“Nanditse ngo ntsinde abifuje ko dushira ntihazagire ubara inkuru ye” Ndizeye Omar

Yanditswe na Karirima A. Ngarambe
Kuya 15 Mutarama 2021 saa 08:42
Yasuwe :
0 0

Ndizeye Omar aherutse kwandika igitabo ‘‘Life and Death in Nyamata’ kigaruka ku mateka ya Jenoside yakorewe Abatutsi i Nyamata mu Bugesera n’uburyo yatangiye gutegurwa kera.

Iki gitabo ugenekereje mu Kinyarwanda cyitwa ‘Ubuzima n’urupfu i Nyamata’ cyashyizwe hanze umwaka ushize.

Ndizeye utuye muri Leta Zunze Ubumwe za Amerika, mu kiganiro cyihariye yagiranye na IGIHE, yagarutse ku mpamvu zatumye yandika ayo mateka nk’umwe mu bagize amahirwe bakarokoka Jenoside yakorewe Abatutsi muri 1994.

Ati “Navuga ko igitabo kigaruka ku mateka ya Nyamata aho mvuka nakuriye, nkaharokokera. Kiravuga ku buzima no ku rupfu muri Jenoside. Nyamata kandi nyigarukaho nk’ahantu hari ibimenyetso by’amateka ya Jenoside ariko ahera mu 1959, nkanagaruka uko nibuka ibyabereye aho nise mu Rusengero rwuje umwijima mu Rwanda.”

Ndizeye avuka ahahoze ari Komine Kanzenze, ubu ni mu Murenge wa Ntarama mu Kagali ka Kanzenze. Muri uyu murenge niho hari urusengero rwiciwemo ibihumbi by’Abatutsi, bakicanwa ubugome bukabije.

Mu gitabo cye, agaruka ku buryo Abatutsi batujwe mu Bugesera mu 1959 bakahajyanwa batabihisemo ahubwo ari amayeri y’ubutegetsi bwari buriho mu mugambi wabwo wo gutegura Jenoside.

Ati “Mu 1959 nibwo ubutegetsi bw’Ababiligi bwahimuriye Abatutsi babakuye mu gice cy’Amajyaruguru za Gakenke na za Rulindo ndetse na za Burera by’umwihariko. Hari n’abandi Batutsi bakuwe mu gice cy’epfo muri za Butare na Gikongoro. Kujyanwa mu Bugesera rero ntabwo bari babisabye kuko bajyanwaga basize ibintu byabo, amatungo, inzu n’isambu, ni muri ibyo bihe rero n’abandi Batutsi benshi birukanywe mu gihugu bagana ibihugu bidukikije.”

Iki gitabo Ndizeye agaragazamo ibyo yibaza ku buzima ababyeyi be babayemo mu nkambi zo mu Bugesera hagati ya 1959 na 1962 n’uburyo bakomeje gutoterezwa muri izo nkambi, bamwe bakicwa.

Ati “Hari byinshi bitatumye ngoheka, aha navuga nk’amateka y’umubyeyi wa mwarimu wanjye Uwamaliya Enatha wanyigishije mu wa mbere w’amashuri abanza, waje kubura se wishwe mu 1963 mu Batutsi bishwe barasiwe aho bitaga kuri Nyabarongo ku kiraro cya Kanzenze, se wa Uwamaliya rero akaba yari Data wacu.”

“Bahuye kandi n’ibindi bibazo mu Nkambi ya Nyamata kuko barwariyemo indwara nka za Tifoyide kubera isuku nke, hapfamo benshi cyane ibyo nzabigarukaho mu kindi gitabo ndimo kwandika.”

Uretse ubwo buzima bwo mu Bugesera mu nkambi, Ndizeye agaruka ku byo yiboneye n’amaso ye birimo iyicwa ry’Abatutsi hagati ya 1990 na 1993, mitingi z’amashyaka by’umwihariko MRND na CDR yateguye akanashyira mu bikorwa Jenoside.

Mu kindi gice, avuga by’umwihariko kuri Jenoside yakorewe Abatutsi, aho avuga uburyo umuryango we wishwe.

Ati “Igice cya Jenoside nyir’izina gitangira mu 1994, uko twahizwe, tukaza guhungira i Ntarama, nkabona uko bishe Data, muri ako kanya simbitekerezeho cyane kuko muri Jenoside, buri munota wabaga ari ubuzima, iyo wabonaga uwishwe wumvaga ko mu kanya ari wowe ukarwana no kureba ko wahanyanyaza ngo wihishe, akababaro kaza nyuma wongeye kubitekereza no kubiha umwanya.”

Ndizeye yavuze ko gutanga ubuhamya bw’ibyo abarokotse babayemo muri Jenoside, bifasha benshi kugabanya umutwaro w’ibyo baba bafite batavuze byibera mu mutima no mu bitekerezo byabo.

Ati “Twari nk’inyamanswa ziba mu ishyamba zitegereje guhigwa no kwicwa isaha iyo ariyo yose buri munsi ku manywa, kuko mu ijoro nibwo twagiraga icyo nakwita agahenge.”

Tariki 13 Gicurasi 1994 nibwo Inkotanyi zabarokoye. Ati “Byari ibyishimo bivanze n’umunaniro, agahinda n’inzara. Tujya i Nyamata Inkotanyi zitangira kutwondora, baduha icyo gufungura, amazi yo koga n’ibindi, turongera tuba abantu.”

Ndizeye yavuze ko icyakomeje gutuma abaho ari icyizere cy’ejo heza, kuko “bitagenze bityo byaba ari Jenoside igikomeza kuko umugambi w’abayitegura bakayikora ni ukurimbura.”

Yavuze ko kwandika ari uburyo bwo guhashya ingengabitekerezo ya Jenoside no guha agaciro abe bishwe.

Ati “Kwandika rero kuri njye ni uburyo bw’isanamitima, kandi kugira ngo ntsinde ingengabitekerezo yo kumaraho abanjye, kuko bifuzaga ko amazina yabo asigara mu bitabo by’amateka kuko nta n’umwe wari kuzarokoka ngo avuge inkuru ye.”

Yashishikarije abandi barokotse Jenoside kwandika amateka babayemo kugira ngo atazasibangana.

Igitabo 'Life and Death in Nyamata' kigaruka ku itegurwa n'ishyirwa mu bikorwa rya Jenoside yakorewe Abatutsi i Nyamata
Ndizeye yavuze ko kwandika amateka ya Jenoside ari uguha agaciro abayirokotse no kunesha umugambi w'abashakaga kurimbura Abatutsi
Umwaka ushize nibwo Ndizeye yanditse igitabo 'Life and Death in Nyamata'

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .