Kwamamaza

Igitabo cya Gaël Faye cyatangiye gukora akantu i Burayi

Yanditswe kuya 7-09-2016 saa 10:48' na Munyengabe Murungi Sabin


Gaël Faye, umuraperi w’Umunyarwanda ufite inkomoko mu Bufaransa amaze igihe gito asohoye igitabo cya mbere yise ‘Petit Pays’ ubu kiri mu bikunzwe cyane ku Mugabane w’u Burayi by’umwihariko mu bihugu bivuga Igifaransa.

Igitabo cya Gaël Faye yagishyize hanze nyuma gato yo gusezerana imbere y’Imana n’umugore we Violaine. Ibirori byabereye mu Mujyi wa Rubavu kuwa 20 Kanama 2016.

Igitabo cya Gaël Faye kiri gucuruzwa cyane mu Bufaransa ari naho cyacapiwe ndetse by’umwihariko kuwa 1 Nzeri 2016 cyahawe igihembo gikomeye yagenewe n’isomero rikomeye rya Fnac rinacuruza ibitabo kuri internet.

Fnac yahembye Gaël Faye nk’umwanditsi mwiza w’umwaka mu cyiciro cy’abanditse ibitabo byo mu bwoko bwa Roman. ‘Petit Pays’ cyatoranyijwe mu bitabo 650 byitabiriye irushanwa uyu mwaka.

Igihembo cyatanzwe hagendewe ku matora y’abasomyi barenga 800 batoranyije ‘Petit Pays’ nk’igitabo gikubiyemo inkuru iryoshye kandi y’umwimerere kurusha ibindi byose.

Ibyiza byiyongera mu bindi

Mu gihe hari hashize iminsi itanu Gaël Faye yishimira igihembo yahawe na Fnac Jeune Afrique yatangaje ko uyu muhanzi yatowe mu banditsi batatu bakomeye muri Afurika bagomba guhatanira igihembo gikomeye cya Prix Goncourt gitangirwa mu Bufaransa ku mwanditsi mwiza wa Roman kuva mu 1903.

Kuri uyu wa Kabiri tariki ya 6 Nzeri 2016, inteko y’abahanga batoranya ibitabo bihabwa igihembo cya Prix Goncourt yatoranyije ibitabo bitatu byanditswe n’Abanyafurika bizatoranywamo igihembo uyu mwaka.

Gaël Faye yabonetse mu bahatanira iki gihembo kiri mu bya mbere byubashywe mu Bufaransa, ahanganye n’abanditsi bakomeye umugore witwa Natacha Appanah na Natacha Appanah.

Natacha Appanah w’imyaka 43 amaze igihe mu bwanditsi bw’ibitabo, ni Umunya-Mauritius ukomoka mu Bufaransa. Igitabo cye cyamuhesheje kuboneka mu bahatanira ibihembo cyitwa “Tropique de la violence”.

Undi mwanditsi uri mu cyiciro kimwe na Gaël Faye ni Leïla Slimani, yanditse igitabo cyitwa “Chanson Douce”. Ni Umunya-Maroc ukomoka mu Bufaransa.

Abagize akanama nkemurampaka ka Goncourt bazongera guterana kuwa 4 Ukwakira bakore ijonjora rya kabiri; no kuwa 27 Ukwakira 2016 bakora ijonjora rya nyuma.

Agahugu gatoya...

“Petit Pays”, ni igitabo cya mbere Gaël Faye yanditse. Ni igitabo kivuga ku buzima bwe kuva mu bwana, anagaruka cyane ku ruhurirane rw’ibibazo abana bagize mu gihe cya Jenoside yakorewe Abatutsi mu Rwanda mu 1994.

Yivugaho ubwe, akanavuga ubuzima bwa ‘Gabriel’ [umwana wo mu kigero cye]. Inkuru iri muri iki gitabo igaruka cyane ku bibazo bari bahuriyeho bombi, Gaël Faye yahungiye mu Bufaransa naho mugenzi we Gabriel ahungira mu Burundi.

Iki gitabo kivuga mu buryo bwimbitse ibibazo abana bagize bahunga mu gihe cya Jenoside yakorewe Abatutsi ndetse yigarukaho cyane. Gaël Faye kandi avuga ku buhanzi bwe, inzira ye nk’umuririmbyi, uko yakoze album ‘Pili Pili sur un croissant au beurre’ yasohotse mu 2013.

Atuye mu Rwanda…

Mu mwaka wa 2015 nibwo Gaël Faye yaje gutura mu Rwanda by’igihe kirekire kugira ngo yite ku mugore we wabaga i Kigali no gushaka inzira yanyuzamo ibihangano bye bigashinga imizi ku ivuko.

Yamenyekanye mu ndirimbo zirimo ‘Je pars’, ‘Ma femme’, ‘Petit Pays’, ‘PiliPili’ n’izindi. Yavukiye anarererwa i Bujumbura mu Burundi nyuma yerekeza i Paris afite imyaka 13. Akunze kuvuga uruhurirane rw’imico kuri we ndetse n’ingorane kuri album ye yise “Pili pili sur un croissant au beurre”.

Iyi album yayikoreye i Paris n’i Bujumbura ikaba ishushanya imyaka ya mbere ya Faye ubwo yageragezaga kwimenyereza ubuzima bw’i Paris. Kuri iyi album kandi hari abandi bahanzi yakoranye nabo nka Tumi Molekane wo muri Afurika y’Epfo mu itsinda rizwi nka Tumi n’umunya-Angola, Bonga n’abandi.

Gael Faye amaze iminsi mike ahawe igihembo gikomeye
Gael Faye ni umuraperi wakunzwe cyane i Burayi....Yinjiye no mu kwandika ibitabo

Gaël Faye asanzwe afite indirimbo yise ’Petit Pays’


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved