Hagiye gusohoka igitabo kivuga ibigwi bya Nyirarumaga mu mateka y’u Rwanda

Yanditswe na IGIHE
Kuya 8 Gashyantare 2021 saa 05:32
Yasuwe :
0 0

Umushakashatsi ku mateka y’u Rwanda akaba n’umusizi Nsanzabera Jean de Dieu, agiye gushyira hanze igitabo yise ‘Nyiraruganzu II Nyirarumaga, Inkingi mwikorezi y’umuco n’amateka y’u Rwanda’.

Nyirarumaga yabaye umugabekazi w’ingoboka w’umwami Ruganzu II Ndoli.

Nsanzabera yabwiye IGIHE ko yatekereje kwandika iki gitabo afite intego yo gukeza intwari zigaragaje mu mateka y’u Rwanda, umuco avuga ko ukwiye gucengera mu Banyarwanda, maze abanyabigwi barwubatse rugahamya igitinyiro bagahabwa urubuga rubasingiza.

Yagize ati “ Bafite amavugwa n’amarorwa mu Rwanda. Igiti ntikimenyekana kubw’izina cyitwa, kimenyekana ku bw’imbuto cyera, ibikorwa byabo by’ubutaneshwa bikwiriye gushyirwa ahabona, buri wese akabigira ibye, bikamubera igikabuzo cyo kubaka ahazaza hazira icyasha.”

Yavuze ko ibyo abanyarwanda bagezeho byose bagiye babiharanira bityo ko bakwiriye gushimira no kumenyekanisha intwari zose zagize uruhare ngo ibyiza igihugu cyagezeho kibigereho.

Ati “Ibikorwa byubaka igihugu cy’u Rwanda, ubuhangange n’ubudasa, byagiye bigira intwari zabimburiye izindi mu kubyitangira haba mu kubihanga, mu kubyubaka no mu kubirinda. Ntacyo Abanyarwanda twagezeho kubera amahirwe, ahubwo byose twarabiharaniye, tubigeraho twiyushye akuya. Ni byiza ko twimakaza umuco wo gukeza no gusingiza intwari zagize icyo zikora ngo u Rwanda rube urwo ruri rwo uyu munsi.”

Amateka agaragaza ko Nyirarumaga ari umwe mu bagore babaye ibihangange mu Rwanda, aho yarunambiye kugeza ku munota wa nyuma, akabundisha (guhungisha) Ruganzu mwene Cyamatare ubwo Abanyabyinshi bamuhigiraga kubura hasi no kubura hejuru ngo bamwivugane, ingoma y’u Rwanda bayegukane.

Nyirarumaga yemeye gucibwa intoki ebyiri ku gaherere ubwo yangaga gutangaza aho Ndoli yabundiye (yahungiye) ubwo bashakaga kumwica.

Ruganzu Ndoli yaje kwitura Nyirarumaga amugira umugabekazi w’ingoboka ku ngoma ye, kuko nyina Nyabacuzi ba Kibogora yari yaraguye mu miko y’abakobwa i Rubi rw’i Nyundo. Nyirarumaga na Ndoli batwaye u Rwanda ahasaga mu wa 1510-1543.

Ni umwe mu bagabekazi 27 u Rwanda rwagize akaba umwe mu bakoze ibikorwa by’ikirenga byubatse u Rwanda mu rwego ruhanitse mu bihe by’ingoma ye, cyane cyane ku kubaka umuco mbonera w’ubumuntu n’ubumana. Kubaka imibereho n’imibanire y’Abanyarwanda, imyidagaduro n’ubuvanganzo no kurushaho gukuza agaciro k’umugore w’i Rwanda.

Abasizi bo bamwibukira ku kuba ariwe nyirakuruza wabo kuko ibisigo bya mbere ari ibye.

Nsanzabera yavuze ko abanyabigwi nka Nyirarumaga, bakwiye kubahwa no kwibuka ibihe byose, abakiri bato bagatozwa umuco w’ubutwari bushingiye ku bwitange no guhanga ibishya.

Iki gitabo ‘Nyiraruganzu II Nyirarumaga, Inkingi mwikorezi y’umuco n’amateka y’u Rwanda’ kizajya hanze mu minsi mike iri imbere.

Nsanzabera yatangaje ko mu minsi mike igitabo kivuga kuri Nyirarumaga kiraba cyageze hanze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .