Niyirora yamuritse igisigo kirata ubutwari bwa Paul Kagame wayoboye urugamba rwo guhagarika Jenoside

Yanditswe na Ferdinand Maniraguha
Kuya 30 Mata 2021 saa 11:39
Yasuwe :
0 0

Mu nganzo n’umujyo bifite injyana nk’imwe y’abasizi b’abahanga nka Nyakayonga ka Musare, Niyirora Christian yanzitse ashyira hanze igisigo kiva imuzi ubutwari bwa Paul Kagame wayoboye urugamba rwo kubohora igihugu no guhagarika Jenoside hamwe n’ingabo yari ayoboye.

Iki gisigo yacyise ‘Ntukazime uri Rudasumbwa, Ntiwemeye ko Ruzima Burundu’.

Niyirora yabwiye IGIHE ko iki gitabo yacyanditse mu buryo bw’igisigo (poem) agamije kuvuga ku ruhare rwa Maj Gen Paul Kagame wari Umugaba w’Ingabo za FPR Inkotanyi mu guhagarika Jenoside yakorewe Abatutsi mu 1994 ndetse n’uruhare rw’uwo muryango mu rugendo rwo kunga Abanyarwanda.

Iki gisigo cyanditse mu buryo bw’utubeshuro buzwi cyane mu busizi, hifashishijwe injyana ya Bikungero, ni ukuvuga ko buri nteruro igizwe n’imigemo 12 kandi buri mikarago 20 ihuje umusozo.

Muri icyo gisigo umwanditsi avuga ku buzima bwa Paul Kagame mbere yo kubohora u Rwanda, urugendo rwo guhagarika Jenoside yakorewe Abatutsi mu 1994, urugendo rwo kunga Abanyarwanda n’urugendo rwo gusana no kubaka igihugu nyuma ya Jenoside.

Niyirora yavuze ko yanditse icyo gitabo agamije gutanga umusanzu we mu kubaka u Rwanda no guteza imbere umuco wo gusoma no kwandika by’umwihariko binyuze mu busizi.

Ati “Ni ugukomeza gutanga umusanzu wo kubaka u Rwanda ruzira icyasha no guteza imbere umuco wo gusoma no kwandika by’umwihariko gakondo yacu.”

Yavuze ko kandi ubutwari bw’Inkotanyi ari isomo rikomeye ku rubyiruko ruriho ubu.

Ati “Abenshi mu barwanye urugamba rwo kubohora igihugu bari urubyiruko aho bemeye guhara byose, bose na hose ngo barohore uru Rwanda ubwo rwari rurohamye. Ni ikintu gikomeye dukwiye kubigiraho tukirinda kuba ba ntibindeba, ahubwo wa muco wo gusigasira ko ari twe maboko y’u Rwanda ugakomeza kuganza muri twe urubyiruko.”

Iki gitabo gifite amapaji 17, igisigo nyir’izina kikagira imikarago 210. Kuri ubu kiboneka muri G &I publishers.

Iki gitabo cy'amapaji 17 gikubiyemo igisigo kirata ubutwari bwa Perezida Paul Kagame
Niyirora Christian yizeye ko igisigo cye kizafasha urubyiruko gufatira urugero ku butwari bw'ingabo zari iza FPR Inkotanyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .