba yaranditse ku byo yanyuzemo mu gihe cya Jenoside.

Yavuze ko ari umusanzu ukomeye mu guhangana n’ingaruka za Jenoside, abayihakana n’abayipfobya, anashima ko bikozwe n’umwe mu bihayimana ubusanzwe badakunze kuvuga ibyo babonye muri Jenoside.

Ati “Ndagushimira ku gitekerezo wagize cyo kwandika. Nakunze ko wabaye ijwi riturutse ahantu hacecetse, hatavuga cyane. Ntabwo turagira abapadiri benshi batobora ngo bavuge ibyo babonye. Ibi bibe intangiriro yo kumenya ukuri.”

Ntamuhanga Ningi Emmanuel yashimiye Padiri Nkusi ku gitabo yanditse, asaba ko habaho no gusuzuma uruhare rw’amadini mu gutanya Abanyarwanda, hagafatwa umwanzuro ku buryo amadini yigisha ashingiye ku muco Nyarwanda kurusha umuco w’ahandi.

Yatanze urugero rw’uburyo Abanyarwanda bo hambere iyo babaga baranywanye, bakomeranagaho ntihagire uhemukira undi, nyamara muri Jenoside, abahuje idini ntibatinye kwica bagenzi babo.

Ati “Urebye uburyo Abanyarwanda batinyaga igihango mu Rwanda rwo hambere, byaruse uko Abanyarwanda batinye uwo bahuje idini. Iyo umugatolika atinya kugirira nabi umugatolika mugenzi we, umudiventisiti agatinya mugenzi we, hari benshi bari kurokoka.”

Padiri Nkusi yavuze ko igitabo cye nyuma yo kugishyira mu Kinyarwanda, ateganya no kugishyira mu Gifaransa n’Icyongereza.

Yavuze ko nubwo u Rwanda rwanyuze mu bihe bibi, ubu ruri mu muzuko bikaba bisaba imbaraga za buri wese ngo ibyabaye mu Rwanda bitazasubira
Abantu batandukanye bitabiriye imurikwa ry'igitabo cya Padiri Nkusi
Ntamuhanga Ningi Emmanuel yashimiye Padiri Nkusi ku gitabo yanditse, asaba ko habaho no gusuzuma uruhare rw’amadini mu gutanya Abanyarwanda
Abantu b'ingeri zitandukanye bakurikiranye imurikwa ry'igitabo cya Padiri Nkusi
Nyuma yo kwandika iki gitabo mu Kinyarwanda, Padiri Nkusi arifuza kugishyira mu Cyongereza n'Igifaransa

Amafoto: Dushimimana Ami Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza