Kwamamaza

Ku nshuro ya gatanu Ambasade y’Amerika mu Rwanda yatangije ubukangurambaga bwo gusoma

Yanditswe kuya 16-09-2016 saa 08:27' na IGIHE


Ambasade ya Leta Zunze Ubumwe za Amerika mu Rwanda yatangije ku nshuro ya gatanu ubukangurambaga bwiswe ‘Everybody Reads Rwanda’ bugamije gukangurira urubyiruko kugira umuco wo gusoma.

Ni umuhango wabaye ku gicamunsi cyo kuwa 15 Nzeli 2016 witabirwa na Ambasaderi Erica Barks-Ruggles, Umuyobozi muri Minisiteri y’Uburezi ushinzwe porogaramu zihuriweho, Sylvie Uwimbabazi, abayobozi b’amashuri, sosiyete sivile, abanyeshuri n’abandi.

Kuri iyi nshuro abana bazasoma igitabo cyitwa Number the Stars cyanditswe na Lois Lowry.

Inkuru y’iki gitabo ishingiye ku Banazi babaga muri Denmark mu 1943, aho umukobwa w’imyaka 10 yafashijwe n’umuryango we agakora igikorwa gikomeye cyo kurokora inshuti ye kugira ngo itavumburwa.

Ambasaderi Ruggles yavuze ko bahisemo iki gitabo kuko insanganyamatsiko zacyo zibanda ku bucuti, umurava, ubwoba, byarangaga umuryango w’Abanya-Danemark muri kiriya gihe Abanazi bari barigaruriye kariya gace, bigereranywa n’ibyo imwe mu miryango yo mu Rwanda mu 1994 yanyuzemo mu bihe by’intambara na Jenoside.

Yagize ati “Gusoma ni inzira yo gufungura Isi ukamenya ibibera hirya no hino. Iyi nkuru isa n’igereranya ariya mateka n’ibyabaye muri iki gihugu, bituma tumenya umuco w’ahandi tukawuhuza n’uwacu.”

Intego y’iyi gahunda ni ukurema mu rubyiruko rw’u Rwanda umuco wo gusoma no kuganira ku nkuru baba basomye mu bitabo binyuranye.

Muri iyi gahunda Ambasade ya Amerika ikorana n’amashuri 20 yisumbuye na 20 abanza yiganjemo ayo mu Mujyi wa Kigali.

Umuyobozi muri Minisiteri y’Uburezi ushinzwe porogaramu zihuriweho, Sylvie Uwimbabazi, yasabye ko Ambasade yakorana n’amashuri menshi kugira ngo uwo muco wo gusoma ukwire hose mu gihugu.

Ubu bukangurambaga ngarukamwaka bwatangiye muri 2012, hatoranywa igitabo abana bazasoma. Muri 2012 basomye icyitwa “A Lesson Before Dying” cya Ernest J. Gaines mu 2013 basoma “The Five People You Meet in Heaven” cya Mitch Albom; mu 2014 basoma “Charlotte’s Web” cya E. B. White umwaka ushize basoma “ A Wrinkle in Time” cya Madeleine L’Engle.

Ambasaderi Erica Barks-Ruggles

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved