No muri Paradizo hashobora kumeramo imifatangwe-Ev Uwagaba avuga ku rushako rwe rutarambye

Yanditswe na Karirima A. Ngarambe
Kuya 27 Mutarama 2021 saa 07:03
Yasuwe :
0 0

Uwagaba Joseph Caleb afite inkuru ushobora kumva, amarira agashoka. Uyu muvugabutumwa muri Bethesda Holy Church yabuze umugore we Mucyo Sabine nyuma y’igihe gito bashyingiwe.

Nubwo aba bombi bari bamaze amezi atandatu bahamije isezerano ryo kubana nk’umugabo n’umugore [basezeranye ku wa 3 Werurwe 2018], iminsi mike ni yo bamaranye kuko igihe kirekire Mucyo yakimaze mu bitaro.

Mucyo Sabine yitabye Imana ku wa 4 Ukwakira 2018 azize indwara yitwa Systemic Lupus Erythematosusituma; inkuru yabaye incamugongo kuri Uwagaba, inshuti n’umuryango we.

Uwagaba uvuka i Rwamagana yateye intambwe ya mbere yandika igitabo cy’amapaji 170 yise ‘A Hundred days in marriage’ kivuga ku bigwi n’amateka y’umugore we.

Uyu mugabo w’imyaka 31 y’amavuko kuri ubu abarizwa muri Pologne aho yagiye kwiga amasomo y’Icyiciro cya Gatatu muri Kaminuza ya Varsovie mu bijyanye n’Ubwikorezi n’Ubucuruzi Mpuzamahanga.

Mu kiganiro cyihariye na IGIHE, Uwagaba yavuze ko igitabo cye ‘‘A hundred days in Marriage’’ bishatse kuvuga ‘‘Iminsi 100 ya mbere y’urushako’’, yacyanditse ashaka gusohoza ibyo yemeranyije n’umugore we.

Yagize ati ‘‘Nashakaga kubahiriza isezerano nagiranye n’umugore wanjye Mucyo Sabine mbere y’uko yitaba Imana. Mu gihe yari arwaye hari ibyo namusezeranyije nzakora, impamvu ya kabiri ni uko namufashe nk’umuntu w’icyitegererezo numva ko ubuzima bwe n’amateka bye bitapfa kurangira gutya gusa kubera ko yitabye Imana. Oya Sabine ntazibagirana kuko namushyize mu gitabo. Nifuza ko umuntu wese uzabishaka azamenye amateka ye.’’

Yakomeje avuga ko ikindi cyamuteye kwandika ari uko abahanga mu bijyanye n’isanamitima bavuga ko ari umuti wavura agahinda cyangwa ihungabana runaka kuko ‘bifasha kuvuga ibyo utabashaga kwatura ngo uvuge kubera amaranga mutima yawe’.

Ati ‘‘Nanditse rero ngo ibindimo mbikure ku mutima bisohoke bimvemo mbisangire n’abandi.’’

Yasobanuye ko ibikubiye mu gitabo bitanga n’igisubizo ku bibaza ku rupfu rw’umugore we.

Yakomeje ati ‘‘Dukora ubukwe byari nk’ibisanzwe nk’uko abandi bose bakundanye babigenza twari tumaze igihe kinini tumenyanye, aha nashakaga no kwerekana ukuntu abantu bajya bivuga ko urugo ahanini ari Paradizo nibyo koko ariko ntibihira bose kuko muri iyo Paradizo hari igihe hashobora kumeramo amahwa y’ibitovu cyangwa imifatangwe ku buryo utungurwa.’’

Uwagaba yavuze ko igitabo cye gifite amasomo by’umwihariko mu kubaka ingo.

Ati ‘‘Urugo si ugutura muri paradizo ni nayo mpamvu, nibanze ku minsi mike twabanyemo na Mucyo kuko benshi bakeka ko ari iminsi ya buki yo kwishimisha mu buzima ariko byabaye ibindi kandi tuguma ku isezerano twagiranye.’’

‘‘Nyuma y’ubukwe twagiye mu kwezi kwa buki nk’abandi bose, tujya mu gihugu duturanye, tujya ku Gisenyi turatembera, turataha tugeze mu rugo umugore atangira kugaragaza ibimenyetso by’uburwayi. Twagiye kwa muganga batubwira ko ari ibintu bitagoye baduha imiti isanzwe, bavuga ko ari umunaniro.’’

Nyuma y’icyumweru, Mucyo yasubiye mu kazi ariko hashize igihe gito atangira kubyimba ibirenge, ibyo bamwe bitiranyije no gusama, ariko ‘uko iminsi ishira akarushaho kuremba.’

-  Uwagaba yahungabanyijwe n’urupfu rw’umugore we

Ku wa 28 Nzeri 2018, Mucyo yajyanywe mu Bitaro bya CHUK ndetse abaganga baza kumenya indwara arwaye.

Uwagaba avuga ko icyo gihe yatangiye gushaka uko yajya kumuvuriza mu bihugu bifite ibikoresho bihambaye kuko mu Rwanda byari byananiranye ariko [Mucyo] ajya muri koma yamazemo ibyumweru bitatu, ahita yitaba Imana.

Ati ‘‘Uburwayi bwe bwari bugoye ku buryo byampungabanyije cyane. Sabine yari umukobwa ukora siporo, ubona ko afite ameze neza ariko nyine ubuzima burahinduka.’’

Mu gitabo cye, Uwagaba akomeza gushimangira isezerano yagiranye n’umugore we.

Ati ‘‘Urukundo nyarwo, kurinda isezerano, kwitanga, ni byo nahaye umutwe wa kabiri w’izina ry’igitabo. Kugira urugo rwiza cyangwa urushako rwiza bisaba kwitanga, kwitonda, kugira ibyo wigomwa kugira ngo uwo mugiye kubana abe we wuzuye.’’

Mu gihe umugore we yari arwaye, Uwagaba yagombaga kumwitaho ariko agakomeza gushaka imibereho ngo abone ikibatunga.

Ati ‘‘Umugore wanjye arwaye twarakubititse cyane kuko nagombaga no gukora ngo tubeho, na we nkamugeraho kenshi bishoboka. Haje kugera igihe yumva yorohewe yakize, twaraganiriye arambwira ati ‘ariko uzi ko ubuzima twaciyemo bugoye kandi bubabaje?’ Icyo gihe yacurangaga gitari, arambwira ngo ‘uwazahimba indirimbo cyangwa nkakora umuvugo ariko nkagira ikintu nkora nk’inkuru ivuga iminsi twabanyemo muri aya mezi.’’

Icyo kiganiro ni cyo cyanogerejwemo igitekerezo cyo kwandika igitabo ‘‘A hundred days in Marriage’’ kigaruka ku minsi ya mbere yabo mu rushako.

Uwagaba ati ‘‘Abari aho bamubwiye bati ‘byaba birebire kereka mubishyize mu gitabo. Sabine ati ‘nimumbwire rero tuzakita dute?’ Avuga ko ubwo tumaze amezi atatu mu bibazo reka tuzacyite ‘Mu minsi 100 twubatse urugo’. Ni we wihitiyemo, nibyo nise isezerano. Ubwo twaje gusezererwa turataha nyuma aza kwitaba Imana.’’

Urupfu rw’umugore we rwaramuhungabanyije kugeza aho yagiye gushaka umuganga w’indwara zo mu mutwe amugira inama yo kuruhuka bitewe n’ihungabana yari afite.

Ati ‘‘Uwo muganga yangiriye inama yo kwandika kuko njye rwose sinigeze ntekereza ko nzandika igitabo.’’

Akimara kumurika ‘A Hundred days in marriage’, Kaminuza yigamo i Varsovie muri Pologne yamugeneye igihembo cy’umunyeshuri wakoze ikintu gikomeye.

Igitabo cya Uwagaba kiri mu Cyongereza, anateganya kugishyira mu Gifaransa no mu Kinyarwanda. Kiboneka ku maguriro ya murandasi azwi ku Isi yose nka Amazon, Xlibris, Barnes, Noble, Google, iBooks, Scribd, Booktopia n’ayandi.

-  Reba ikiganiro na Uwagaba Joseph asobanura Igitabo cye ‘A Hundred days in marriage’

Umuvugabutumwa Uwagaba Joseph Caleb yanditse igitabo ku nkuru y’urupfu rw’umugore we Mucyo Sabine bari bamaze igihe gito bashyingiwe
Uwagaba Caleb na Mucyo Sabine bahamije isezerano ryo kubana akaramata ku wa 3 Werurwe 2018
Bamaranye igihe gito bari mu byishimo by'abagishyingirwa, umugore ahita arwara
Uwagaba yavuze ko yanditse igitabo ashaka gusohoza isezerano yagiranye n'umugore we ataritaba Imana
Umuyobozi Mukuru wa University of Economics and Human Sciences in Warsaw, Dr. Konrad Janowski, yashimiye Uwagaba Caleb wakoze igikorwa cy'ubutwari mu mwaka ushize mu biga muri iyi kaminuza
‘A Hundred days in marriage’ ni igitabo cy'amapaji 170 cyanditswe mu rurimi rw'Icyongereza

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .