Hashyizweho komite izajya ifasha abanditsi nyarwanda kunoza ireme ry’ibitabo byabo

Yanditswe na Ferdinand Maniraguha
Kuya 23 Mata 2021 saa 11:32
Yasuwe :
0 0

Inteko Rusange y’Urugaga rw’Abanditsi mu Rwanda yashyizeho Komite y’inzobere izajya itanga umusanzu mu gusuzuma ibitabo by’abanditsi ndetse no kujya inama mbere y’uko ibitabo byabo bisohoka kugira ngo bigere ku isoko binoze.

Iyi komite yemejwe kuri uyu wa Gatanu mu nama y’Inteko rusange y’urugaga, igizwe n’abantu icyenda barimo Antoine Mugesera ari na we uyikuriye, Prof Byanafashe Déo, Rucagu Boniface, Bazatoha Adolphe, Mushimiyimana Eugenie, Kayitesi Eugenie, Barore Cléophas, Rwanyange Anthère na Mukandayisenga Pélagie.

Umuyobozi Mukuru wungirije w’Inteko y’Umuco Uwiringiyimana Jean Claude yashimiye abanditsi uruhare rwabo mu kubaka igihugu, aboneraho kubasaba kwirinda gusubira inyuma ahubwo iteka bakarangwa n’umuhate mu byo bakora byose kandi abizeza ubufatanye.

Uwiringiyimana Jean Claude yanabasabye gukomeza kuba indashyikirwa mu bikorwa byose byo kwandika ibitabo, bakandika ibitabo bifasha umuryango nyarwanda kandi byihutisha iterambere ry’u Rwanda.

Nsanzabaganwa Modeste, Umuyobozi mu Nteko y’Umuco, mu mpanuro yahaye abanditsi yagaragaje ko ubwanditsi aribwo musingi wo kubaka iterambere rirambye ry’Igihugu . Yavuze ko abanditsi bakwiriye gukomeza kwandikira u Rwanda, bakandika ibitabo bigaragaza isura nyayo y’u Rwanda ndetse n’Afurika.

Umuyobozi w’Urugaga rw’Abanditsi mu Rwanda, Richard Hategekimana yashimiye cyane Inteko y’Umuco ndetse na Minisiteri y’urubyiruko n’umuco uruhare rukomeye bagira mu gufasha Urugaga rw’Abanditsi kurushaho kubaka igihugu.

Yashimiye kandi abanditsi bose umurimo mwiza bakora wo kwandika ibitabo byubaka u Rwanda ndetse n’Afurika, abasaba gukomeza kurangwa n’indangagaciro na kirazira mu myandikire yabo.

Inama y’Inteko Rusange yemeje abanyamuryango b’Icyubahiro biyongera ku bandi basanzwe barimo Mudidi Emmanuel, Bazatoha Adolphe, Kayitesi Eugenie, Rwanyange Anthère, Banamwana Gilbert na Rucagu Boniface.

Abanditsi basabwe gukomeza kwandikira u Rwanda, bakandika ibitabo bigaragaza isura nyayo y'u Rwanda ndetse n'Afurika.
Umuyobozi Mukuru wungirije w'Inteko y'Umuco Uwiringiyimana Jean Claude yashimiye abanditsi uruhare rwabo mu kubaka igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .