00:00:00 IGIHE NETWORK KN KINYARWANDA EN ENGLISH FR FRANCAIS

Igitabo Kayitesi yanditse kuri Jenoside cyatumye atumirwa na Macron ngo bazane mu Rwanda

Yanditswe na Muhonzire Sylvine
Kuya 28 Gicurasi 2021 saa 07:33
Yasuwe :
0 0

Annick Kayitesi Jozan, umwanditsi w’Umunyarwanda uba mu Bufaransa akaba uwacitse ku icumu rya Jenoside yakorewe Abatutsi mu 1994, yanditse igitabo kivuga ku mateka yaranze u Rwanda muri Jenoside, bituma Perezida Emmanuel Macron amutumira ngo bazane i Kigali mu ruzinduko yahagiriye rw’iminsi ibiri.

Kayitesi yavuze ko igitabo ‘Même Dieu ne veut pas s’en mêler” [N’Imana ntishaka kubyivangamo] ari cyo cyatumye Macron amutumira i Kigali kuko cyamenyekanishije amateka y’u Rwanda mu Bufaransa.

Ibi yabivuze mu gikorwa cya Café littéraire gihuza abanditsi b’ibitabo cyabereye mu Isomero rusange rya Kigali ‘Kigali Public Library’ ku Kacyiru.

Iki gitabo cyatumye Macron amutumira ngo bazane mu Rwanda, cyanditse mu ndimi ebyiri Igifaransa n’Ikinyarwanda, mu buryo mbarankuru.

Kayitesi yavuze ko Macron yamutumiye nyuma y’imyaka ine amuhaye igitabo.

Ati “Perezida Macron yantumiye kubera iki gitabo. Naracyanditse ndakimwoherereza, hashize imyaka ine. Ntabwo yigeze ansubiza ariko yaje mu Rwanda yibuka cya gitabo namwoherereje abwira abo bakorana ngo banyandikire nanjye nze mu itsinda bazazana.”

“Naje nk’umwanditsi wabashije kumenyekanisha ibyabaye mu Rwanda hariya mu Bufaransa.”

Kayitesi yavuze ko icyatumye ashyira iki gitabo mu Gifaransa no mu Kinyarwanda ari ukugira ngo n’Abanyamahanga bige ikinyarwanda kuko ari ururimi rukomeye nk’izindi kandi rufasha abanyarwanda kuvuga ibyo banyuzemo.

Ati “Ibi binafasha kumvisha abandi ururimi rwacu urwo ari rwo, kuko Umufaransa azaza atubwire mu Gifaransa yumve ko tubyumva ariko natwe hari ibyo dushaka kumubwira mu Kinyarwanda kugira ngo yumve bitume nawe yigaho ku rurimi rwacu.”

Igitabo ‘Même Dieu ne veut pas s’en mêler’ kigaruka ku buzima bw’umwana w’umukobwa wari ufite imyaka 14 muri Jenoside yakorewe Abatutsi, ari kuganira n’abana be nyuma ya jenoside, ababwira uko mama we yari ameze, indirimbo bakundaga kuririmba iwabo n’uburyo zabafashaga kugira umutima udafite intimba.

Asobanura impamvu yise igitabo cye ngo ‘N’Imana ntishaka kubyivangamo’, yabitewe n’ibyo sekuru yajyaga avuga ubwo yari akiriho, ashimangira ko abantu bagomba gukemura ibibazo byabo badashyize umugayo ku Mana kuko ari bo baba babyiteye atari Imana.

Kayitesi yahaye ubutumwa urubyiruko arusaba kwitinyuka bakandika ibitabo, bakiga indimi zose zivugwa mu Rwanda, bakazimenya neza kuko bizababera iteme ribambutsa rikabafasha kugera ku byiza byinshi.

Kayitesi waje mu Rwanda azanye na Macron, amaze kwandika ibitabo bibiri bivuga ku buhamya bwe muri Jenoside yakorewe Abatutsi cyane ko yabaye afite imyaka 14.

Nyuma ya Jenoside, yerekeje mu Burundi ahava ajya mu Bufaransa, ndetse anahabwa ubwenegihugu bwaho mu 1996.

Jenoside yamutwaye mama we, musaza we umukurikira, Nyirakuru ndetse n’abandi bo mu muryango we benshi, gusa ubu ni umubyeyi ufite abana babiri.

Uretse kuba umwanditsi ni n’impuguke mu ndwara z’ihungabana.

Annick Kayitesi Jovan muri Café littéraire yavuze ibikubiye mu gitabo yanditse cyatumye Macron amutumira ngo bazane i Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .