Amajyaruguru: Hatanzwe ibitabo bisaga ibihumbi 17 mu gukundisha abanyeshuri umuco wo gusoma

Yanditswe na N.Kubwimana Janvière
Kuya 19 Kamena 2018 saa 07:16
Yasuwe :
0 0

Ibigo by’amashuri yisumbuye byo mu Ntara y’Amajyaruguru by’umwihariko ibya Kiliziya Gatolika byahawe imfashanyigisho z’ibitabo birenga ibihumbi 17 muri gahunda yo gushyigikira Leta mu gukundisha abana ishuri babikesha gusoma baniyungura ubumenyi.

Ibi bitabo byagenewe amashuri atandukanye byatanzwe n’Ishuri rikuru rya INES Ruhengeri mu gusoza icyumweru cy’uburezi Gatolika ku rwego rwa Diyosezi ya Ruhengeri kuri iki Cyumweru tariki ya 17 Nyakanga 2018, mu Karere ka Burera.

Umushumba wa Diyosezi ya Ruhengeri, Musenyeri Vincent Harolimana, yasabye aba bana kugira umutima urangwa n’urukundo no kubana neza n’abandi anibutsa abahawe izi mfashanyigisho kuzikoresha ibyo zagenewe.

Yagize ati “Twifuza ko abana bacu barangwa n’umutima w’urukundo no kubana neza n’abandi, ariko nk’uko kiriziya ibifite mu ntego tunifuza gutanga uburezi bufite irem. Ibi bitabo rero muhawe ni kimwe mu bizabafasha kugera kuri iyi ntego twihaye, turasaba ababyeyi n’abarezi babo kubafasha mukabakundisha ishuri.”

Yanasabye abahawe izi mfashanyigisho kuzikoresha icyo zagenewe kugira ngo babashe kuzibyaza umusaruro urenze uwo bajyaga batanga.

Umunyamabanga nshingwabikorwa w’Intara y’Amajyaruguru, Jabo Jean Paul, yavuze ko hari ibigo bihabwa imfashanyigisho bakazirekera mu bubiko banga ko zibura cyangwa zigacika gusa, aho kuzibyaza umusaruro.

Yakomeje agira ati “Mubihawe ngo bifashe abana kwiga neza bakagira ubumenyi bwisumbuyeho, kuko gusoma ni kimwe mu bituma ubwenge bwabo bwaguka, mubabe hafi mubatoze gusoma munabasobanurira ibyo batumva, uwo ube umukoro w’abarezi bose, abana bacu bige neza.”

Bamwe mu bana bahawe izi mfashanyigisho bavuga ko bagiye kuzibyaza umusaruro biyungura ubumenyi bikabafasha gutsinda neza.

Uwitwa Mukamugisha Adeline yagize ati “Hari igihe twakeneraga ibitabo byo gusoma ariko bikaba bike, ari ukugenda tubisaranganya, ariko ubwo tubonye ibindi nta kibazo tuzongera kugira, bizadufasha kwiga neza nka twe turi mu myaka isoza tunakore ubushakashatsi tubyifashishije.”

Hatangimana Theoneste we yagize ati “Ibi bitabo duhawe nabyita nk’urufunguzo rushya rw’ubwenge twungutse, natwe twiteguye kubibyaza umusaruro kuko hari ubumenyi bwinshi tuzungukiramo ku buryo mfite icyizere ko nzatsinda kuruta uko mbere byari bimeze.”

Kiliziya Gatolika ifite ibigo by’amashuri birenga 1321 mu gihugu hose, naho mu Ntara y’Amajyaruguru hari ibigo 137. Muri ayo mashuri ariko harimo ayo Kiriziya ihuriyeho na Leta.

Abanyeshuri batandukanye bari bitabiriye umuhango wo gusoza icyumweru cy'uburezi gatolika
Ibitabo ibihumbi 17 byagenewe aba banyeshuri
Umushumba wa Diyosezi ya Ruhengeri, Musenyeri Harolimana Vincent
Ibi bitabo bizafasha abanyeshuri mu kwimakaza umuco wo gusoma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza