Beata Umubyeyi Mairesse yahawe igihembo ‘‘Prix des Cinq Continents de la Francophonie’’ (Video)

Yanditswe na Karirima A. Ngarambe
Kuya 4 Gashyantare 2021 saa 08:25
Yasuwe :
0 0

Umwanditsi w’Ibitabo, Beata Umubyeyi Mairesse, yahawe igihembo ‘‘Prix des Cinq Continents de la Francophonie’’ gihabwa uwagaragaje umwihariko mu guteza imbere Igifaransa, abikesha igitabo cye yise ‘‘Tous tes enfants dispersés.’’

‘‘Prix des Cinq Continents de la Francophonie’’ ni igihembo gihabwa intyoza mu buvanganzo, cyatangiye gutangwa mu 2001 bigizwemo uruhare n’Umuryango Mpuzamahanga w’ibihugu bikoresha Igifaransa (OIF). Gihabwa igitabo cy’umwanditsi wagaragaje umwihariko mu guteza imbere Ururimi rw’Igifaransa.

Umubyeyi wegukanye iki gihembo yavuze ko yishimiye kukibona ndetse ari icy’ingenzi mu rugendo rwe nk’umwanditsi.

Yatangiye kwandika afite imyaka 30 ndetse icyo gihe ntiyizeraga ko azaba umwanditsi w’ibitabo.

Yakomeje ati ‘‘Nakunze gusoma kuva kera nkiri muto cyane, ngira amahirwe yo kuvukira mu Mujyi wa Butare, wari ufite inzu z’amasomero, izigurishirizwamo ibitabo n’ububiko bwabyo. Tukiri abana byaradufashaga cyane kubona ibitabo ukabivanamo ubumenyi bwinshi, harimo kugukundisha na we kuzaba wavamo umwanditsi, ukiga neza ururimi usomamo n’ibindi. Ni ho hampaye imbaraga zo kwandika no kubikunda.’’

Mu kiganiro cyihariye IGIHE, uyu mwanditsi yavuze ku gitabo cye ‘‘Tous tes enfants dispersés’’, bishatse kuvuga ‘‘Abana bawe bose batatanye’’ cyamuhesheje igihembo.

Umwanditsi Beata Umubyeyi Mairesse yahawe igihembo ‘‘Prix des Cinq Continents de la Francophonie’’

IGIHE: Wakiriye ute iki gihembo?

Umubyeyi: ‘Prix des Cinq Continents de la Francophonie’ ni igihembo gikomeye nishimiye cyane, barampamagaye mu minsi ishize barabimbwira. Ni igihembo gitangwa biciye mu kanama nkemurampaka (Jury) gashinzwe ijonjora, riba rigizwe n’abanditsi bakomeye bo mu bihugu byinshi bitandukanye bivuga Igifaransa.

Kari kayobowe na Paula Jacques, Jean-Marie Gustave Le Clézio, Lise Bissonnette, Ananda Devi, Hubert Haddad, Monique Ilboudo, Vénus Khoury-Ghata, Liliana Lazar, Wilfried N’Sondé, René de Obaldia, Lyonel Trouillot, Abdourahman Waberi, Jun Xu et Gilles Jobidon. Aba barimo n’abigeze guhabwa iki gihembo.

Babanje guhitamo ibitabo by’abanditsi 10, muri ibyo bakuramo ibindi bibiri bihembwa, ari na ho icyanjye cyaje ku isonga gikurikirwa n’icya Paul Kawaczak, umwanditsi w’imyaka 34 wo muri Québec.

Iki gitabo rero kikaba ari nacyo cya mbere nanditse mu buryo bwa Roman, bikaba byaranshimishije ko bwa mbere cyabonye igihembo.

IGIHE: Ni iyihe mpamvu wagize amahitamo yo kwandika roman aho kwibanda ku buhamya bw’amateka ya Jenoside warokotse?

Umubyeyi: Ni byo koko kwandika ubuhamya kuri Jenoside yakorewe Abatutsi ni ibintu nubaha bikomeye. Nshima kandi ngasanga ababikoze kugeza ubu ari ubutwari, kuva nagera hano mu Bufaransa nyuma yo kurokoka, uko hasohokaga igitabo kirimo ubuhamya naragisomaga, abenshi turi no mu kigero kimwe ndabazi.

Ibitabo byabo birakomeye cyane ku mateka yacu, kuko bituma abantu bamenya ibyakorewe Abatutsi muri kiriya gihe ku buryo nyabwo bivugwa n’ababibayemo babikorewe, bigatuma nta warengera avuga ibindi bitari byo.

Njye rero kwandika mu buryo bwa Roman hari impamvu nyinshi zabinteye, imwe muri izo ni uko wenda nari ntaragira ubwo butwari bwo kuvuga amateka yanjye.

Njya mbabazwa cyane n’Abafaransa bamwe usanga bavuga ngo ni amateka yabereye kure muri Afurika, mbese ugasanga bisa nkaho bitabareba, ariko Jenoside iyo ariyo yose ni icyaha cy’iyicarubozo kireba ikiremwamuntu cyose ku Isi.

Mu kwandika rero inkuru karemano (Roman) n’inkuru yihariye mba nshaka kwerekana ariko bitavuze ko ari amateka muri rusange aho uhuza abantu batandukanye mu nkuru ishobora kubaho ariko mpimbano. Hari aho usanga ya mateka yo muri Jenoside ajemo, noneho wa muntu usoma igitabo uwo ariwe wese n’umugabane yaba aherereyemo wose, na we ashobora kumva bimureba cyangwa bisa n’ibyo yaciyemo, atavuze ko byabereye kure bitamureba.

Ubwo rero ni bwo buryo bwanjye bwo kuvuga ibintu bikomeye ariko bikakirwa mu buryo bworohera uwo ari we wese kandi akibonamo.

Hari umwanditsi wo mu Bwongereza witwa Zedie Smith wanditse mu gitabo cye inyandiko ya nyayo ya David Foster Wallace ngo “La bonne littérature est faite pour réconforter les gens dérangés et déranger les gens confortables’’, bivuze ngo ‘Inyandiko nziza ifasha abatameze neza kubera ibibazo bahuye nabyo mu buzima wenda, ikanababaza abari bamerewe neza bashaka ko ikibi kitavugwa muri rusange.’’

Hari uba afite intimba ku mutima yasoma inkuru akumva hari abandi bahuje akababaro akumva biramufashije nkuko mu Rwanda bakunda kuvuga bati ‘Si urw’umwe’ kuko abona muri iyo nkuru harimo abakomeza umutsi, bagakora ku buryo bagira ejo heza habo, na we bikamugiraho ingaruka nziza.

Aho abandi twavuze baba badashaka gusoma ibintu bikomeye babona gusa umutwe w’inkuru ko uvuga kuri Jenoside agahita avuga ati ‘Sinshaka gusoma ibintu bintera umutwe aribo nise (les gens confortables). Muri make ni uko nabonye ibyiza byo gukoresha inkuru karemano.

IGIHE: Mu gitabo wibanze ku byo wise Métissage na Transmission, gifite uburemere bw’uruhererekane rw’umuco, uburere, ingiro ku cyo umuntu ari cyo ukanagaruka kuri Jenoside. Iki gitekerezo cyo guhuza ibintu biremereye by’ingeri nyinshi cyakujemo gite?

Umubyeyi: Byaturutse ahantu henshi, mu bitabo nasomye by’abanditsi batandukanye harimo n’abaturuka mu Birwa bya Antilles. Abirabura bo muri Amerika n’abandi benshi bavuze amateka y’abirabura muri Diaspora ku Isi yose niho navuga navanye inganzo (inspiration). Ikindi ni uko umuntu ashobora no kwandika agendeye ku mateka azi nk’aya Jenoside yakorewe Abatutsi cyangwa kuba imvange y’umwirabura n’umuzungu (Métisse) nkuko Gaël Faye avuga ati ‘ni hagati y’imigezi ibiri hagati y’intebe ebyiri.’

Njyewe mu Rwanda batubwiraga ko turi abazungu, njyeze mu Bufaransa batwita abirabura. Ibyo rero ni ibintu abantu benshi usanga baranyuzemo.

Icyo nagerageje gukora muri iki gitabo ‘Tous tes enfants dispersés’ mu bihe bishize, ni ukuvuga nk’umukecuru wavukiye mu Rwanda, avukirayo, abyirukirayo, ahura n’Umufaransa barashakana babyarana umwana wa mbere bise Blanche, nyuma aza kubyara n’undi mwana yise Bosco, ariko we amubyarana n’Umunyarwanda bakundanye bakiri mu mashuri yisumbuye.

Ubwo rero ukabona hari umwana umwe w’Umu-métisse, undi w’Umunyarwanda, kuri uwo mubyeyi ubarera wenyine, hakaba n’ibyo atababwira kubera umuco w’Abanyarwanda akenshi ababyeyi batavuga bumva ko ari ukurengera umwana ariko abana bakazakura bibaza ku mateka yaho bakomoka mu miryango yacu n’ibindi.

Icyo gihe rero mu Rwanda intambara yatangiye wa mwana Bosco ajya mu Inkotanyi, wa mubyeyi agumana n’umukobwa we. Jenoside itangiye abwira uwo mukobwa ati ‘Wowe uri Métisse jyana na bariya bazungu bava i Butare utoroke ugende uzagere i Burayi mu gihugu cya so uzarokokereyo. Uwo mubyeyi na we yagize amahirwe aza kurokoka.

Igitabo gitangira Blanche umukobwa we yarize i Burayi mu Bufaransa ararangiza, ashaka umugabo w’umu-métisse na we aza gushaka uko yataha mu Rwanda gusura nyina na musaza we Bosco.

Nyuma rero igitabo kivuga ukuntu muri uwo muryango habaye agahinda kenshi n’ibintu byinshi bitabashije kuganirwaho kuko byagumye mu mitima yabo bikabatera intimba nyinshi.

Umubyeyi yagaragaje ko iki ari ikibazo kibaho ku miryango myinshi ivukamo aba-métisse ndetse yashakaga ko ibyo yashyize mu gitabo byaba imbarutso y’ibiganiro kugira ngo abana babakomokaho bazabashe kubaho neza no kumenya inkomoko yabo.

Uyu mwanditsi avuga ko mu myandikire ye akunda kwerekana imitekerereze itandukanye ku kintu runaka, cyangwa gufungura ibiganiro, kuko abantu bose batabona ibintu kimwe.

Umubyeyi ufite ubwenegihugu bw’u Rwanda n’u Bufaransa, yarokotse Jenoside yakorewe Abatutsi; yavukiye i Butare-Ngoma, ubu ni mu Karere ka Huye, mu 1979. Afite abana babiri akaba atuye mu Mujyi wa Bordeaux mu Bufaransa.

Umubyeyi ufite ubwenegihugu bw’u Rwanda n’u Bufaransa, yarokotse Jenoside yakorewe Abatutsi

Amafoto: RODOLPHE ESCHER/FLAMMARION

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .