00:00:00 IGIHE NETWORK KN KINYARWANDA EN ENGLISH FR FRANCAIS

Emmanuel Uwimana yiyemeje gukoresha ubwanditsi atanga umusanzu mu kubanisha Abanyarwanda

Yanditswe na IGIHE
Kuya 14 Gicurasi 2021 saa 04:24
Yasuwe :
0 0

Umwanditsi w’ibitabo Emmanuel Uwimana yiyemeje guteza imbere imibanire myiza n’ubumuntu mu Banyarwanda yifashishije ubwanditsi, nk’imwe mu nzira nziza zafasha mu guhindura inyokomuntu ikarangwa n’urukundo.

Uwimana amaze kwandika ibitabo bitanu birimo Ubuzima mu muryango, Inzozi z’urukundo, Isano isumba iy’amaraso,Umurunga w’urukundo n’Ikiguzi cy’imbabazi.

Mu gitabo “Ubuzima mu Muryango”, umwanditsi yibanze cyane ku mateka yaranze ubuzima bwe no ku bwigenge bwa muntu. Kivuga kandi ku buryo bwo kubaho mu muryango nyarwanda umuntu afasha abandi kwigirira icyizere cy’ejo hazaza heza aho kubaca intege.

Mu mwaka wa 2017 yanditse ikindi gitabo yise “Inzozi z’Urukundo” kivuga ku rukundo n’uburyo warubamo, ukaruha no ku bandi, wirinze gukomereka cyangwa gukomeretsa abandi.

Mu mwaka wa 2020 Uwimana yanditse ikindi gitabo yise ‘‘Isano isumba iy’amaraso’’, kigaruka ku mibereho n’imibanire y’abantu cyane Abanyarwanda nyuma ya Jenoside yakorewe Abatutsi mu 1994.

Muri icyo gitabo umwanditsi asobanura ibikomere bikomereye benshi batewe na Jenoside , n’ingaruka byateje mu muryango nyarwanda.

Uwimana muri icyo gitabo avuga ku buzima “tumara kuri iyi si, asaba buri wese kubikoresha neza, kuko Umunsi umwe buri wese azaba asigaye ari urwibutso ku bantu. Buri wese agerageze gukore ibyiza kugira ngo azabe urugero rwiza kuri benshi bazumva amateka ye”.

Mu mwaka wa 2020 nibwo yanditse igitabo “Umurunga w’urukundo’’, kigaruka ku mateka n’ubuzima byaranze abantu benshi bakoze ibikorwa byinshi byiza by’ubutwari, birimo ubutwari bagahangana n’ubuzima bwo kuba imfubyi bakiri bato, bagakundana, bakubaka urugo, bagakora batizigamye bakiteza imbere.

Muri icyo gitabo avuga inkuru y’abantu bakoraga neza baharanira kwiteza imbere, ariko abagizi ba nabi bakambura ubuzima batitaye ku neza bagiriye benshi.

Mu mwaka wa 2021 Uwimana yanditse igitabo ‘‘Ikiguzi cy’imbabazi’’. Ni inkuru y’urukundo, ivuga ku buzima bukomeye abantu batari bake bacamo, ibibazo bimwe bigashira haza ibindi.

Mu kiganiro na IGIHE, Uwimana yavuze ko intego mu bwanditsi bwe ari ukubanisha abantu, bakabaho bishimye ntawe babangamiye cyangwa ngo hagire ubabangamira.

Ati “Intego yanjye ni ugusangiza abantu benshi ibitekerezo byanjye, bigamije kubanisha abantu neza mu muryango cyane umuryango Nyarwanda.”

Yavuze ko by’umwihariko ubwanditsi bufasha uwanditse n’uwandikiye kuko bombi babasha kunguka ubumenyi.

Ati “Kwandika bifitiye umumaro uwandika ndetse n’abasoma ibyanditswe. harimo gusangiza benshi ubumenyi butandukanye, ndetse no gusigasira amateka y’ahatambutse, kuburyo abazaza, bazakomeza kwagura ubumenyi mu ngeri zitandukanye babivomye mu bitabo.”

Yakomeje avuga ati “Abandika rero bo bafite inyungu yo kutihererana ubumenyi bafite ndetse bishobora no kubazanira inyungu mu kuzamura imibanire yabo n’abandi, ndetse n’uburyo bw’ubutunzi, igihe ibitabo byakunzwe n’abantu benshi bikagurishwa.”

Kuri ubu ibitabo bya Uwimana biboneka muri Kigali Public Library, Arise Bookshop, Library IKIREZI Bookshop ndetse no mu Ngoro y’umurage w’ibidukikije /Karongi. Ibitabo bye kandi biboneka kuri www.umurunga.com .

Uwimana Emmanuel yemeza ko ubwanditsi bushobora gufasha mu guhindura umuryango wangiritse kubera amakimbirane
Bimwe mu bitabo Uwimana amaze kwandika
Igitabo 'Isano y'Amaraso' kivuga ku ngaruka za Jenoside yakorewe Abatutsi mu muryango nyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .